Kabanata 15 Love and Sacrifice

“Tumuloy muna tayo kina Nessa. May apartment ang Tita niya. Pasensya ka na Mika. Aayusin ko agad ang problema.” Hinawakan nito ang kanyang kamay. Ramdam niya ang sinseridad nito.

Ngumiti siya kay Liam. “Okay lang, alam kong hindi mo gusto ang nangyari. Magiging okay din ang lahat.” Pilit niyang pinasigla ang tinig at humalik sa pisngi nito.

Sa kanto pa lamang ay sinalubong na sila ni Nessa. “Naiinis ako sa’yo! Inagawan mo ako ng mapapangasawa.” Pinagtitinginan sila ng mga kapitbahay na halos lahat yata ay nasa labas at nag-uusyuso sa pagdating nila ni Liam.

“Tara nga dito, nakipagtanan ka kay Liam?” Hinila siya ni Nessa ng may matandang lalaking kumausap sa binata.

“Oo. Kaya magkasama na kami ngayon.”

“Ano masarap ba?”

“Ang alin?” patay malisya niyang sagot.

“Ay ang slow mo sa part na ‘yan!”

“Huwag mo ng alamin at maiinggit ka lang.”

“Ayun, mukhang nakatikim ka na. Hindi bale, switch jowa tayo, akin na si Andrei. Pasalamat ka at may kapalit agad, kung wala, ipapakulam kita!”