Chapter 32

Kung noon ay may excitement sa akin kapag naririnig ang pangalan ni Papa, ngayon ay parang wala na lang sa akin. Siguro matapos kong maranasan ang ilang linggong pagmamalupit ng pamilya niya sa akin.

Sino ba naman ako, hindi ba? Anak niya lang naman ako sa labas kaya walang special treatment.

“Miss Alexa, hinihintay ka na po ni Senyorito Rodrigo.”

Tumango lang ako at pumasok na sa loob. Sinalubong ako ng mga kasambahay at nakita ko ang pag-ikot ng mga mata ni Tita Taliana nang nakita ako. Nakasuot pantulog pa siya habang nakahalukipkip. Tinaasan naman ako ng kilay ni Arissa na katabi lang ni Sofia na nakayuko lang. Iniwas ko ang tingin sa kanila at akmang papasok na sa loob ng opisina nang biglang nagsalita si Arissa.

“Ano ang ginagawa ng anak sa labas dito sa pamamahay namin?” tanong niya. “At bumalik ka pa talaga rito matapos mong pinerwisyo ang buong tao rito!”

Kunot-noo ko siyang binalingan.