Chapter 36

PATUNGO na sana ako sa silid ng ina ni Josh na pinagamit niya muna sa akin at handa na akong matulog nang makarinig ako sa labas ng kalampag ng gate.

"Huh? Ano 'yon?"

Kinabahan ako. Dinampot ko agad ang walis-tambo na nakatayo sa isang sulok nang may maulinigan naman akong mga yabag. Patungo iyon sa front door.

Sinabi ni Josh na hindi siya uuwi kaya nasisiguro ko na ibang tao ang naroon sa labas.

Pumuwesto ako sa likuran ng pinto at mahigpit kong nahahawakan ang walis. Nakaamba na iyon sa ere at paliliparin ko na lang sa sinumang papasok doon.

"Wala rin palang silbi ang pinaayos niyang gate," bulong ko sa sarili ko. "Sana alarm na lang ang ipinakabit niya."

Napatingin ako sa pumihit na sedura. At nang bumukas ang pinto ay pinalipad ko agad ang hawak kong walis.

"Darn!" pagmumura ni Josh na maagap naiharang ang braso. "Anong ginagawa mo?"

"Oh, sorry. Ikaw pala 'yan?"

''Bakit? May inaasahan ka pa bang iba?''

''Malay ko ba! Baka mamaya kawatan o akyat-bahay gang na pala ang pumasok dito!