Chapter Five: She Agreed

               PINAPUNTA ako ni Zayra sa lugar na 'to. Hindi ko alam pero ang weird dahil puro bungo ang nakikita ko at may mga sapot ng gagamba. Piling ko tuloy halloween na. 

              “What's your order, sir?” tanong sa akin ng waiter na itim na itim sa suot niya. Tiningnan ko ang menu at kakaiba ang mga pangalan ng pagkain nila rito. 

              “Vampire blood, please.” 'Yon na lang ang na-order ko dahil hindi ko rin alam kung masarap ba ang mga pagkain dito. Umalis na 'yong waiter at maya-maya pa ay dumating na 'yong order ko. 

              Kulay pulang juice. Ang cool dahil pulang-pula ito, nagmimistulang parang dugo talaga. Sinubukan ko itong tikman at namangha ako sa taglay na sarap ng lasa nito. 

              Naisipan kong tawagan si Zayra dahil ang tagal niya. Kukuhanin ko na sana ang cellphone ko nang nakita ko siyang naglalakad na palapit sa akin.

              “Sorry. Wala kasi akong masakyan,” she said at umupo na siya sa harapan ko. 

              “Dapat nagpasundo ka na sa akin.” Sambit ko naman. Tiningnan niya ang in-order ko at napangiti siya.

              “No need. Masarap 'yan,” sambit niya habang nakatingin pa rin sa juice na iniinom ko kaya tinawag ko ang waiter at nag-order ako ng makakain ni Zayra. 

              “Anong plano mo?” she asked me. Ngumiti ako sa kaniya at nagtaka ako nang makita ko na kulay itim ang mga mata niya. 

              “Bakit iba ang kulay ng mata mo ngayon?” nagtatakang tanong ko sa kaniya. Nabigla naman ako dahil sa malakas na pagtawa niya.

              “Mas cool ang black tsaka ayaw ko talaga sa asul kong mata. Sabi ni Mageline maganda raw ang mata ko pero naiinis ako sa mata ko. Naalala ko 'yong nanay ko kapag naalala ko na kulay asul pala ang mata ko,” pagkukuwento niya. Tumango na lamang ako imbes na magtanong pa. Sakto naman na dumating na ang mga inorder namin.

              “Ano ba ang mga gusto ni Mageline?” tanong ko sa kaniya. Kumuha siya ng dinuguan at puto. Isinawsaw niya 'yong puto sa dinuguan kaya medyo nagtaka ako. Hindi ko pa 'yon nagagawa sa buong buhay ko kaya tumingin-tingin ako sa ibang customer dito at gano'n din ang ginagawa nila kaya naisipan kong subukan. Kumuha ako ng puto at isinawsaw ko iyon sa dinuguan. 

              “Gusto niya? Mamahaling gamit,” aniya. Alam ko naman na gusto niya 'yong mga mahal, yong tipong branded. 

              Sinubo ko 'yong puto at ang sarap nga, akala ko kaya ako pinapunta rito ni Zayra dahil kulay itim ang paligid pero siguro kaya rito niya rin naisipan makipagkita kasi napakasarap nga naman talaga ng mga pagkain. 

              “Alam ko na 'yon. Iba naman,” sabi ko sa kaniya. Nag-isip siya bago magsalitang muli.

              “Gusto niya ng mga lalaking mahahaba ang buhok.” Napaisip naman ako sa sinabi niya. Hindi ko gusto ang mahabang buhok pero si Bliz, mahaba ang buhok niya kaya siguro maraming babae ang nagkakandarapa sa kaniya.

              “Ano pa?” tanong ko ulit. 

              “Gusto niya 'yong medyo maangas ang datingan at hindi 'yon lalaking nagmamakaawa para lang sa love.” Kumunot ang noo ko dahil sa sinabi ni Zayra at alam ko rin kasi na may nais siyang iparating sa mga salitaan niya pa lang ay halatang-halata ko na.

              “So, sinasabi mo ba na ayaw sa akin ni Mageline dahil nagmamakaawa ako sa pagmamahal?” seryosong tanong ko sa kaniya. Tumango lang siya sa akin. Gusto ko sanang mainis dahil hindi man lang siya aware sa mararamdaman ng isang tao.

              “Ano pa?” Ininom ko 'yong juice at hinintay siyang magsalita. 

              “Gusto niya 'yong nag-eeffort at siyempre, magaling sa kama.” Tiningnan niya ako sa mga mata at gusto kong humagalpak sa tawa dahil sa sinabi niya.

              “Seriously? Bakit? Magaling naman ako!” I said to her na dahilan ng pagtawa niya nang sobrang lakas. 

              “Hindi ko sinabing hindi ka magaling. Huwag kang palaban.” Tumatawa pa rin siya habang ako nakakunot na ang noo ko. Kakaiba rin 'tong babaeng 'to. 

              “Ano pa?” tanong kong muli sa kaniya. Tumingin siya sa akin at tumigil na siya sa pagtawa. 

              “Puntahan mo siya sa bahay nila. Dalhan mo ng kulay itim na rosas,” sabi niya sa akin. Agad akong napaisip sa suggestion niya, itim na rosas? Hindi ko alam na gusto niya pala ang itim na rosas dahil ang alam ko ay mahilig siya sa sunflower.

              “Sige.” Nang matapos na kami kumain ay hinatid ko siya sa bahay nila. Malaki ang bahay nila at kulay itim ang mga pintura.

              “Pasok ka,” aya niya sa akin pero tumanggi ako sa kaniya. 

              “Aalis na ako dahil makikipagkita pa ako kay Bliz. Bye.” pagpapaalam ko sa kaniya bago ako umalis. 

              Sumakay na ako sa kotse at nagmaneho. Tinawagan ko si Bliz dahil magkikita rin kami ngayon. 

              “Nasaan ka na?” bungad ni Bliz sa akin. 

              “Malapit na, sorry,” I answered. Sobrang bilis ng pagmamaneho ko kasi may pag-uusapan din kami ni Bliz na napakaimportante.

              Nang makarating na ako sa bahay nila ay pumasok na ako kaagad at pinuntahan siya. 

              “Bro, ang tagal mo. Anong pag-uusapan natin?” tanong sa akin ni Bliz. 

              “Gusto kong alamin mo kung sino 'yong lalaki ni Mageline.” Napanganga siyang bigla, alam kong nabigla siya sa sinabi ko at hindi ko alam kung ano ang dahilan ng pagkagulat niya.

              “B-Bakit?” nagtatakang tanong niya. Tinapik ko ang braso niya at nginitian siya. 

              “Akin lang si Mageline.” I answered. I smiled widely. Gusto ko bumalik sa akin si Mageline. Kung sino man 'yong lalaking 'yon, handa ko siyang burahin sa mundo. 

              “Bro. 'Yong nangyari nang araw na 'yon. Okay ka lang?” tanong niya.

              “Oo naman.” I answered. May pinag-usapan pa kami tungkol sa business pero nagdesisyon na rin ako kaagad na umuwi na dahil gusto ko nang magpahinga. 

              Nang makauwi na ako ay agad akong dumiretso sa kuwarto ko at humiga.

              Hindi ko maiwasang malungkot dahil wala si Mageline sa tabi ko. Wala akong mayakap sa malamig na gabing ito. Pakiramdam ko ay kaunting oras na lang at mababalot na ako ng yelo, wala akong maramdamang kahit katiting na init. 

              “Bumalik ka na Mageline,” bulong ko sa hangin. Baka sakaling pakinggan ako ng Diyos at tuparin niya na ang hiling ko.