3: MAMA

Kim’s POV

“Oh anak! May bisita ka pala!” Sabay kaming tumayo ni Dylan. Pero lumapit siya kay Mama at kinuha iyong bitbit niyang grocery bag, “Ay, salamat, hijo! Napakagentleman mo naman.”

“Mano po.” Kinuha niya ang kamay ni Mama at saka nagmano.

“Aba! Sa wakas, may naiuwi kang matinong tao dito, anak! Sawang-sawa na ako sa pagmumukha ni Jixxer eh, ni hindi na nagmamano sa akin iyon.”

Sumilay ang kakaibang ngiti sa mga labi ni Dylan, “Actually, Mama…”

“Hoy! Mama ka dyan!” suway ko sa kanya.

“I’m her boyfriend po.”

Heto na naman. Napahawak ako sa dibdib ko. Parang gustong lumabas ng puso ko at kumaripas ng takbo.

Hinawakan siya ni Mama sa noo, “Sigurado ka ba diyan, hijo? Baka naman masama ang pakiramdam mo. May mga gamot kami diyan.”

“Hahaha, you’re funny, Mama. No wonder why Kim has a good sense of humor.”

Hindi ko talaga akalaing may ganitong side pala si Dylan. Kapag nasa office kasi kami, swerte na kung marinig mo siyang magsalita ng higit sa tatlong sentences sa loob ng isang araw. Pero ngayong kaharap niya si Mama, para siyang sinapian. Napakadaldal at bolero niya!

“Uuwi ka na ba agad? Dito ka na magdinner. Gusto pa kita makilala.”

“Ma, huwag na po.”

“I have things to do po eh. Don’t worry, Tita, I’ll be back po. Next time I’ll bring pasalubong.” Magalang pa siyang nagmano ulit para magpaalam na.

“Ay naku, ‘wag na! Yung maging girlfriend mo lang ang anak ko, okay na okay na ako doon. Akala ko kasi wala na talagang pag-asa ito eh.”

“Wow ah? Na para bang wala ako rito sa gilid ninyong dalawa?” reklamo ko.

“Hahaha. Ang cute mo talaga kapag napipikon ka.” Ginulo niya pa ang buhok ko. Hala! Itong Dylan na ito, plastik! “Pano babe? I’ll see you at the office tomorrow.”

“Ok sige–awww! Bakit ba kayo naniniko?” reklamo ko kay Mama.

“Maging sweet ka naman ano ka ba?!”

“Hahaha! It’s okay Mama, I like her just the way she is.” Nalaglag ang panga ko nung kumindat pa siya sa akin.

Teka! Parang hindi ako papayag na siya lang ang may best acting award!

“Sige na umuwi ka na, mukhang uulan oh. Tawagan mo ako kapag nasa bahay ka na ha?” Lumapit ako at akmang hahalik sa pisngi niya nang biglang…

TSUP!

Humarap siya sa akin at sinalo ng labi niya ang halik ko!

“Yiiieee! Ang sweet niyo naman, bigyan niyo na ako ng apo!”

“See you, babe. Thanks for the kiss.” Kinindatan niya pa ako bago siya tuluyang umalis.

Ang first at second kiss ko, ninakaw niya!

Nang tuluyang makaalis si Dylan ay panay ang pang-iinterogate sa akin ni Mama. Pero tinakasan ko siya at saka nagkulong sa kwarto. Panay ang check ko sa cellphone. Pero ilang oras na ang lumilipas ay wala pa ring paramdam si Jixxer. Sinubukan ko rin siyang tawagan at itext pero walang sumasagot.

Nagalit ba talaga siya dahil hinalikan ako ni Dylan?

Bakit ganon? Kinikilig at kinakabahan ako at the same time.

KINABUKASAN

Inagahan ko ang pagpasok. Nagsuot ako ng black dress na medyo maikli at walang manggas. Sinuot ko rin ang itim na ponytail wig na ibinigay ni Rowan.

Pagdating ko sa office ay sinalubong agad ako ni Brent.

“Nice one Dimagiba! Ayos ang outfit, chikababes na chikababes! Ano? Payag ka na bang makipag blind date sa kaibigan ko?”

“A-aahh a-ano kasi…”

“Good morning babe.” Isang kamay ang humagod papunta sa bewang ko. At nang lumingon ako ay sinalubong ako ng napaka-gwapong ngiti ni Dylan.