Kabanata 5

"Grabe, ang galing mambola ni Sir Jake. Marami ang babaeng empleyado ang kinilig kahapon," natatawang sabi ni Andrea kinabukasan habang naglilinis siya ng lamesa niya.

"Pansin ko rin. Lalo na si Danika from HR department, ang lagkit kong makatingin. Kung ice cream lang si Sir Jake baka natunaw na 'yon," sabi naman ni Joyce habang umiinom ng kape.

"Hindi mo rin siya masisisi kasi sobrang gwapo ni Sir Jake," kinikilig na sabi ni Andrea.

"Akala ko ba ang pinakagwapong lalaki para sa 'yo ay ang boyfriend mo?" nakakalokong tanong ni Joyce.

Napatawa si Andrea at hindi makasagot.

Umagang-umaga ay si Jake kaagad ang pinag-uusapan ng mga kaibigan ko. Kahit naiinis ako pero hindi ko pinahalata iyon.

"Ay, hindi na makasagot. Baka naman tama nga talaga ang hinala ko kahapon na may gusto ka kay Sir Jeff at sinasabi mo lang na si Sir Jake ang bet mo."

"Tumigil ka na nga, Joyce. Hindi ba't sinabi ko na rin kahapon na mas malakas ang dating ni Sir Jake." Bumaling sa akin si Andrea. "No offense Mia, ah. Pero hindi ko magugustuhan si Sir Jeff. Natatakot nga ako sa kanya sa totoo lang. Para kasing hindi mo mabiro at parang hindi masaya sa buhay."

"Grabe ka naman," natatawang sabi ko. Pati si Joyce ay napatawa na rin. Sa limang taon namin ni Jeff nakita ko naman siya na masaya pero minsan nga lang iyon dahil kadalasan ay seryoso siya.

"Oo. Iyon ang nakikita ko. Ikaw naman kasi, eh. Kailan mo ba 'yon paliligayahin sa kama at para naman ngumiti 'yon kahit papaano."

"Andrea!" saway ko.

Malakas na napatawa si Joyce. Napailing na lamang ako.

"Dahil palangiti si Sir Jake at parang masaya palagi ibig bang sabihin niyan ay palagi din itong maligaya sa kama? Tama?" natatawang tanong ni Joyce.

Tumili si Andrea. Mabuti na lang at maaga pa at kami pa lang ang nandito kaya walang magtataka kung bakit ganoon ang reaksiyon niya. "What if ganoon nga?!"

Nagtawanan silang dalawa. Uminit ang pisngi ko at hindi ko alam kung ano ang nangyayari sa aking sarili. Pumasok sa aking isipan ang makamundong ginawa namin ni Jake noong isang gabi.

Nakaramdam ako ng inis sa aking sarili. Bakit ko iniisip 'yon?

Natigil silang dalawa nang biglang bumukas ang glass door at pumasok si Jake. Suot ang kulay brown na long sleeve polo shirt pinaresan ng itim na slocks at itim rin na leather shoes. Kaagad siyang ngumiti nang makita kami. "Good morning, ladies!"

"Good morning, Sir Jake," sabay na bati rin ng dalawang kaibigan ko. Naging mas malakas nga lang ang pagbati ni Andrea at parang may kasamang tili ang boses.

Kaagad akong yumuko at inabala ang sarili sa paglinis ng lamesa ko kahit nagawa ko na kanina dahil sa akin na naman nakatingin si Jake.

"Good morning, Mia," bati niya sa akin.

Wala akong nagawa kundi batiin siya pabalik. "Good morning, Sir." Napansin niya sigurong hindi ko siya binati kaya naman ginawa niya iyon. Alam kong nang-iinis lang siya. Kung gugustuhin ko hindi ko siya papansinin pero ayaw ko rin na mahalata nina Joyce at Andrea na may kakaiba sa pakikitungo ko kay Jake. Kaya wala rin akong nagawa kundi ang balingan siya.

"What snacks do you want para mamaya?" Iniisa-isa niya kaming tiningnan pero nagtagal sa akin.

"Ay, manlilibre po kayo, Sir?" excited na sabi ni Andrea.

"Yeah."

"Pizza na lang, Sir. 'Yong hawaiian." Walang pag-dadalawang isip na tugon ni Andrea.

"Okay. How about you, Joyce and...Mia? What do you want?"

"Iyon na lang din po, Sir," tipid na sagot ni Joyce. Tumango na lang din ako para hindi na siya magtanong pa ulit.

"Okay, magpapaorder ako."

"Salamat, Sir Jake," malandi na pagkakasabi ni Andrea. Kumindat si Jake sa kanya.

Napayuko ako at bumuntong hininga. Umagang-umaga nilalande niya ang mga empleyado niya. Hindi ko na siya binalingan pa ulit nang umalis na siya sa harapan namin. Doon pa lang ako nakahinga ng maluwang.

Halos mabali ang mga leeg ng mga empleyado habang tinitingnan si Jake sa loob cafeteria na kumukuha ng pagkain pagdating ng tanghali. Halos lahat ng tao doon ay binati niya especially ang mga department heads.

"Parang tatakbo sa politiko si Sir Jake. Pinapansin ang lahat," kumento ni Joyce habang kumakain na kami.

"I think hindi naman masama ang ginagawa niya," si Andrea.

"Hindi ko naman sinabi na masama. Hindi lang ako sanay na makita ang boss natin na sumasabay sa natin dito sa cafeteria para kumain at bago rin sa mga mata ko ang pagiging pala-kaibigan ng boss sa mga empleyado."

"Nasanay kasi tayo kay Sir Jeff na hindi palapansin. Hindi nga natin iyon nakita na umapak dito sa cafeteria kahit isang beses."

Hindi ako nakaimik dahil totoo iyon.

"Pero mabuti din naman iyon para irespeto siya ng mga empleyado niya. May boundaries ang boss at ang empleyado," seryosong sabi ni Joyce.

"Tama ka din naman."

"Tsaka may possibility pa na abusuhin ka ng mga empleyado mo kapag masyadong kang malapit sa kanila," dagdag ko. Nakita ko kasing nakipag-appear ang isang empleyado kay Jake na parang mag-tropa lang sila at nagkita sa isang kanto.

Tumango-tango si Andrea. "May point ka din, Mia."

Naninibago kami sa mga ginagawa ni Jake. Malaki ang pagkakaiba sa nakasanayan namin mula kay Jeff. Oo at palabiro din naman sa mga empleyado ang Daddy nila na si Mr. Corpuz pero parang nasobrahan naman ang kinikilos ni Jake. Parang hindi na siya boss kung umasta.

May nakipag-selfie pa nga sa kanya na mga babaeng empleyado mula sa isang department.

Napairap ako.

Kahit sinong babae na lumalapit sa kanya ay hindi niya inaayawan.

Malapit na kaming matapos nang biglang lumipat sa aming table si Jake. Natapos na siyang kumain ng lunch. Ice cream na lang ang kinakain niya na nakalagay sa isang maliit na plastic cup. Pwede lang kasi itong bitbitin kaya naman malaya niyang nagawa ang paglapit sa aming banda.

Nagsisi ako kung bakit hindi ko binilisan ang pagkain ko.

"Hello, ladies!" nakangiti niyang bati sabay upo. Sa harapan ko siya umupo since walang nakaupo doon. Magkaharap kasi sina Joyce at Andrea. Si Joyce ang katabi ko.

"Hi, Sir Jake," masiglang bati ni Andrea kay Jake na siyang katabi na niya ngayon. Halatang kinikilig si Andrea kasi namumula ang magkabilang pisngi niya. Kami naman ni Joyce ay tipid lang na ngumiti.

"Thank you po sa pizza kanina, Sir," patuloy ni Andrea.

"Your welcome." Bumaling siya ulit sa akin. Yumuko ako dahil ayokong tingnan siya. Nakangisi na naman kasi siya at naiinis ako sa ganoong pagmumukha niya.

"Ow, hindi ka pala kumakain ng union, Mia?" biglang tanong niya.

Napatingin ako sa kanya at nadatnan kong nasa plato ko na ang mga mata niya. Isa kasi sa mga ulam ay beef steak. Itinabi ko kasi ang mga sibuyas kasi hindi ko gusto ang lasa ng mga iyon.

"Opo, Sir. Ayaw ni Mia ng sibuyas," singit ni Andrea. Siya na lang ang nagsalita kasi hindi ako umiimik.

"Marami pa namang good benefits ang sibuyas. Sayang naman." Laking gulat ko nang biglang kunin ni Jake ang tinidor na ginamit ko mula sa plato ko at isa-isang tinusok ang mga sibuyas. Walang pagdadalawang isip na sinubo niya iyon sa kanyang bibig habang nakatingin sa akin. Nakatitig siya sa akin habang ngumunguya siya. Wala akong nagawa kundi ang lumunok na lamang sa ginawa niya.

Marami akong narinig na pagsinghap mula sa paligid. Kadalasan mula sa mga babaeng empleyado. Maski sina Andrea at Joyce ay nagulat sa ginawa ni Jake. Nanatiling nakadilat ang kanilang mga mata at nakaawang ang mga labi.

Akala ko sa umaga lang ako maiinis kay Jake pero ipinagpatuloy niya iyon ngayon.

"Ang sarap," sabi niya pagkatapos ibalik sa aking plato ang tinidor. Inubos na niya ang ice cream na dala niya na parang wala siyang ginawang kakaiba.

Napatingin ako sa paligid at nakita ko ang ibang empleyado na nag-bubulungan.

Napabuntong-hininga ako.

"Sir, sa susunod hindi ko na rin kakainin ang sibuyas ng beef steak ko," suhestiyon ni Andrea. Malakas na napatawa si Jake.

Palihim akong umirap dahil naiinis akong tinitingnan siya na tumatawa.

Pagkatapos niya sa amin ay lumipat na naman siya sa ibang lamesa para makipag-usap at makipagharutan sa mga babaeng empleyado na parang naiihi na ang mga pagmumukha dahil sa paglapit niya.

Hindi ko matanggap na araw-araw ko na siyang makikita at araw-araw din akong maiinis sa pagmumukha niya.

Pagdating ng hapon ay pumunta ako sa New Account Department, nagpasa ako ng mga official receipts ng mga bagong clients na nag-avail ng insurance program. Nadatnan ko si Jake doon na nakikipagtawanan sa isang empleyado.

Dito na naman siya naghahasik ng lagim.

May iilan pa akong napansin na makapal ang nilagay na make-up sa mukha. Nanibago ako kasi hindi ko naman napansin dati na nag-me-make-up ang mga ito. Ngayon pa lang at alam ko ang dahilan.

Pagkatapos kong maipasa ang listings sa department head ay kaagad akong umalis doon. Naiinis na naman kasi ako.

Hindi pa ako tuluyang nakakabalik sa department namin nang biglang may humila sa aking braso.

Nagulat ako nang malaman kong si Jake iyon. May multo ng ngiti ang kanyang mga labi at kitang-kita ko sa pagmumukha niya na may binabalak siyang hindi maganda.

Hinila niya ako sa isang hallway na walang tao. Isinandal niya ako sa ding-ding at inilapit ang mukha niya sa akin. Mabuti na lang at nakapag-isip kaagad ako ng gagawin kahit na lumalakas na ang tibok ng puso ko kaya naman malakas ko siyang naitulak palayo sa akin.

Tumawa siya. "Just one kiss, Mia. Please."

Akmang lalapitan niya ulit ako nang nauna ko nang hinampas ang dibdib niya kaya napaatras siya.

"Ano ba? Nasa trabaho tayo." Hindi ako sumigaw dahil natatakot ako na may makarinig sa akin.

"I missed that damn lips of yours," sabi niya habang titig na titig sa mga labi ko.

Gusto kong magmura.

"Pwede ba tumigil ka na sa mga ginagawa mo," banta ko.

Umiling siya.

Sinubukan niya ulit akong lapitan pero hindi niya nagawa iyon nang biglang sumulpot sa hallway si Jeff na masamang nakatingin sa aming dalawa.

Hindi ko na alam kung paano pa ako nakatayo ng maayos gayong ang lakas na ng tibok ng puso ko dahil sa takot na nararamdaman.