Chapter 23

"ANONG nangyari?" bungad na tanong sa akin ni Justin, kasama niya si Jasmin.

"Wala, nagutom lang si Vhon kaya nagwala siya. Iba kaso siya magutom, mabuti nga at hindi siya nangangain. Hindi pa ba tapos maghain sina Sam?" pabalik na tanong ko.

"Hindi namin alam, hindi pa kami pumunta sa kusina," sagot naman ni Jasmin.

"Sigurado ka ba talaga na ayos lang ang nasa loob ng kwartong iyan?" tanong ni Justin.

"Oo, pinapakalma na siya ni Aira. Check Sam, and Sebastian kung tapos na ba sila sa kusina. Tawagin niyo sina Aira kapag may nakahanda ng pagkain. Sa labas lang ako." Hindi ko na hinintay pa na sumagot sina Justin at Jasmin. Iniwan ko na sila, at bumaba na.

Dala ko ang back pack ko habang tinutungo ang labas ng bahay. Nang makalabas ako sa mansiyon ay bumungad sa akin ang isang garden at ang mga halaman na buhay pa sa paligid. Kahit gabi na ay kitang-kita ko pa rin ang mga kulay ng mga ito dahil sa buwan na nagsisilbing ilaw sa paligid.