KABANATA 6

Nakarating sila sa malawak na golf field na pagmamay-ari ng Xian Family. Kasama ni Caramel sina Fourth at Don Primero sa pagpunta sa kinaroroonan ni Ling Xian, na abala sa seryosong paglalaro ng golf. Kumalat naman sa paligid ang mga bodyguard bilang dagdag na seguridad sa lugar.

“Ling, how are you?” bati ni Don Primero kay Ling Xian habang papalapit siya rito.

“I’m feeling well, Primero,” tugon naman ni Ling Xian na agad ding yumakap sa kaibigan. Matapos iyon ay nakipagkamay rin si Fourth, na may paggalang, sa matalik na kaibigan ng kanyang ama.

“Mabuti naman at pumayag si Fourth na pumunta rito. Excited na akong makita silang magkasama ni Feng,” natutuwang pahayag ni Ling Xian habang nakatingin sa kanyang kumpare. Pilit naman na ngumiti si Fourth, halatang may pag-aalinlangan na makita ang matanda.

“Where’s Feng?” tanong ni Don Primero habang inililibot ang paningin sa paligid upang hanapin ang inaanak.

“Ayon siya, nag-eensayo,” sagot ni Ling Xian sabay turo sa anak na kasalukuyang humahawak ng katana at abala sa sparring session.

Agad namang naging interesado si Caramel sa laban ng dalawa. Masyado lamang itong malayo para makita nang malinaw ang mukha ng nag-eensayong babae, lalo’t nakatalikod pa ito mula sa kanilang direksyon.

“Tara, doon tayo,” aya ni Ling Xian, kaya’t agad silang nagtungo sa direksyon ng sparring area kung saan naroon ang dalawang naglalaban gamit ang katana.

Habang papalapit, napahanga si Caramel sa bawat kilos ng babae. Napakaliksi nitong gumalaw, eksakto at maingat ang bawat bitaw at pag-atake nito. Kitang-kita na bihasa ito sa sining ng pagkikipaglaban gamit ang espada.

“Ang galing niyang humawak ng katana, Fourth. Mukhang kaya niyang hatiin ang katawan mo kapag nagpasaway ka sa mapapangasawa mo,” palihim niyang bulong kay Fourth habang nanonood. Sinamaan lamang siya ng tingin ng bakla.

“Feng,” tawag ni Ling Xian sa anak pagkarating nila sa mismong sparring ground.

Agad na huminto sa kanilang labanan ang dalawa at hinarap si Ling Xian upang magbigay galang. Nang iangat ng babae ang kanyang mukha, doon lamang napagtanto ni Caramel kung sino ito. Kilala niya ang babae at halata rin nitong namukhaan siya, sapagkat bigla itong ngumisi.

Biglang kumulo ang dugo ni Caramel. Naiirita talaga siya sa tuwing nakikita ang pagmumukha ni Satoh, ang mayabang niyang dating comrade sa Supreme Intelligence Agency.

Ngayon lamang niya nalaman na Feng pala ang tunay nitong pangalan. Mapa-misteryoso pa kasi ang gaga, ayaw ihayag ang tunay na pangalan sa ahensiya.

Lumapit ang ka-sparring ni Feng upang kunin ang hawak nitong espada, nagbigay galang, saka tahimik na gumilid.

“Hi, Fourth!” bati ni Feng kay Fourth sabay lapit at halik sa pisngi ng binata.

Siguradong sigurado si Caramel na nandidiri ang baklang katabi niya sa halik na iginawad nito, halatang pilit lamang ang kilos, ngunit ayaw ipahalata dahil naririto ang ama nito

“Caramel, long time no see,” baling ni Satoh sa kanya. Isang pekeng ngiti lang ang iginanti niya rito, kasabay ng pagpigil sa sarili na hindi mairapan.

“Bakit kasama siya rito?” tanong ni Satoh habang nakakunot-noo at pasimpleng turo sa direksyon ni Caramel.

“She is Fourth’s new bodyguard,” maiksing sagot ni Don Primero, diretsong tumingin sa inaanak.

Napatango si Satoh at agad siyang pinasaringan ng tingin mula ulo hanggang paa, na tila ba isang hindi kapani-paniwala at kalokohang desisyon na ginawa siyang bodyguard ni Don Primero para bantayan si Fourth. Napaismid naman si Caramel at hindi nagpatalo kay Satoh.

“Why you hired her as Fourth’s bodyguard, Ninong? Marami ka namang pagpipilian na mas magaling pa kaysa sa kanya,” may bahid ng pangmamaliit ang tanong ni Satoh. Naningkit ang mga mata ni Caramel ngunit pinili niyang maging kalmado.

“Naniniwala akong magaling si Caramel pagdating sa pagprotekta sa anak ko,” tugon ni Don Primero, mariing ipinagtatanggol ang kanyang piniling tauhan.

“Oh, really? Ikaw pa lang ang taong narinig ko na naniniwala sa kanya na magaling siya,” tugon ni Feng na may kasamang ngiti ng pang-uyam.

Medyo natawa si Fourth sa narinig, kaya agad siyang sinuklian ni Caramel ng isang matalim na tingin na parang bumubulong ng... "Tumawa ka at makakatikim kang buwisit ka."

“Feng, I have something to tell you in private. Can we talk privately?” sabad ni Fourth, pilit binabago ang usapan.

“Of course, but maybe later. Hindi kasi ako pinagpawisan sa ensayo ko kanina kaya gusto kong makalaban si Caramel,” sagot ni Feng na halatang may kayabangan sa tono.

“Kung matatalo mo ako, paniguradong kaya mong protektahan ang mapapangasawa ko. Ngunit kung hindi, dapat kang palitan at mag-focus ka na lang sa computer, para naman gumaling ka kahit sa pagbusisi ng system,” dugtong pa nito na mas lalong nagpainit ng ulo ni Caramel.

Gaga! Ang yabang talaga!

“Why not?” matapang na sagot ni Caramel. Napatingin si Fourth sa kanya, halatang hindi inaasahan ang tapang ng bagong bodyguard niya.

“Walang mangingialam sa laban namin,” paalala ni Feng sa mga alipores na naroon. Naging interesado rin ang dalawang business tycoon sa magiging laban ng dalawa.

Nasa gitna sila ng field, at tinatayang tatlong metro ang distansya nila sa isa’t isa. Samantala, ang iba ay nakapuwesto sa gilid, handang panoorin ang eksena. Nagbigay ng senyas si Feng sa lalaking may hawak ng dalawang espada. Magalang nitong iniabot ang isa kay Satoh Feng, at ang isa naman ay inabot kay Caramel.

Hindi siya ganoon kasanay sa espada. Mas bihasa siya sa paghawak ng baril dahil iyon ang kanyang main weapon. Ngunit kahit ganoon ay hindi siya uurong sa labanan. Kailangan niyang ipakita na kaya niyang protektahan si Fourth.

Hinugot niya ang espada at ibinigay ang takip nito sa lalaki, ganoon din ang ginawa ni Satoh. Pumuwesto siya sa laban, habang si Satoh naman ay tuwid lamang na nakatayo, relax na relax na parang hindi seryoso.

Siya ang unang sumugod. Ngunit napakabilis ng kamay ni Satoh at agad nitong nasangga ang kanyang atake. Sunod-sunod ang kanyang mga galaw—kaliwa, kanan, taas—baba pero walang kahirap-hirap na nasasagang ang bawat bawat pag-atake niya.

Sa huling pagsugod niya ay isang matatag na depensa ang pinakawalan ni Feng. Tumalbog ang espada niya at bumagsak sa damuhan. Itinutok pa nito sa kanya ang matulis na dulo ng hawak nitong espada at tila nagdeklara ng panalo.

“Weak,” pangungutya ni Feng.

Napalingon siya kay Fourth na mas lalo lang niyang kinapundi ng makita nitong... pumalakpak pa.

Sarap gilitan ng leeg ni Fourth. Halatang kontra sa kanya.