Maagang gumising si Minggay kinabukasan. Naghilamos muna siya at saka inangat ang panaklob na nakapatong sa ibabaw ng lamesa upang tingnan kung may pandesal ba sa ilalim nito o kahit na anong puwedeng gawing pang-almusal.
Wala siyang nakita.Tulog pa ang mga kapatid niya at mukhang wala na naman silang makakain pagkagising kaya magtitiis na lang muna sila sa tig-isang takal ng kape. Kung tutuusin, bawal pa sa kanila ang ganoong inumin. Masyadong matapang ang kape para sa mga katulad nilang bubwit pa ang sikmura, pero mas maigi na raw iyon sabi ni Mama Linda. Mabuti na raw na kahit papa'no madampian man lang ng kahit kaunting init ang kanilang katawan sa umaga.Pagkalabas ng bahay, nakita niyang nakaupo ang Mama Linda niya sa pahabang bangko na nasa bakuran ng katapat na bahay. Sa tabi niya ang may-ari at nakatayo sa harap nila ang tatlo pang mga babae. Libangan na ng Mama Linda niya ang makipag-tsismisan tuwing umaga at hindi buo ang araw nito kapag hindi nakakasagap ng sariwang balita mula sa buhay ng ibang tao.Nahuli ni Minggay ang mama niya na may kinakain at sa kamay nito ang may kagat ng pandesal. Nang magtama ang kanilang mga mata, agad na sinubo ni Mama Linda ang natitira pang piraso ng tinapay at saka ito nilunok nang hindi man lang nginunguya. Ngitian niya si Minggay pagkatapos at si Minggay naman ay nagkibit-balikat na lang na kunwari ay hindi iyon nakita.Nilakad lang niya mula bahay hanggang sa palengke ng Villadolid. Maagang makaka-delihensya, maaga ring makakauwi. Nadatnan niyang maraming tao sa palengke noong mga oras na 'yon. Dali-daling nakihalo si Minggay sa daloy at humanap ng mabibiktima. May nakita siyang matandang babae at tinabihan niya ito."Magkano po isang kilo nito?" Tanong ni Minggay sa tindera. Kunwari ay bibili siya pero ang kaliwang kamay niya ay dahan-dahan nang gumagapang sa bag ng katabing matanda na abala sa pagkilatis ng mga isda."Eighty five isang kilo," sagot naman sa kanya ng tindera. Hindi rin nito pansin si Minggay dahil nasa iba pang mamimili ang atensyon nito.Sa wakas! Napitas na ni Minggay ang wallet ng matanda at agad niya iyong itinago sa ilalim ng suot na t-shirt. Lumakad siya palayo at nang makahanap ng ligtas na lugar, binuksan niya ang pitaka. Trenta pesos lang ang laman. Napabuntong-hininga na lang si Minggay. Ibinulsa niya ang pera at saka itinapon ang pitaka sa kanal.Bumalik siya ng palengke para kumulimbat ng mas malaki pang pera. Kulang ang trenta pesos pambili pa lang ng bigas. May natanaw siya sa 'di kalayuan. Matandang babae ulit na mukhang mayaman kung pagbabasehan ang suot nitong mga kumikinang na singsing at bracelet. Sa tabi nito ang katulong na naka-uniporme ng kulay light blue na siyang kasa-kasama ng matanda bilang taga-bitbit ng mga pinamili. Tangan din ng katulong ang bag ng mayamang matanda. Lumapit si Minggay sa tabi ng katulong."Ate, magkano po isang kilo nito?" 'ika ni Minggay sa tindera. Parehong tactic ulit kagaya ng sa nauna. Muling naglumikot ang kamay ni Minggay pagdikit sa hawak na bag ng katulong. Isa-isang gumapang ang mga daliri nito papunta sa zipper. Kasamaang palad nga lang, mas maagap ngayon ang tindera at agad nitong tinawag ang atensyon ng katulong."Miss, Miss, 'yung bag mo. Ingatan mo 'yan. Maraming kawatan dito," babala ng tindera. Napalingon naman ito sa bitbit na bag at naaktuhang nakasuksok ang kamay ni Minggay sa loob. Ni hindi man lang niya ito naramdaman noong una."Ay puke ka!" Napalakas ang boses ng katulong sabay bawi sa bag. Niyakap niya ito na parang isang sanggol. Nagsilingunan ang mga tao sa direksyon nila. "Ate, itong bata may kinukupit sa bag mo," sumbong nito sa amo."Uy, ano yan? Ba't nagnanakaw ka?" Sigaw ng kargador sa malapit na agad na inilapag ang buhat-buhat bloke ng yelo.Napa-atras si Minggay at saka siya tumalilis ng takbo. Hindi siya lumilingon kaya hindi rin niya alam kung may humahabol ba sa kanya. Hindi siya humihinto kahit na parang sasabog na ang dibdib niya sa hingal. Paulit-ulit kasing naririnig ni Minggay ang sinabi ng Mama Linda niya na hindi siya mapapiyansahan nito kung sakaling madakip siya.Nang masigurong niyang malayo na sa palengke ay saka lang siya huminto sa tapat ng isang lumang gusali. Napasandal siya sa dingding nito at nilanghap niya ang lahat ng hangin na puwedeng ipasok sa kanyang baga para ibsan ang pagod at kaba. Nang sandaling iyon, natanto niyang hindi na siya puwedeng bumalik sa palengke dahil namukhaan na siya ng mga taga-roon kaya naisipan na lang niyang umuwi sa kanila.Sa daan pa lang, sinalubong na siya nh bunsong si Caloy. Kinarga niya ito pauwi at nakitang nakaabang na sa may pintuan ng bahay nila ang kanyang ina-inahan."Asan na delihensya mo?" Nakasahod ang kamay ni Mama Linda.Ibinaba ni Minggay si Caloy at dinukot ang trenta pesos na nakaw. Napamulagat si Mama Linda. "Ano? Bakit ito lang?""Muntik na akong mahuli, Ma. Buti nga nakatakas pa ako," paliwanag ni Minggay. Hindi siya makatingin sa mata ng Mama niya dahil kahit siya parang nahiya sa kakarampot na perang inabot niya."Mamaya, mag-uusap tayo," sabay talikod ni Mama Linda tangay ang trenta pesos.+-+-+-+-+-+-+-+-+-Inaya ni Mama Linda si Minggay sa may fast food chain malapit sa kanila. Naroon lang sila sa labas dahil wala naman silang perang pambili ng pagkain. Doon napili ni Mama Linda na sabihin kay Minggay ang plano niya para hindi ito marinig ng nga kapatid niya. Umupo sila sa paanan ng streetlight na katabi ng restaurant."Mukhang pahina nang pahina benta natin du'n sa shabu. Tapos di ka na rin puwedeng mandukot dahil kilala ka na ng mga tao. Kung sa panlilimos naman tayo aasa, hindi tayo mabubuhay dahil pinapalayas na mga kapatid mo doon sa plaza, wala na tayo mapuwestuhan doon," ito agad ang unang sinabi sa kanya ni Mama Linda. "Kaya may ipapagawa ako sa'yo. Kapag ito nagawa mo nang tama, hindi na natin kailangan pang magnakaw ulit dahil kikita tayo dito ng tiba-tiba."Na-intriga naman agad si Minggay. Ni hindi na nito natanong kung bakit siya ang napili ng Mama Linda niya na kausapin para sa plano nito. "Ano 'yun, Ma?"Alam mo 'yung simbahan natin, 'di ba?" Tumango si Minggay at nagpatuloy si Mama Linda."Alam kong alam mo rin 'yung patron natin dito sa bayan natin - 'yung Mahal na Birhen ng Villapureza." Tumango ulit si Minggay tanda ng pagsang-ayon. "Ngayon, may nakapagsabi sa akin na 'yung korona ng mahal na birhen ay yari pala sa ginto at diamante. Ang gusto ko, kunin mo 'yung korona. 'Pag nakuha mo 'yun meron na agad akong buyer na bibili sa korona. Malaki-laki rin 'yung alok niya. Hindi na tayo magugutom. Hindi mo na kailangan magnakaw."Natulala sandali si Minggay. "Korona ng Mahal Na Birhen Ng Villapureza? Hindi po ba masyado naman yatang... mapanganib po 'yun. Buong bayan na ng ng Villapureza ang ha-hunting sa akin 'pag ganon. Saka bakit ako?""Huwag kang mag-alala," paniniguro sa kanya ni Mama Linda. Idinantay nito ang kaliwang kamay sa nakayukom na mga kamao ni Minggay. "Oras na makuha mo na ang korona, lalayas agad tayo sa bayang ito. Hindi na nila yun malalaman.""Ma, parang ayokong gawin. Natatakot ako.""Saan? Kanino? Sus! Ito namang batang 'to. Hindi ka ba naaawa sa mga kapatid mo? Tingnan mo nga, ang papayat na tapos hindi pa nakapag-aral. Kapag nabenta natin 'yung korona ng Mahal Na Birhen, makakaraos na tayo sa hirap." Nakangiti si Mama Linda habang kinakausap si Minggay. Na-i-imagine na kasi nito ang magiging buhay nila kung sakaling marami na silang pera.Hindi agad maka-kibo si Minggay. Parang ang dami biglang naglaro sa isip niya. "Bakit ako, Ma? Puwedeng iba na lang?""Ikaw lang ang puwede, anak. Hindi ka paghihinalaan sa itsura mo," giit ni Mama Linda. Kumpara kasi sa mga kapatid niya, mukhang hindi galing sa hirap si Minggay dahil sa makintab at tuwid nitong buhok na umaabot hanggang braso at mamula-mula nitong mga pisngi. Mga pisngi na tinernuhan ng singkit nitong mga mata, may katangusang ilong at makinis na kayumangging balat. Mas mukha siyang anak-mayaman na babad sa beach.Napalingon bigla si Minggay sa ingay na narinig niya sa kanyang likuran. Galing iyon sa isang pamilyang kalalabas lang ng fast food restaurant na masayang nagkukuwentuhan papunta sa kanilang sasakyan. Buong buhay ni Minggay, wala pa sa kanilang magkakapatid ang nakakapasok sa restaurant na iyon kahit halos araw-araw nila itong nadadaanan. Pangarap ni Minggay na maka-kain sila roon."Sige Ma. Kelan ba?"Hindi halos nakatulog si Minggay buong magdamag. Panay ang baling niya sa higaan. Natatakot ang puso niya pero sa isip niya, pagkakataon na ito para guminhawa ang buhay nilang lahat. Pagsapit ng alas-kuwatro ng madaling araw bumangon na rin siya at inihanda ang backpack na pagsisidlan niya ng korona ng Mahal Na Birhen. Pagkatapos, kumain na siya ng ininit na sopas na binili niya sa karinderya noong nagdaang gabi. Labis-labis ang kabog ng dibdib niya kahit walang iniinom na kape. Hindi lang kasi simpleng pagnanakaw ang gagawin niya. Hindi na rin siya nagpaalam sa mga kapatid at Mama Linda niya. Baka kasi mahirapan lang siyang umalis. Dumaan muna siya nang mabilisan kay Tangkad, ang kaibigan niyang puno para humingi ng proteksyon at gabay. Hindi niya alam kung bakit dito siya nanghihingi ng patnubay kaysa sa Diyos. Marahil ay mas dama niya kasi ang presensya at malasakit ng halaman. Ang punong iyon kasi ang natatangi niyang naging kanlungan."Tangkad, gabayan mo naman ako. Medyo delik
Hindi makakain nang maayos si Minggay. Bukod kasi sa nakatitig sa kanya si Father na para siyang organismong ino-obserbahan sa ilalim ng microscope, nasisilaw din siya sa kuwintas nito na may hugis susi na pendant. Bumabanda kasi ang liwanag ng araw dito papunta sa kanyang mata."Ay, sorry," nahihiyang sabi ng pari nang mapansin niyang panay ang kurap ni Minggay at saka niya ipinasok ang kuwintas sa loob ng kuwelyo.Father Antonio Komendador ang pakilala ng pari kay Minggay, pero Father Tonyo na lang daw ang itawag sa kanya. Siya ay isang 30 year old chinito na apat na taon ng naninilbihan sa simbahan at mahilig mag-jogging tuwing umaga o hapon. Maayos at pantay ang pagkaka-gel ng buhok ni Father Tonyo at ang mga ngipin nito, mukhang ikinula sa sobrang puti. Maraming babae ang nagkakagusto rito, pero nasa paglilingkod daw kay Hesus ang totoong misyon niya sa buhay."Ikaw, may pamilya ka pa ba? Saan ka nakatira? Teka, ilang taon ka na nga ulit?" Sunod-sunod ang tanong ni Father Tonyo h
Amoy baul ang mga damit na ibinigay kay Minggay. Hindi rin maiwasan dahil matagal nang nakatambak ang mga iyon sa bodega. Mga donasyon ng kung sino-sino para sa mga nasalanta ng bagyo at nasunugan na hindi na naipamahagi ng simbahan dahil kulang sila sa tao. Pero ayos pa rin ito sa kanya dahil siguradong mawawala din ang amoy ng mga ito kapag nalabhan na.Hanggang ngayon hindi pa rin makapagdesisyon si Minggay kung tama ba na manatili pa siya sa simbahan. May pamilya siya sa labas na malamang hinahanap na siya. Ang usapan nila ni Mama Linda, kukunin lang niya ang korona at pagkatapos sisibat na siya. Pero halos makalimutan niya ang buhay niya sa labas ng simbahan nang mabusog siya sa sobrang sarap ng tanghalian nila kanina. Lechong kawali na may dalawang sawsawan: gravy at toyomansi. Tapos sinigang na baboy ang sabaw niya na may panghimagas pang leche flan at puto. Siguro iyon ang unang beses na nabusog nang ganoon si Minggay sa tanang buhay niya.Ang higaan niya ngayon ay isang malam
Ito ang unang gabi ni Minggay sa Casa Del Los Benditos at unang beses niyang matutulog sa isang napakalambot na kama na may malambot at mabango ring mga unan. Dito hindi na rin niya kailangan mag-electric fan. Bubuksan lang niya ang mga bintana at siguradong dadaloy ang sariwang hangin galing sa hardin ng simbahan.Pagkaligo, isinuot ni Minggay ang isang pinaglumaang pajama na may disenyo ng mga oso at sorbetes. Medyo masikip ang pajama pero masaya si Minggay dahil para siyang bumalik sa pagkabata. Dati, kung anong suot niya sa buong araw, iyon na rin ang suot niya sa pagtulog. Wala kasi siya masyadong damit. Isa pa, mabuti na rin daw iyon para makakatipid sila ng tubig sa paglalaba sabi sa kanya ni Mama Linda."Hay, sana nandito kayo," sambit ni Minggay sa sarili. Nakatingin siya sa kisame at nakikita ang mukha ng mga kapatid niyang gutom na gutom. Dasal niya na sana huwag silang pabayaan ng nanay nila.Unti-unti, bumibigat na ang kanyang mga mata. Maya-maya pa, humikab siya at tuluy
Napahawak si Minggay sa pader paglabas niya ng bahay. Nagulat siya sa inasal ng pari. Nanginginig ang laman niya sa hiya at galit. Bakit ganoon na lang ang naging reaksyon sa kanya ni Father Eman? Hindi naman niya sinasadya na mabunggo ito. Para kasi kay Minggay, ang mga pari ang dapat na maging ehemplo ng kahinahunan at kabutihang asal. Malayong-malayo si Father Eman kay Father Tonyo na siyang kabaliktaran nito. Napabuntong-hininga na lang tuloy si Minggay at tinungo si Mary Beth at Lila sa simbahan gaya ng iniutos sa kanya."Oh, bakit ka nandito?" Tanong sa kanya ni Mary Beth na abalang nagtitistis sa mga tunaw na kandila sa altar."Eh, si Father Eman kasi. Nagalit sa akin," nahihiyang sagot ni Minggay. Kinuha niya ang isang basahan na nakalagay sa balde at nagsimulang punasan isa-isa ang mga santo."Bakit naman? Nagkita na pala kayo?" "Oo, nakilala ko na rin siya. Hindi kaagad maganda una naming pagkikita. Nabunggo ko kasi siya pero 'di ko naman sadya 'yun. Ilang beses na nga ako
Nakaupo sa magkabilang dulo ng lamesa sina Father Eman at Father Tonyo. Alas tres na ng madaling araw at nasa loob sila ng meeting room sa unang palapag. "Itigil mo na ang kahibangang ito, Father Tonyo. Sa malao't madali may makakadiskubre sa mga ginagawa natin at kapag nangyari 'yun katapusan na na nating lahat," mahinahon ang boses ni Father Eman. Sa harapan niya ang isang bote ng red wine na nangangalahati na ang laman. Nitong mga nagdaang mga buwan napapadalas ang kanyang pag-inom."Itigil ang alin, Father Eman? Ginagawa ko lang naman ang huling habilin sa atin ni Father Greg. Sa akin niya ipinagkatiwala ang misyon. Alam mo naman siguro ang mangyayari kung hindi ko pinagpatuloy ang sinabi niya. Matinding trahedya ang dadanasin ng mundo kung hindi natin susundin ang mga sinabi niya. Alam kong alam mo 'yan dahil kinausap ka rin niya bago siya mamatay." Hindi direktang nakatingin si Father Tonyo kay Father Eman habang nagsasalita. Abala kasi ito sa pagpirma ng mga liham na ipapadala
Apat na araw na ang lumipas at hindi pa rin nagpapakita sa kanila si Mr. Aragon, ang tutor nila Mary Beth, Lila at magiging tutor na rin ni Minggay. Pero tumawag ito kay Father Tonyo at sinabing hindi muna siya makakabiyahe dahil tinamaan siya ng trangkaso. Kaya naman naisipan na lang ng pari na isama si Lila at Minggay sa Sanctuary Of The Abandoned Elders para magpamahagi ng mga donasyon mula sa mga parokyano at maninimba. Si Mary Beth naman ay naiwan para maglinis ng mga altar sa simbahan.Umarkila sila Father Tonyo ng jeep. Medyo dagsa rin kasi ang mga donasyon nitong nakaraang tatlong buwan at hindi nila ito napamahagi noon dahil nga kapos sila sa tao. Lima sila sa loob ng jeep. Sa unahan, nakaupo sina Father Tonyo katabi si Manong Jerry na hardinero at ang driver. Sa likod naman, nakasiksik sina Minggay at Lila kasama ang mga sako-sakong lumang damit, unan, kumot at adult diapers. Papunta sila sa Isabela kung saan nakatayo ang sanktwaryo.Tatlong oras din ang iginugol nila sa biy
Maigi na lang at hindi nag black out sa buong sanctuary. Sumabog lang ang mga fluorescent lamps sa ceremony hall pero hindi nito naapektuhan ang daloy ng elektrisidad sa buong pasilidad. Lumipat sila sa isa pang bulwagan, pero mas maliit ito doon sa mas naunang pinagdausan nila ng programa."I'm so sorry. That will be the end of our presentation and program today," paliwanang ni Ate Mira sa mga matatanda at staff na mukhang nahimasmasan na. Ang grupo naman ni Father Tonyo, nasa isang sulok, nalilito pa rin sa kung ano ba talaga ang nangyari."I think, kailangan na natin magpaalam sa kanila." Kalmado si Father Tonyo sa kabila ng napunit na manggas nito dahil sa pagpupumiglas ng lolo na binuhat niya kanina.Kinausap ni Father Tonyo si Ate Mira at sila ay nagkamayan. Pinagmamasdan ni Minggay ang nagwalang lolo at nakita niya itong mistulang bata na nakatalungko sa ilalim ng lamesa. Wala itong bukambibig kundi, "Kinuha nila si Binoy. Kinuha nila si Binoy. Kinuha nila si Binoy." Pagsakay