1 Pamilya Joson...

ALAS-SAIS na ng hapon nang makarating si Gabriella sa kanila. Galing siya sa bahay ng kaibigang si Lora, na hindi naman kalayuan ang bahay mula sa kanila. Gumawa sila ng group project. Maaga naman silang nakatapos pero itong si Lora ay nag aya pang tumambay sila sa tabing ilog na nasa likod bahay lamang.

Hinatid pa siya ng kaibigan niyang si Karl gamit ang motorsiklo nito. Dahil ang bahay naman nito ay sa kabilang baryo pa. Sa mismong tapat ng gate siya inihinto si Karl.

"Ingat ka, Karl. Dahan dahan lang," paalala niya sa kaibigan nang makababa sa motor.

"Mukhang may bisita kayo," sabi ni Karl na pinatay muna ang makina at sa loob ng bakarun nila nakatingin.

Napasunod din siya ng tingin. May nakaparadang sasakyan sa loob ng bakuran nila.

"Sino kaya?" wala sa loob niyang tanong. Bumaling siya kay Karl. "Sige na, umuwi ka na. Maaabutan ka na ng dilim sa daan," pagtataboy ni Gabriella kay Karl.

"Ok, 'bye. Kita tayo sa Lunes."

Tumango lamang siya.

Binuhay na ulit nito ang motor at marahang pinaandar paalis. Hinintay lamang ni Gabriella na makaliko ito sa kanto at marahan na niyang binuksan ang gate na gawa sa bakal. Malangitngit na ang gate nila gawa sa katagalan at luma na. Naisip niyang lagyan ng langis ang mga bisagra bukas para mabawasan ang ingay.

Mabagal ang lakad niya palapit sa bahay nila habang nakatingin sa sasakyan. Nananatiling nagtataka kung sino ang dumating na bisita.

Mukhang bago pa ang sasakyan na kulay crema. Tantiya niya ay kasya ang 7 pasahero sa loob nito.

Napatingin siya sa kanilang bahay na bungalow style na may kalumaan na din. Maliit lamang ang bahay nila na may sukat sigurong 50 square meters ang floor area pero may dalawang kwarto. Malawak ang bakuran nila na may sukat na 500 square meters. At sa likod naman ng bakuran nila ay ang malaking ektarya na bukurin na sinasaka naman ng kanyang Papang.

Ayon sa kanyang Mamang, si Mariella Joson, ang kanilang bakuran ay inaward sa Papang nya, si Gabriel Joson, bilang tenant at ang Papang niya ang magsasaka sa malaking ektaryang bukurin na iyon. Iisang tao ang may ari ng bakuran nila at ang ekta-ektaryang bukurin. Nabanggit din ng kanyang Mamang na matalik na kaibigan ng kanyang Papang ang may ari ng lupain.

Ang kanyang Mamang naman ay isang guro, ngunit napilitang magretiro sa edad na trenta'y otso dahil sa pagbubuntis sa kanya. Ilang taon nang kasal ang kanyang Mamang at Papang pero hirap ang mga ito magkaanak. Kaya naman nung mabuntis ang kanyang Mamang sa kanya ay mas pinili nitong magretiro na at sundin ang payo ng OB-Gyne. Hindi na rin pumayag ang kanyang Papang na magturo pa siya para makaiwas din sa stress.

Ngunit sadyang isang anak lamang ang pinagkaloob sa mag asawa. Siya, si Gabriella Marie Joson, disi-sais anyos. Nasa Forth year highschool at graduating na.

Sa ngayon ay pagluluto ng kakanin ang pinagkakaabalahan ng kanyang Mamang at ang mga kapwa teachers nito ang kadalasang costumer.

Nabalik ang atensyon ni Gabriella sa bandang hulihan ng sasakyan. Nabasa niya sa plaka na sa Quezon City pa ito nabili. Marahil ay taga Quezon City ang kanilang bisita, sa loob loob niya.

Tumuloy na siya sa loob ng bahay, ngunit pagbukas nya ng screen door ay wala siyang naabutang tao sa sala. Pero naririnig niya ang mga mahihinang boses na nag uusap na nanggagaling sa likod ng bahay nila.

Marahil ay nasa kubo nila ang mga bisita. May pinagawa ang Papang niyang kubo na gawa sa kawayan. Isang maliit na kubong pahingahan ng kanyang Papang. Kadalasan ay mas gusto pa ng kanyang Papang at Mamang na doon magpalipas ng maghapon at kung minsan ay doon na din natutulog.

Dumeretso siya sa kusina at sumilip sa maliit na bintana. Mula doon ay kita na niya ang mga tao sa loob ng kubo. At tama nga ang inisip niya. Andun nga ang bisita ng kanya mga magulang. Tatlo ang mga ito. Dalawang lalake at isang babae. Ang isang lalake ay halos kaedaran lang ng kanyang Papang bagamat maayos ang pananamit nito at maganda ang pangangatawan. Ang isa pang lalake at babae na mas bata ay tila magkasintahan naman. Magkasintahan nga dahil ang babae ay nakapalupot ang mga kamay sa braso ng batang lalake. Hindi nya masyadong mapintahan ang itsura ng mga ito dahil nahaharangan ng sala salang disenyo ng kubo. Ang Mamang at Papang niya ay hindi niya matanaw gawa nang may nakaharang na halaman sa pinuwestuhan ng mga ito.

Isang buntong hininga ang pinakawalan niya dahil hindi niya alam kung lalabas ba siya para malaman ng mga magulang niya na nakauwi na siya. Hindi pa naman siya nagugutom pero naisipan niyang buklatin ang kawaling nakalagay sa kakalanan nila.

Pag-angat niya ng takip ng kawali ay kaagad din niyang nabitawan ang takip dahil mainit pala ito. Mukhang kaluluto lang. Kukuha sana siya ng potholder ngunit nagulat ulit siya nang biglang bumukas ang screen door ng kusina at pumasok ang hindi pamilyar na bulto ng katawan ng tao. Malaking lalake ito. Malaki na siya sa 5'4" pero ang lalakeng ito ay tila higante sa tangkad. Marahil ay nasa six footer ang height. Malapad ang mga balikat na bumagay sa suot nitong plain white t-shirt at maong pants na nakahulma sa hita at binti.

Saglit lang ang pagkagulat na rumehistro sa mukha ng lalake nang makita siya. Si Gabriella naman ay hindi kagad nakakilos at tila na starstruck sa kaharap. Gwapo ang bisita nila. Hindi mestiso hindi rin maitim. Certified na lahing Pilipino, pero matangos ang ilong at ang mga mata ay tila matalim kung tumingin. Ang labi ay manipis na nagbigay dating sa lalaki ng pagkasuplado.

Ang lalake ay si Miguel Javier Mortiz. 26 year old. Batang batang Businessman at nakatira sa lungsod ng Maynila. Anak ng Business tycon na si Moises Mortiz, 60 yrs old, biyudo. Sila din ang namamay-ari ng lupaing sinasaka ng Papang ni Gabriella at ang bakurang tinatayuan nila.

Alumpihit na tumalikod si Gabriella para bumalik sa loob ng sala. Nakahiyaan na niyang batiin ang bisita at mukhang suplado.