Chapter >> 5

"S-sir, pasensya na po, pero... hindi po talaga namin makita si Master Luke sa mga CCTV footage," nakayukong dispensa ng head guard ng mga Montevalle.

Galit na hinampas ni Xavius ang mesa sa kanyang study. "Mga walang silbi!" Nahulog ang ilang dokumento na agad dinampot ng matandang Butler.

"S-sorry, Sir. Tingin ko po ay sinadyang iwasan ni Master Luke ang mga CCTV camera hanggang sa makaalis siya ng mansiyon."

"Puro kayo excuses! What's the use of hiring you?"

"Sir... kung meron mang dapat managot sa nangyari, ako po 'yun."

Nahilot ni Xavius ang kanyang noo. "No, Butler Greg. Hindi n'yo po kasalanan."

"Hindi po, Sir, dahil ako po ang inatasan ni Miss Maureen na mag-asikaso sa little master. Pero nang sabihin niya sa akin na siya na lang daw ang mag-aasikaso sa sarili niya ay iniwanan ko na siya."

"Si Maureen?" pagtataka ni Xavius. "Nagpresinta siya na siya na ang mag-aasikaso kay Luke para mawala ang sumpong ng bata sa kanya, 'yun pala ay ipapasa din niya sa iba?" Tumayo siya. "Should I ask her for an explanation?"

Hindi pa man siya nakakahakbang ay biglang dumating ang isa sa mga guwardiya nila sa mansiyon, nang may kasama. "Sir, ito po 'yung guwardiya sa katabing villa. Ang sabi niya ay may bata daw po na nahagip ng CCTV nila." At iprinisinta niya ang na-record ng CCTV camera.

Kinuha ni Xavius ang USB at isinaksak sa kanyang laptop. Doon ay nakita niya kung paano pumuga ang panganay sa kanyang kambal sa gitna ng gabi; kinuha nito ang isang itim na kumot sa backpack nito at itinalukbong sa kanyang sarili, pagkatapos ay nakayuko itong pumuslit nang nakadikit sa pader.

Mahinang nagtawa si Xavius. "He's really my son..." Biglang kumulimlim ang kanyang mukha. "Lucas Knox, when I see you, pamamagain ko talaga ang puwit mo sa palo!"

Sa tulong ng iba pang CCTV footage na nakalap nila ay na-trace din nila kung saan nagtungo ang bata. "Valderama Residence? Sa bahay nila Maureen? Ano naman ang ginagawa ng batang 'yun doon?"

Kahit malalim na ang gabi ay nagtungo pa rin si Xavius kasama si Butler Greg at ang ilang bodyguards sa bahay nila Maureen.

.

.

Nang makauwi si Maureen galing party ay nakasimangot ito dahil hindi niya nagawa ang plano niya. Nagkagulo kasi nang matuklasang nawawala si Lucas. Pagkatapos ay dinatnan pa niyang pinagagalitan nang matindi ng kanyang ama ang kanyang ina.

Nalaman na kasi ni Victor na nagising na pala si Alfea, ngunit ngayon lang niya nalaman makalipas ang anim na araw. Nagalit ito sa kanyang asawa dahil nung una pa lang ay tinatawagan na pala ito ng ospital ngunit hindi nito sinasagot, at patuloy itong hindi sumasagot hanggang sa ikaanim na araw. Kung hindi pa sila sinadya ng hospital staff sa kanilang bahay ay hindi pa niya malalaman ang nangyari. Ngayon, ang problema ay nawawala si Alfea at hindi niya alam kung saan ito hahanapin.

"Nakainis! Bakit parang simula nang magising si Alfea ay gumulo na lahat? Sana talaga, hindi na siya nagising, eh." Maktol ni Maureen sa kanilang terrace. Natigilan siya nang makita ang pagdating ng tatlong magagarang itim na kotse. Nagningning ang mga mata niya dahil alam niya kung kanino ang mga iyon. "S-si Xavius! Bakit siya nandito? Teka nga..." At dali-dali niya itong sinabi sa kanyang mga magulang.

"Ano? Nariyan si Xavius? Naku, hindi kaya nagparito siya para sa'yo, anak?" excited na hinuha ni Dolores. "Dali, mag-ayos ka! Huwag kang bababa nang hindi ka maganda, ha!" At ipinagtulakan niya si Maureen sa kwarto nito.

"Magandang gabi, Mr. Montevalle..." bati ni Victor. "Pasensya na at hindi kami nakapunta sa party ng kambal." Hindi sila nakapunta mag-asawa dahil sa problema nila kay Althea.

"Ayos lang, Mr. Valderama... Didiretsuhin ko na kayo sa isinadya ko—"

"Sandali lang, Xavius. Pababa na si Maureen. Hintayin mo na lang," nakangiting putol ni Dolores.

Kumunot ang noo ni Xavius. "Hindi po si Maureen ang ipinunta ko."

Napahiya ang assuming na ginang. Napalitan ng pagngiwi ang ngiti nito. "G-ganun ba?"

"Nandito po ba si Luke?"

Nagkatinginan nang may pagtataka ang mag-asawa. "Si Luke? Wala, wala siya dito."

Nagtaka si Xavius at napaisip nang malalim. "Puwede ko po bang makita ang CCTV footage n'yo sa labas nitong villa?"

Nang i-review ni Xavius ang CCTV footage, hindi lang siya kung hindi maging sila Dolores at Victor ay nagulat din nang makita doon ang kanilang hinahanap. "S-si Alfea iyan, ah? Nanggaling pala siya dito kanina?" pagtataka ni Dolores.

"Kung ganun, saan kaya siya nagpunta?" ani Victor.

Nagsalubong ang mga kilay ni Xavius habang pinanonood ang naging interaksyon ng dalawa sa video. Naikuyom niya ang kanyang mga kamao.

"Xavius, paano natin malalaman kung nasaan ang anak at ang apo ko?" pag-aalala ni Victor.

"Huwag po kayong mag-aalala, ako na po ang bahala." Tinawagan ni Xavius ang private investigator niya.

Kinabukasan:

Nag-oovertime noon si Xavius sa kumpanya nang magkaroon na ng resulta ang pinaiimbestigahan niya. Lumapit ang kanyang assistant at iniabot ang kanyang cellphone. "Sir, ang private investigator n'yo raw po."

"Hello?... Good! Okay, salamat, John. I'll have my assistant wire your payment." Tumayo siya. "Call Mang Andres and my bodyguards. Sabihin mong may pupuntahan kami." Utos niya sa kanyang assistant.

.

.

"Dahil may mga natira akong siomai, ito na lang ang iuulam nating ngayong hapunan. Ayos lang ba sa inyo?" tanong ni Rachelle. Kagagaling lang nilang tatlo sa siomai stall niya sa mall.

"Ayos lang sa akin. Masarap naman ang siomai mo, eh. Masarap iulam sa mainit na kanin." Binalingan ni Alfea si Lucas. "Ayos lang ba 'yun sa'yo, Luke?"

"Opo, Tita fea. Ayos lang po sa akin kahit na ano."

Isinama nila Rachelle at Alfea ang bata sa pagtitinda nung araw na 'yun, at na-enjoy naman niya iyon dahil bagong karanasan iyon para sa kanya. Nang humiling si Luke na huwag muna siyang pauwiin ay hindi ito magawang pahindian ni Alfea. Tila ang bilis niyang lumambot dito. Hindi din niya maunawaan kung bakit tila ayaw niyang mawalay si Lucas sa kanya.

Habang naghahapunan ang tatlo ay may biglang kumatok. "Rachelle, may in-order ka ba?" tanong ni Alfea.

"Wala naman."

"Eh, sino kaya 'yan? May inaasahan ka bang bisita ng ganitong oras?"

"Wala din. Tingnan na lang natin kung sino." Tumayo si Rachelle at nagtungo sa pinto. Ngunit pagbukas niya ay nanlaki ang mga mata niya at napaatras siya nang makita kung sino iyon. "X-xavius?"

Bumungad sa pinto ang isang matangkad at guwapong lalaki–malalamig ang mga mata nito. Pinasadahan niya ng tingin ang loob ng bahay bago tumama ang mga mata niya sa mesa, kumitid ang kanyang mga mata. Sinulyapan muna niya ang kanyang anak na nagsimula nang mamutla bago tingnan nang malamig si Alfea sa tabi nito.