Kabanata 2.1

Napabuntong hininga si Czarina nang hindi niya napilit si Tyrone na magpakasal sa kaniya. Malapit na ang kasal nila ni Austin pero hanggang ngayon wala pa rin siyang lakas ng loob na i-cancel ito. Nagtungo si Czarina sa hotel kung saan siya makikipagkita sa mga designer ng wedding gown niya. Sinusubukan niyang tawagan si Austin para sana dun na lang sila magkita pero hindi na naman ito sumasagot.

Nang matapos niyang isukat ang gown ay lumabas na rin siya pero hindi niya inaasahan na makita ang kaniyang boyfriend kasama ang kaniyang half sister. Hilaw na lang siyang natawa, kaya pala hindi na naman sumasagot ang boyfriend niya dahil kasama nito ang true love niya. Naikuyom ni Czarina ang kaniyang kamao, gusto niyang hilain ang buhok ng kapatid niya pero wala siyang lakas para gawin yun. Hindi maintindihan ni Czarina kung bakit palagi na lang kinukuha sa kaniya ni Natalie ang kasiyahan niya.

Gusto niyang sundan si Austin at ang kapatid niya, gusto niyang kausapin ang mga ito, gusto niyang malaman kung bakit nila ito ginagawa sa kaniya pero hindi niya magawa dahil nanginginig na ang mga tuhod niya.

Napayuko na lang siya at napabuntong hininga. Nang may magsalita sa gilid niya ay nilingon niya ito, bahagya pa siyang nagulat nang si Tyrone ang nakita.

“Gusto mo akong pakasalan para makaganti sa boyfriend at kapatid mo, tama? Yun ba talaga ang nakikita mong paraan para mawala ang sakit na nararamdaman mo?” wika ni Tyrone sa kaniya.

“Kung nandito ka para maliitin lang ako at wala ka namang maitutulong, mabuti pang umalis ka na lang at layuan mo na ako.” Masungit na sagot ni Czarina saka siya tumalikod pero hindi pa man siya nakakalayo nang muling magsalita si Tyrone.

“Wala ka nang ginawa para i-expose ang panloloko ng boyfriend at ng kapatid mo, wala ka rin bang gagawin para kumbinsihin akong pakasalan ka?” kunot noong nilingon ni Czarina si Tyrone. Sa tingin ba talaga ni Tyrone ay nakikipaglaro siya? “Kung ganun, totoo nga ang sinabi mo. Niloloko ka ng lalaking dapat ay pakakasalan mo at ang babae niya ay walang iba kundi ang sarili mong kapatid.” Dagdag pa ni Tyrone.

“Natutuwa ka bang makita ang mga taong nasasaktan? Sa itsura mo para kang nanunuod ng nakakainteres na movie. Kung gusto mong pakasalan ang kapatid ko, go on, pero huwag na huwag mo akong pagtatawanan dahil lang sa nasasaktan ako. Sa tingin mo ba ginusto kong lokohin ako ng lalaking akala ko ay magiging kakampi ko?” inis na saad ni Czarina. Sumeryoso naman ang mukha ni Tyrone saka niya ipinamulsa ang mga kamay niya.

“Ikaw ang unang lumapit sa akin, you ask me to marry you, ganito mo ba ako kukumbinsihin?” hindi nakasagot si Czarina. Kailangan pa rin niyang kumbinsihin si Tyrone na pakasalan siya dahil ito na lang ang tanging paraan para makapaghiganti siya sa kapatid niya, sa stepmom niya at sa boyfriend niya. Pumitik si Tyrone sa mismong mukha ni Czarina para agawin ang natutulog nitong diwa.

“Call me kapag may naisip ka ng pwedeng ipalit sa pagpayag kong pakasalan ka.” Dagdag ni Tyrone saka niya tinalikuran si Czarina. Napapaisip si Czarina kung paano niya ba makukumbinsi si Tyrone? Ano bang pwede niyang ialok kapalit nang pagpapakasal sa kaniya?

Umuwi na si Czarina dahil kahit maghintay siya ng ilang oras sa hotel kung saan sila nakikipagkita sa mga designer at organizer para sa kasal nila, hindi darating si Austin dahil busy na naman siya kay Natalie. Mapait siyang ngumiti dahil ang lalaking akala niya na mamahalin siya at magiging kakampi niya ay sasaktan din pala siya. Gusto niyang umiyak, gusto niyang ikulong ang sarili niya pero pakiramdam niya pagod na siya para gawin pa yun. Ayaw niyang maging mahina na naman, ayaw niyang maging kawawa sa harap nilang lahat dahil wala naman siyang masasandalan.

Bago sakupin ng kadiliman ang kalangitan ay pumasok na si Czarina sa loob ng bahay. Nakita niya naman si Austin at Natalie na kapapasok lang ng bahay.

“I’m home!” sigaw ni Natalie. Nang magsalubong ang mga mata ni Austin at Czarina ay mabilis na umiwas si Czarina. Hindi niya kayang tingnan ang lalaking kayang tumuhog ng magkapatid. “Where’s Mom?” tanong ni Natalie kay Czarina.

“Hindi ko alam,” blangkong sagot ni Czarina at akma na sanang tatalikod nang magsalita si Natalie. “Nagseselos ka ba dahil kasama ko ang fiance mo?” nakataas ang kilay na saad ni Natalie. Hinarap naman ni Czarina ang kapatid niya saka niya ito nginitian.

“Why would I? May ginagawa ba kayong dalawa na hindi dapat para ikaselos ko?” balik na tanong ni Czarina kaya nagngitngit ang mga ngipin ni Natalie sa inis.

“Wala kaming ginagawa, Czarina. Sinamahan ko lang ang kapatid mo,” sabat ni Austin.

“Ah kaya pala, nagawa mo siyang samahan kung saan man siya pumunta pero nakalimutan mong kailangan nating makipagkita sa mga designer at organizer? Gusto mo ba talaga akong pakasalan Austin pero bakit parang ako lang ang busy para sa preparation natin sa kasal?”

“Huwag mo naman kaming pag-isipan ng hindi maganda, Czarina.” Natawa naman si Czarina sa sinabi ni Austin.

“Wala naman akong sinasabi pero masyado kang nagiging defensive.” Huling niyang wika bago niya tinalikuran ang dalawang traydor sa buhay niya. Napapairap na lang si Natalie at hindi na pinansin pa si Czarina.

Nang magdinner, ang akala ni Czarina ay nakauwi na si Austin pero hindi pa pala. Magkatabi silang dalawa habang nasa harapan naman nila si Natalie at ang kaniyang ina na si Natalia.

“Kumusta na nga pala ang project mo, iho? Is everything okay now?” tanong ni Mateo kay Austin habang kumakain sila.

“Well, everything is fine, Tito.  May new project ulit ang kompanya at kami ang napili ng isang financial group para sa malaking building na itatayo. Contract signing na rin namin next day.” Sagot ni Austin na ikinangiti ni Mateo dahil mapapanatag na siya para sa anak niyang si Czarina.

“Magpahinga ka rin minsan dahil alam kong busy din kayo ni Czarina sa preparation niyo sa kasal tapos busy ka rin sa sunod-sunod mong project.” Ngumiti at tumango lang naman si Austin. Tahimik lang naman si Czarina habang nakikipag-usap si Austin sa kaniyang ama. Mahigpit na hinawakan ni Czarina ang kutsara at tinidor niya, iniipon niya ang lakas ng loob niya para sabihin sa kanilang lahat ang desisyon niya.