Chapter 55

Nayien

MADALI AKONG naligo at pagkatapos ay bumaba ako sa kusina para magluto ng agahan. Tulog pa si Harry at si Inah kaya magluluto muna ako habang wala pa sila.

Naabutan ko si Nanny na nasa may lababo at may hawak na mga pinggan. Lumapit agad ako sa kanya at pinigilan siya. Matanda na siya at siya parin ang naghuhugas ng mga pinggan? Nasaan ba ang ibang kasambahay at siya itong gumagawa ng mga ito?

Gulat na gulat siyang napatingin sa akin.

"Surprise Nanny!" Sigaw ko pagkatapos kong ibalik sa lababo ang hawak kong pinggan.

"Nayien! Ikaw! Anong—Kailan pa kayo dumating?" Tanong niya at niyakap ko agad siya. Namiss ko siya. Medyo matagal na kasi nong huling kita namin. Nakangisi ako nong bumitaw sa kanya.

"Kagabi lang po. Gusto namin kayong i-surprise kaya, surprised!" Natatawang sagot ko.