Chapter 8

February’s POV 

“Ang weak mo naman," natatawa kong sambit kay Sapphire na nandito sa tapat ng bahay namin at nakikilaro kina Aya at Cali. Naglalaro sila ngayon ng sipa. Mukhang wala nanamang magawa si Sapphire. Sarap talaga ng buhay ng mokong. 

Sabagay, hapon naman na kasi at maski kami ay wala ng ginagawa. 

“Ate Febi, ang galing kaya ni Kuya Zeal!” Pagtatanggol ni Aya kay Sapphire. 

“Mas magaling kaya si Ate!” sabi ni Cali. 

“Hindi ba, Ate Febi?” tanong ni Cali at nginitian ako. Natatawa ko namang ginulo ang buhok nito. 

“Kampihan oh, kampi ko si Kuya Zeal!” sabi ni Aya. Tinignan ko naman siya na kunwari ay nagtatampo ngunit iniwas niya ang tingin sa akin. 

“Magaling din si Ate Febi pero magaling si Kuya Zeal," pambawi niya. Hindi ko alam kung dapat ba akong matawa dito o ano. 

“Sige ba!” sabi naman ni Cali na siyang na sa tabi ko na. 

“Galingan natin, Ate ah?” tanong niya sa akin. Natatawa ko lang siyang tinanguan. 

“Kung sinong matatalo, manlilibre," sabi ni Cali. Mukhang kampanteng-kampante ito ngayon. Aba, mamaya matalo kami, paggagastusin pa ako ng batang ito. Well, ‘yon ay kung matatalo. 

“Sige ba, kung sinong matatalo manlilibre ng halo halo!” sabi pa ni Aya. 

“Ang lakas ng loob niyo, may pera ba kayo, ha?” tanong ko ng natatawa sa kanilang dalawa. 

“Mayroon, Ate! Nasa alkansiya!” sabi naman ni Aya. Napatawa na lang ako ng mahina at napatango sa kanila. 

“Game,” sabi ko pa na iniabot pa sa kanila ang sipa. 

“Ang Ate Febi mo pa talaga ang hinamon mo, Aya?” natatawang tanong ni Isaac na may dala-dalang halo-halong naupo sa tabi ko. 

Sabay naman na nakalunok si Aya at Cali kaya natatawa na lang akong napapailing. 

“Hinahanap ka nga pala ng manliligaw mo, Febi," sabi niya sa akin kaya pinagkunutan ko siya ng noo. 

“Si Noel, tinawagan ako, hindi mo raw sinasagot ang cellphone mo,” natatawa niyang saad. Makikipagtalo pa sana ako sa kanya kaya lang ay nagsimula naman na si Aya. Nakatatlo naman ito. Nang natapos naman na ni Sapphire  ay napapalakpak si Aya. Nakalabing lima rin kasi ito. 

“Not bad," nakangisi kong saad. 

Si Cali naman ang sumipa, nakalima ito. Kabadong-kabado naman si Aya sa tabi. Natawa na lang ako habang tinitignan siya. 

“Woah!” bulong ni Cali nang matapos ako. 

“22 lang, Febi? Dati umaabot ka pa ng 30 ah?” tanong ni Isaac na tila hindi pa nakuntento doon. 

“Hindi ako tumatanggap ng opinyon ng dalawa lang e talo na agad,” natatawa kong saad sa kanya. Nagmake face lang siya sa akin. 

Napatingin naman ako kay Aya na medyo nalungkot ngayon. 

“Kunin ko na po alkansiya ko,” sabi nito at ngumuso. Magsasalita na sana ako ngunit si Cali na ang unang nagsalita. 

“Huwag mo ng galawin ang iyo, Aya, ‘yong akin na lang,” sabi ni Cali. Hindi ko maiwasang mapangiti dahil dito. Kuyang kuya talaga ang dating ng batang ito. Parehas ko naman silang nilapitan at ginulo ang buhok. 

“Huwag niyo ng galawin ‘yon, may pera pa ang Ate,” sabi ko sa kanilang dalawa at parehas pang nginitian. Parehas naman silang nabuhayan at natuwa dahil dito. 

“Tara lets!” sabi ko at nginitian sila. 

“Tara, Sapphire." Yaya ko rin kay Sapphire na nakatingin lang sa amin. 

“Ako, Febi? Hindi mo ba ililibre?” natatawang tanong ni Isaac sa akin. Inirapan ko lang siya at hindi pinansin. Hindi na rin naman ito sumunod. Sigurado naman akong nagpapahinga lang ‘to sandali at babalik na rin sa pagpapastol ng mga alaga niya. 

Nang makarating kami sa bilihan ng halo-halo, si Aling Ruby ang bumungad sa amin. 

“Ana! Ana! Lumabas ka diyan, dalian mo!” malakas na sigaw ni Aling Ruby nang makita ang kasama ko. 

“Bakit ba, Ma?!” padabog pa na tanong ni Ana Marie ngunit nang makita si Sapphire ay agad itong nabuhayan at ngumiti ng malapad. 

“Uyy, Zeal," nakangiti niyang bati dito at nagpabebe nanaman. Tinanguan lang siya ni Zeal dahil kinakausap nito ang mga kapatid kong sina Aya at Cali. 

“Apat na large," sabi ni Sapphire na tinuro ang malalaking baso. 

“Nah, make it 6," sabi niya pa ng mapaisip. Tinignan ko naman siya dahil dito. Aba, hindi siya ang magbabayad nito.

“Apat lang, Ana,” sabi ko kay Ana Marie na hindi naman pinansin ‘yon. 

“Six ba, Zeal?” tanong pa ni Ana Marie na malanding hinawakan ang pangkayod ng yelo. Hindi ko alam kung dapat ba akong matawa sa itsura nito ngayon o ano. Paano ba naman ay ang sagwa ng itsura niya ngayon habang si Aling Ruby naman ay natutuwa pa sa anak. 

Napailing na lang ako at nanatiling nakatayo rito sa pwesto ko. 

“Ang init talaga ngayon no?” tanong ni Ana Marie na pinapakita ang collar bone at pinapangpaypay ang kamay. Pinipigilan ko namang matawa dahil sa itsura niya ngayon. 

Hindi rin naman kasi siya pinapansin ni Sapphire. Para lang tuloy siyang tanga na kinakausap ang sarili. 

“Oo nga, Anak, ang init nga ngayon,” sabi ni Aling Ruby na sinasalo ang anak sa kahihiyan. Sinamaan pa ako nito ng tingin nang makitang napapangisi ako. Well, sa lahat ng kapitbahay ko, si Aling Ruby lang talaga itong hindi ko magawang pakisamahan dahil kahit ano namang gawin mong mabuti rito ay hindi niya pa rin ‘yon napapansin at patuloy pa rin sisiraan sa ibang tao. 

Madalas akong mainis sa kaniya dahil doon noon, lalo na’t naririnig ko pa siyang sinisiraan si Lola sa ibang tao kahit na ang bait ng pakikitungo sa kaniya nito. Bata pa lang ako ay kumukulo na ang dugo namin sa isa’t isa kaya pati si Ana Marie ay nahawaan na rin sa galit ng ina sa akin. Wala naman akong kaso kay Ana Marie dahil ako lang naman madalas ang siraan niya. Ayos lang ‘yon sa akin hangga’t hindi niya sinisira ang reputasiyon ng pamilya ko.

“Ito na, Zeal, oh...” nakangiting niyang saad habang inaabot isa isa ang halo halo. 

“Ito ang iyo," sabi niya pa na malanding inaabot kay Zeal ang halo halo. Halos mapuno ito ng mga sangkap. 

“Bakit naman ganiyan, Ana Marie?” mahinahon kong tanong nang makitang parang wala man lang sangkap ang halo-halo ng mga kapatid ko. 

“Ano nanaman ang nirereklamo mo, February?”.tanong ni Aling Ruby na nakapamewang pa habang nakatingin sa akin. Nakataas na agad ang kilay nito na tila handa na agad akong insultuhin. Pinipigilan ko naman ang sarili kong magsalita at pinakalma na lang. 

“Ano? Hindi ka makapagsalita ngayon? Ang galing-galing mong awayin si Ana, palibhasa mas maganda sayo,” sabi niya pa. Napangiwi naman ako dahil dito. Pakihanap paki ko? 

Napa-buntonghininga pa ako at kinagat ang labi para hindi makapagsalita ng masama. 

“Tama lang naman ‘yan sa inyo, ha? Palibhasa patay gutom,” natatawa niya pang saad kaya hindi ko na napigilang magsalita.

“Hindi mo ba ‘yan nakikita, Aling Ruby? Parang isang piraso nga lang ata ‘yang beans para sa mga kapatid ko. Hindi patay gutom ang tawag do’n, nagtatanong lang ho ako," sabi ko sa kanya na pinakita pa ang baso. Hinawakan naman ako sa braso ni Sapphire habang sina Aya at Cali naman ay humawak sa laylayan ng t-shirt ko. 

“Aba, nagreklamo ka pa, February? Saka sinong kapatid? Hindi mo naman mga kapatid ‘yan!” natatawa niyang saad sa akin. Para namang kumulo ang dugo ko dahil doon. Kinuyom ko naman ang kamay at kaunti na lanv ay mabubulyawan ko na ito. 

“Febi, ito na ang sa’yo," sabi ni Sapphire sa akin. Pinakita ang halo-halo na bigay sa kanya ni Ana. Nakita ko naman ang epekto nito sa mag-ina, parehas pa silang nainis. 

“Hindi naman kasi ‘yon ang pinupunto ko rito. Ang pagiging bias niyang si Aling Ruby ang gusto kong maitama," abi ko pa. 

“Aba, masama bang damihan ang para sa magiging future boyfriend ng anak ko?” tanong pa ni Aling Ruby. Natigilan din siya nang mapagtanto ang sinabi. 

Nagtawanan naman ang ilang kapit bahay niyang nakarinig. Sinamaan tuloy ako nito ng tingin, hindi naman ako nagpatalo at ibinalik ko rin ‘yon sa kanya. Sino ba siya para sabihing hindi ko kapatid sina Aya at Cali? 

Ilalapag ko na sana ang bayad ko para makaalis na ngunit si Sapphire na ang nagbayad. 

“Let’s go,” sabi niya sa akin na hinila na ako habang sina Aya at Cali naman ay nakasunod lang sa aming dalawa.

Pinakalma ko naman ang sarili dahil sa iritasyon sa mag-ina na ‘yon. Hindi naman mainitin ang ulo ko kaya lang kapag si Aling Ruby na talaga ay kusa na lang akong hihigh blood-in. 

“Cali, bigay mo kina Lola at Lolo mo,” sabi ni Sapphire na iniabot ang dalawang halo-halo kay Cali. Tumango naman si Cali dito. 

“Ate? Ayos ka lang?” tanong ni Aya sa akin. 

“Oo naman," sabi ko na lang at nginitian ito. Hindi naman nawawala ang tingin nila sa aking dalawa ni Sapphire. Inilingan ko na lang sila dahil napakalma ko naman na ang sarili kahit paano. 

“Here,” Abot ko kay Sapphire kaya kinunutan niya ako ng noo. 

“It’s my treat for Cali and Aya," sabi niya at nagkibit ng balikat. 

“Tatlong beans naman na ang nakain ko, Ate. Hindi lang isa ang nilagay ni Ate Ana," sabi ni Aya. Hindi ko alam kung matatawa ba ako dito o ano. Ginulo ko naman ang buhok ni Aya. 

“Thank you daw, Kuya,” sabi ni Cali nang makabalik na sa tabi namin. 

“Ate, hayaan niyo na lang po si Ate Ana, ang sabi ni Inigo, inggit daw sa'yo ang Ate niya,”.sabi ni Cali sa akin. Ang dalawang ito, ang pagiging chismoso pa ata ni Isaac ang mamamana. 

Madami silang kwento na talaga namang nagpakalma na sa akin ng tuluyan. Napapangiti na lang si Sapphire habang nakatingin sa dalawa. 

Nang matapos kaming kumain ng halo-halo ay nagtungo na ako sa likod samantalang sina Cali at Aya ay sinundo na rin ng mga kalaro nila. Dahil wala namang magawa si Sapphire at ako lang ang kilala nito dito ay sumama siya sa akin. 

Nanonood lang naman siya habang inaayos ko lang ang mga halaman. Kinukwentuhan ko lang siya ng kung anong tungkol sa akin habang nakikinig lang naman siya. 

“So you really hate Aling Ruby?” tanong niya ng maikwento ko ang experience ko noong bata ako kay Aling Ruby. 

“Hindi naman, hindi lang siguro talaga kami nagkakasundo. ‘Yong tipong kapag nakikita ko pa lang siya parang kumukulo na ang dugo ko, ganoon ba?” natatawa ko na lang na saad nang tuluyan na nga akong kumalma dahil sa alitan namin ni Aling Ruby kanina. 

“Ganoon din naman siguro ‘yon sa akin," natatawa kong saad at napailing. 

“Hindi naman sa sinisiraan ko ang magiging biyenan mo, ha?”.napatawa pa ako ng maalala ang sinabi ni Aling Ruby na future boyfriend daw ni Ana Marie si Sapphire. Napakunot siya sandali sa akin. Halos mabilaukan naman siya sa sarili niyang laway nang mapagtanto ang sinabi ko. 

“Masiyado mo namang kinikilala ang biyenan mo.” Biro ko pa sa kanya kaya agad niya akong sinamaan ng tingin. Mas lalo pa akong natawa nang mas sumama pa ang tingin niya sa akin. Sabagay, halata naman sa mukha nitong mataas ang standard pagdating sa mga babae saka sa mga tipo niya? Mukhang kahit mga artista ay hahabol habulin siya. 

Mas lalo ko pa siyang inasar habang nagtatanim ako. Halata namang napipikon siya sa akin dahil dito. 

Lumipas ang ilang oras na nagkukwentuhan lang kami hanggang sa hindi ko na namamalayan na magtatakip silim na pala.

Hindi ko maiwasang mapangiti kahit na madalas ko naman talaga itong inaabangan. Para bang hindi ito nakakasawang pagmasdan. 

“Ang ganda no?” tanong ko sa kanya. Tumango naman siya habang nakatingin din sa kalangitan. 

Hindi na alis ang tingin namin dokn hanggang sa tuluyan ng kainin ng dilim ang kulay kahel na kalangitan. Tumayo naman na kami. 

“Febi? Kakain na! Halika na dito!” sabi ni Lola na siyang pababa na. 

“Oh, Hijo, nandito ka pala, halika na’t sumabay ka na rin sa amin sa pagkain,” nakangiting saad ni Lola sa kanya. 

Tinignan ko naman si Sapphire na ngumiti at tumango rin kay Lola. Kusa na lang din akong napangiti dahil sa kanila.