Chapter 04

“KUYA, PLEASE. Hayaan niyo na muna kami ni Harrison. Alam kong masakit para sa kanya ang nangyaring kasal sa pagitan namin dahil may mahal siyang iba. Sa akin, walang problema, dahil mahal ko siya, kuya. Kaya hindi ako umatras nung pinakiusapan niya ako. Unfair lang talaga sa side niya ang nangyari, kaya naiintindihan ko ang pinanggagalingan ng galit niya,” pagdepensa niya sa asawa.

Tanging mga kapatid niya lang ang nakakaalam sa bagay na iyon. Ang akala ng kanilang mga magulang ni Harrison ay maayos ang pagsasama nila, hindi kasi nila ipinapakita ang tunay na estado ng kanilang relasyon kapag nasa harapan sila ng mga magulang. Umaarte sila na para bang tunay na nagmamahalan.

“Sana balang araw ay matauhan ka rin at iwanan mo ‘yang gagong lalaking ‘yan! Hindi ko lang siya magalaw-galaw dahil sa’yo!” galit ding sabat ni Kristoff.

Naputol lang ang panenermon ng dalawang kapatid niya nang dumating sa sala ang kanilang mga magulang.

“Ano ba ang pinagtatalunan niyo, ha? Dinig na dinig namin ng daddy ninyo ang mga boses niyo sa kusina, hindi lang namin maintindihan!” ani ng ina nila.

“Ewan namin diyan, mommy. Sa bunso n’yo na lang po kayo magtanong. Alam naman niya ang sagot,” supladong tugon ni Kieran sa kanilang ina. Pagkasabi niyon ay tumalikod na ito at naglakad palayo.

Sumunod ding umalis si Kristoff.

“’Yang bunso n’yo, may utak naman, pero ewan ko kung bakit iba ang pinapairal,” sabi nito bago tuluyang lumayo.

Napatingin sa isa’t isa ang mag-asawa, kapwa nagtataka kung bakit tila parehong may galit sa kanya ang dalawa niyang kuya.

“Kaelin, anak,” mahinahong tawag ng ina sa kanya. “May hindi ba kayo pagkakaintindihan ng mga kuya mo? Tungkol saan ba iyon? Nagtataka lang kami dahil parang pinagkakaisahan ka nila, eh, alam naman naming mahal na mahal ka ng dalawa.”

Ngumiti si Kaelin para pagtakpan ang nararamdaman.

“Naku, huwag na po kayong mag-alala, Mom. Maliit na bagay lang po iyon. Mapag-uusapan din naman namin mamaya,” pagdadahilan niya.

“Kaelin, nasaan ang asawa mo? Napapansin ko yata, bawat dalaw mo rito sa mansyon, ni hindi mo man lang siya isinama ni isang beses sa loob ng tatlong taon ninyong pagsasama?” tanong naman ng kanyang ama.

Napakagat siya sa ibabang labi. Wala talagang katapusan ang pag-iisip niya ng mga dahilan para lamang mapagtakpan ang kanyang asawa sa tuwing may magtatanong tungkol dito sa kanyang pamilya.

“Alam niyo naman po kasi si Harrison, Dad. Masyado siyang workaholic. Kaya hindi ko na rin siya pinipilit. Ayoko rin kasi siyang maistorbo,” pagdadahilan niya.

“Ito talagang bunso natin, sobrang bait! Kaya kahit hindi sila magkarelasyon dati ni Harrison ay pinakasalan siya,” anito sa kanilang ama. “Kaya gustong-gusto talaga namin ng daddy mo ang batang iyon para sa’yo, anak.”

Napayuko siya sa tinuran ng ina. Kung alam lang ng mga ito kung ano ang sinasapit niya sa poder ni Harrison.

***

“ATE NICAAAAA!” masayang sigaw ni Hailey nang makitang kasama niya ang dalaga.

“Hi, Hailey! I missed you!” sambit ni Veronica sabay halik sa pisngi ng kanyang kapatid.

“Mabuti naman at naisipan mong sumama kay Kuya rito! Magpapatulong kasi akong maghanap ng dress para sa gaganaping party sa school namin!" excited na sambit nito.

“Oo ba, walang problema! Iyon lang pala. At saka, kaya nga ako sumama rito ay para sa’yo. Gusto kitang maka-bonding. Remember? Kapatid na rin ang turing ko sa’yo!” ani Veronica.

“But wait,” saad muli ni Veronica. “I have a gift for you! Galing pa ‘yan sa Paris!” masayang sambit nito habang iniaabot sa kapatid niya ang isang may kalakihang paper bag.

“Really? Is this really mine?!” namilog ang mga mata ni Hailey sa sobrang tuwa.

Pagkaabot ng paper bag ay agad nitong binuksan iyon.

“Is this a gown?!” namamanghang tanong nito. “Hindi ko na pala kailangang magpatulong sa’yo na humanap dahil puwede na ito! Ang gandaaa! Thank you, Ate Nica! You’re the best!”

Masayang-masaya siya sa tuwing nakikita niyang magkasundong-magkasundo ang dalawa.

Close rin siya sa kanyang kapatid, kaya ito lang ang nakakaalam sa kanilang pamilya sa tunay niyang nararamdaman.

“Mukhang masaya na kayo rito. Iiwan ko na muna kayo, ha? Hahanapin ko lang sina Mom and Dad,” paalam niya sa dalawa.

“Yaya, where’s Mom and Dad?” tanong niya sa nadaanang katulong.

“Nandoon po sila sa garden, Sir,” sagot nito.

Mabilis siyang lumabas at tinungo ang likod ng mansyon. Natagpuan nga niya roon ang kanilang ama at ina, na mukhang seryosong nag-uusap.

“Mom, Dad!” tawag-pansin niya sa dalawa.

“Harrison, anak! Nandiyan ka pala! Si Kaelin, kasama mo ba?” tanong ng kanilang ina.

“Hindi po, eh. Pero narito si Veronica. Siya ang kasama ko sa pagpunta rito,” sagot niya.

“Harrison, dapat ang asawa mo ang isinasama mo rito kapag umuuwi ka, hindi si Veronica. Si Kaelin ang asawa mo. Ano na lang ang sasabihin nina Carmela at Konrad kapag nalaman nilang ibang babae ang isinasama mo rito?” sita sa kanya ng ama.

Lihim siyang napatiim-bagang. Si Veronica na nga ang isinama niya, ang babaeng iyon pa rin ang hinahanap ng mga ito?

“Dad, nagkataon lang po na sumama si Veronica dahil may ibibigay siyang regalo kay Hailey,” kalmadong sagot niya. “Si Kaelin naman po, baka umuwi rin sa kanila.”

May sakit sa puso ang ama niya. That’s why kinailangan niyang sundin ang mga gusto nito, kahit labag sa kanyang kalooban.

Hindi maganda ang lagay ng puso nito, kaya pinag-iingat sila ng doctor. Hindi ito puwedeng magalit, malungkot, o mabigla.

Kaya naman siya ang sumasalo sa lahat ng pagdurusa, huwag lang itong mapahamak.

“Umuwi rin? Anong klaseng sagot iyan, Harrison?” mataas ang boses na tanong nito. “Asawa mo si Kaelin at nakatira kayo sa iisang bubong, pero mukhang hindi ka sigurado kung saan siya pumupunta!”

Agad itong dinaluhan ng kanilang ina upang pakalmahin. Pati siya ay nataranta.

“Huwag kang mag-alala, Dad. Sa susunod na pag-uwi ko rito, isasama ko na siya.”

“Aba’y dapat lang! At isa pa, bigyan n’yo na rin kami ng apo ng mommy mo! Tatlong taon na kayong mag-asawa, pero hanggang ngayon ay wala pa rin!” sambit pa nito.

“Hindi pa siguro kami pinagbibigyan ng pagkakataon, Dad, kaya wala pa. Darating din ang hinihingi ninyo, Dad. Hindi pa nga lang sa ngayon,” kalmado pa ring sagot niya kahit gustong-gusto na niya itong sagutin nang pabalang.

Siya? Magkakaanak kay Kaelin? No way! Iyon yata ang hinding-hindi niya kayang sundin sa lahat ng gustong iutos nito sa kanya.

Si Veronica lang ang magiging ina ng mga anak niya, wala nang iba pa.