Tanner's Story Description

Scholar ng mag-asawang sina Scarlett at Darius Aldama si Eloise Gutierrez simula high school hanggang sa makapagtapos siya ng kolehiyo. Malapit siya sa pamilya Aldama dahil ang ama niya na si Greg ang nagsisilbing kanang-kamay ni Darius Aldama. Sa mansyon na rin ng mga Aldama nagkaisip at lumaki si Eloise. Bata pa lang siya ay crush na crush na niya si Tanner, ang anak nina Scarlett at Darius. Walong taon ang tanda ni Tanner kay Eloise pero para sa dalaga, perfect age gap iyon. Sa loob ng matagal na paninirahan niya sa mansyon, mas lumalim pa ang pagtingin niya kay Tanner, ngunit tinitingnan lang siya nito bilang isang nakababatang kapatid na madalas asarin. Walang kaalam-alam si Tanner sa tunay na nararamdaman ni Eloise, kaya naman nagpasya ang dalaga na mahalin na lamang siya mula sa malayo.

Samantala, nasa kay Tanner na ang lahat ng katangiang hinahanap ng isang babae sa lalaki. Matalino, mayaman, gwapo, at isang matagumpay na businessman. Ang tanging kapintasan lang niya ay ang pagiging babaero. Linggo-lingo siyang nagpapalit ng karelasyon, at kahit sa opisina ay nagdadala rin siya ng babae. Dahil sa bisyong ito, nalagay sa panganib ang kanyang buhay nang makasama niya sa kama ang asawa ng isang kilalang underground boss. Mabuti na lamang at nakaligtas si Tanner, bagaman halos isang linggo siyang nanatili sa ospital para magpagaling ng mga natamong sugat.

Sa sobrang pag-aalala ni Scarlett Aldama para sa anak dahil sa banta ng kalaban, pinilit niyang ipakasal si Tanner kay Eloise para sa proteksyon nito. Pumayag si Eloise para sa kaligtasan ni Tanner, at dahil na rin sa pagkakataong mapalapit sa lalaking lihim niyang minamahal. Bagama't labag sa loob na sumang-ayon si Tanner, nakiusap siyang panatilihing lihim ang kanilang kasal.

Paano kaya tatakbo ang kanilang relasyon lalo na’t magsisimula na ring magtrabaho si Eloise sa kumpanya ni Tanner bilang bago nitong secretary? Posible pa kaya ang pag-ibig sa gitna ng ganitong sitwasyon?