Chapter 6

Malalipas ang ilang oras, pagod na umupo si Magnus sa sahig pagtapos nilang maglinis. Ngayon nauunawaan na niya si Sabrina kung bakit ayaw nitong may gulo sa bar. Mahirap pala talaga maglinis. Masakit sa likod ang ilang oras na pagyuko. Basang-basa ng pawis ang damit niya, pero hindi naman nababawasan ang kapogian niya. Mas attractive pa rin siya sa pawisang itsura.

“Tol, pagsaluhan na natin ang cake mo. Nagutom ako sa paglilinis, eh,” sigaw sa kaniya ni Ken hawak ang box ng cake na galing kay Dawn.

Tumayo si Magnus at lumapit sa mga ito.

“Kantahan muna natin ang celebrant.” Hiling ng babaeng kasama ni Sabrina sa trabaho.

Tulad ng sinabi ng babae, kumanta ang mga ito ng happy birthday. Napakamot na lang sa batok si Magnus dahil sa hiya. Matanda na siya para sa ganitong bagay, pero sino ba siya para pigilan ang mga ito? Hindi naman siya killjoy kaya hinayaan na lang niya.

“Blow the candle!” sambit ng mga ito pagtapos kumanta.

Nakisakay na rin si Magnus sa gusto ng mga kasama at hinipan ang kandila.

“Picture taking!” sigaw ng isa pa sa katrabaho ni Sabrina.

Pumunta sa loob ng bar counter ang babae at ipinatong ang phone nito sa hanay ng mga beverage.

“Closer guys!” saambit nito nang hindi sila magkasya sa screen ng phone nito. “Sumama ka rin, Sab.”

Hinila ng babae si Sabrina nang hindi ito kumikilos. Aksidente pa itong natisod kaya maagap na sinalo ni Magnus ang dalaga.

“I’ll catch you when you fall... in love with me, Sabrina,” nakangiting banat na naman niya sabay kindat dito.

Tinaasan lang siya nito ng kilay at umalis sa pagkakahawak niya. Kota na siya sa pag-deadma nito ngayong araw. Wala pang apat na oras nang makilala niya ito, pero ilang beses na siya nitong binalewala.

“Closer guys!” sambit ni Magnus sa mga kasama kahit siksikan na sila. Gusto niyang mas mapalapit kay Sabrina dahil katabi niya ito. Pagkakataon na niya iyon at hindi niya sasayangin ang mapadikit dito.

“Move,” nagbabantang sabi ni Sabrina habang tinutulak ang binata.

Hindi naman gumagalaw sa pwesto si Magnus kahit anong tulak nito. Nasa kabila niya ang tatlong bouncer na doble yata ang laki ng katawan sa katawan niya, kaya’t nahihirapan din itong paalisin siya.

Hinawakan ni Magnus ang braso ni Sabriba at inilagay sa unahan niya. Tumayo siya sa likuran nito at hinawakan ang mukha ng dalaga, saka ibinaling ito sa harap ng camera.

“Smile, Sabrina,” nakangiti niyang sabi bago sunod-sunod na nag-click ang camera.

Malakas namang tinapik ni Sabrina ang kamay niya kaya mabilis niyang inalis. Bakal yata ang kamay nito dahil agad siyang nasaktan sa tapik nito.

“Wacky naman... Ay! Namatay ang ilaw,” saambit ng babae nang biglang dumilim.

Naramdaman ni Magnus na aalis sa pwesto sa Sabrina. May kalokohang pumasok sa isip niya at niyakap ito sa gitna ng dilim. Kung hindi ito madadala sa ngiti, baka sa yakap makuha niya ito.

“Pakawalan mo ako, peste ka!” mahina at nanggigil nitong sabi.

Ngumiti naman si Magnus kahit hindi nito nakikita ang reaksyon ng dalaga. Marahil ayaw nitong malaman ng mga kasama na yakap niya ito ngayon habang madilim.

“Mahirap pakawalan ang bagay na hawak ko na, Sabrina. Lalo ka na. Stay put ka lang diyan at damhin ang init sa loob ng mga bisig ko. Maraming babae ang halos magpakamatay para lang makarating kung nasaan ka ngayon. Maswerte ka dahil ako na ang nag-offer sa ’yo. Kahit hindi ka magpasalamat, still, you’re welcome,” pilyong bulong niya rito.

Huminga ito nang malalim at sumandal sa dibdib niya. Mas lumawak ang ngiti ni Magnus dahil hindi na ito nagpumiglas sa yakap niya. Tama siya dahil sa yakap pala niya ito mapapaamo. Pero, mali ang akala niya. Nabitiwan niya si Sabrina nang bigla nitong kagatin ang dibdib niya.

“Oh, shit!” daing niya.

Hinaplos pa niya ang nasaktang dibdib. Pakiramdam niya magsusugat iyon dahil sa hapdi.

“Magnus, anong nangyari sa ’yo? Gamitin mo kasi ang phone mo para hindi ka natitisod,” sambit ni Ken sa kaniya habang nakaharap sa kaniya ang flashlight ng phone nito.

“Sandro at Santo, bring them outside. The rest, follow me,” seryosong utos ni Sabrina kasabay ng pagbukas ng ilaw.

Ngunit nagtaka si Magnus nang makita na hindi lang sila ang naroon bar. May limang tao na nakatayo sa bungad ng pintuan, tatlong lalaki at dalawang babae. Ngunit, hindi na nila naitanong kung sino ang mga ito nang hilahin na sila palabas ng dalawang bouncer.