Kabanata 2.2

“Next time, isama mo ang mga magulang mo dito for dinner at mapag-usapan na rin namin ang mga planong gagawin namin oras na nagmerge na ang mga kompanya natin. Malapit na kayong ikasal ni Czarina.” Singit ni Natalia. Isang malalim na buntong hininga naman ang pinakawalan ni Czarina.

“Walang kasal na magaganap. Hindi ako pumapayag na matuloy ang kasal.” Lakas loob na wika ni Czarina kaya nagtataka siyang tiningnan ng lahat. Natawa naman si Natalia sa naging desisyon ng stepdaughter niya.

 “Ikaw pa ang aatras sa kasal? Alam mo ba kung anong mawawala sayo kapag umatras ka sa kasal?” wika ni Natalia pero walang pakialam si Czarina, hindi siya magpapakasal sa lalaking hindi naman siya ang mahal. Salubong na rin ang mga kilay ni Austin na nakatingin kay Czarina.

“Nagtatampo ka ba dahil hindi kita nasamahan sa pagsusukat mo ng wedding gown? I’m sorry about that, babe, sinabi ko naman sayo kung anong ginawa ko, right?” malambing na wika ni Austin pero hilaw lang na tumawa si Czarina.

“Huwag mong ginagawang biro ito, Czarina, dahil hindi nakakatuwa. Malaki ang mawawala sayo kapag umatras ka sa kasal niyo ni Austin. Alam mo naman kung gaano na kalaki ang naitulong ng pamilya nila sa business natin.” Nagagalit na saad ni Natalia.

“Business natin o business mo?”

“Czarina!” galit na sigaw sa kaniya ng kaniyang ama. Napabuntong hininga na lang si Czarina gaya ng inaasahan niya, sino ba ang kakampi niya sa mga taong kasama niya ngayon? Tumayo na si Czarina, wala na siyang pakialam kung magalit man sa kaniya ang kaniyang ama pero desidido na siyang i-cancel ang kasal nila ni Austin.

“Go back to your seat, Czarina. Ano bang problema mo para umatras ka sa kasal niyo ni Austin? Ngayong buwan na kayo ikakasal at nakahanda na ang lahat. Hindi na biro ang nagastos ng pamilya ni Austin sa kasal niyo, nakakahiya naman sa kanila kung aatras ka pa.” dagdag pa ng kaniyang ama.

Tiningnan ni Czarina si Austin na naguguluhan din sa biglaan niyang desisyon.

“Gusto mo bang ako pa ang magsabi sa kanila o ikaw na?” wika ni Czarina. Napalunok si Austin sa kaba kahit na hindi niya alam kung anong sinasabi ni Czarina.

“What are you talking about? Ilang taon mong hinintay ang araw na maikasal kayo tapos gusto mong umatras? Anong drama na naman ba ito, Czarina?” sabat na rin ni Natalie na ikinatawa ni Czarina.

“Alam ko na alam niyo kung anong sinasabi ko, hindi ba dapat at kayong dalawa ang magpaliwanag kung anong nangyayari?” may diing sagot ni Czarina kay Natalie. Nilingon ni Natalie si Austin pero pareho silang tahimik kahit na alam na nila kung anong posibleng sinasabi ni Czarina.

Aalis na sana si Czarina nang tawagin ni Natalia ang dalawang lalaking tauhan niya. Napailing naman si Czarina, alam niyang ikukulong na naman siya at ayaw niya nang mangyari na naman yun.

“No, don’t do this to me. Dad, wala akong ginagawang hindi maganda para hayaan niyo na naman si Tita Natalia sa gusto niyang gawin!” sigaw ni Czarina sa kaniyang ama na umiwas lang ng tingin sa kaniya.

“Ikulong niyo siya sa kwarto niya at huwag niyo siyang hahayaan na makakalabas. Kunin mo rin ang cellphone niya at huwag niyong ibibigay sa kaniya!” galit na utos ni Natalia. Nagpumiglas naman si Czarina sa dalawang lalaki pero wala siyang magawa dahil masyado silang malakas. Tiningnan ni Czarina si Austin para sana tulungan siya pero iniwas din ni Austin ang paningin niya.

“Hangga’t hindi mo binabawi ang sinabi mo kay Austin, hindi ka makakalabas ng kwarto mo. Naiintindihan mo?” anas pa ni Natalia. Walang nagawa si Czarina nang dalhin na siya ng dalawang lalaki sa loob ng kwarto niya. Napaupo na lang si Czarina sa kama niya. Si Austin ang dahilan kung bakit hindi na siya ikinukulong ng kaniyang stepmom pero si Austin din pala ang magiging dahilan para ikulong ulit siya.

Mapait na ngumiti si Czarina, masyado pa rin siyang mahina dahil hindi niya man lang magawang ipagtanggol ang sarili niya.

Nagpatuloy naman ang dinner nila sa kusina.

“Pasensya ka na Austin sa mga sinabi ni Czarina. Hayaan mo at kami na ang kakausap sa kaniya. Alam mo naman na may iniindang sakit si Czarina at minsan ay nawawala siya sa sarili.” Ani ni Natalia na ikinatango lang ni Austin.

Nang matapos ang dinner nila ay nagtungo si Natalie at Austin sa pool area.

“Sa tingin ko may alam na si Czarina tungkol sa ating dalawa.” Wika ni Natalie dahil imposibleng i-cancel ni Czarina ang kasal kung wala siyang sapat na dahilan.

“Huwag kang mag-alala, aayusin ko ang tungkol dito.” Sagot ni Austin.

“Kailangan na nating ihinto kung anong namamagitan sa ating dalawa, Austin. Ikakasal na rin ako sa susunod na taon kay Tyrone Fuentes at hindi pwedeng macancel pa yun ng dahil sayo.” Napaigting ang panga ni Austin sa sinabi ni Natalie.

“Ganun na lang ba kadali sayo na pumayag na magpakasal kay Tyrone Fuentes kahit na hindi mo pa naman siya nakikilala personally?” inis namang nilingon ni Natalie si Austin.

“Ikakasal na kayo ni Czarina ngayong buwan. Alam mo naman na hindi pwedeng magalit sa akin si Mom at Dad dahil kapag nangyari yun baka ako naman ang itakwil ni Daddy. Kung ano man ang namagitan sa ating dalawa tapusin na natin yun. Ayaw kong masira ang magandang relasyon ng pamilya namin sa mga Fuentes at ganun din sa pamilya niyo. Mahal mo lang ang katawan ko Austin, ikakasal naman na kayo ni Czarina kaya makukuha mo na rin sa kaniya ang nakukuha mo sa akin. Hangga’t wala pang ebidensya si Czarina laban sa atin itigil na natin ang lihim nating pagkikita. Ayusin mo ang relasyon niyo ni Czarina, hindi pwedeng ma-cancel pa ang kasal niyo.” Anas ni Natalie. Napabuntong hininga na lang si Austin.

“Huwag kang mag-alala, kakausapin ko siya bukas.” Tanging sagot ni Austin. Nakahinga naman ng maluwag si Natalie dahil hindi pwedeng malaman ng pamilya niya ang tungkol sa lihim na relasyon nila ni Austin. Si Tyrone ang mapapangasawa niya at ayaw niyang sayangin ang pagkakataon na yun.