Chapter 7

Chapter 7

Nanatili ang titig ni Wyatt sa kaniya, ngunit ngayon ay may kasama na itong pagsusuri at kaunting paghanga.

Ang babaeng ito na inakala ng lahat na walang laban at nagmamakaawa sa pampublikong eksena kagabi, ay hawak pala sa leeg ang buhay ng negosyo ni Mateo.

"Mommy!" muling hiyaw ng maliit na dumpling sa kaniyang isip na halos magtatatalon sa tuwa.

"Hindi mo naman sinabi na ganiyan ka pala kagaling! Ipagmamayabang talaga kita sa lahat!"

Simpleng tech person lang naman ako, sagot ni Ayella sa kaniyang sarili.

Inalis ni Wyatt ang tingin sa kaniya at ibinalik ang malamig na tono. "Kung ganun, lalo mong kailangan ng pormal na titulo."

"Pormal na titulo?" tanong ni Ayella.

"Ang maging opisyal na asawa ni Wyatt Fitzwilliam. Sapat na 'yon para hindi man lang makalapit si Mateo sa patent mo," deretsong pahayag ng lalaki.

Natahimik si Ayella ng ilang segundo.

May punto ito.

Sa lakas at impluwensya ng pamilya Mallari sa Ilocos City, madadapa at madadapa pa rin sila kapag ang mga Fitzwilliam na ang humarap sa kanila.

"Mommy, pumayag ka na!" sigaw uli ng dumpling sa isip niya na halos mapatid na ang boses sa excitement. "Kahit kasal-kasalan lang 'yan, malapit ka pa rin sa kaniya! Mula ngayon, ikaw na ang legal na misis ni Wyatt Fitzwilliam!"

Puwede bang maging mahinhin ka nang kaunti? suway ni Ayella.

"Ayaw ko nga!" sagot ng dumpling sa maaktong boses. "Ngayong nahanap ko na si Daddy, siyempre tutulungan kita na makuha siya!"

Huminga nang malalim si Ayella at muling tiningnan ang lalaki.

"Mr. Fitzwilliam, ibig mo bang sabihin... magpapakasal tayo sa papel lang?" tanong niya.

"Oo."

"Hanggang kailan naman ang kontrata?"

"Kung gusto mong tapusin pagkapanganak mo sa bata, pwedeng-pwede," malamig ngunit siguradong sagot ni Wyatt. "Bibigyan din kita ng sapat na pera—yung kakayanin mong mabuhay nang komportable kasama ang anak mo habang buhay."

Umapaw ang katahimikan sa pagitan nila.

Masyadong maganda ang alok na ito para tanggihan.

Magkakaroon siya ng napakalakas na proteksyon, magkakaroon ng legal na apelyido ang anak niya, at mawawala rin ang problema ni Wyatt sa panggigipit ng pamilya nito.

Walang lamangan, walang utang na loob.

"Sige, pumapayag ako," nakatiping ngiti na sagot ni Ayella.

Tumango si Wyatt at agad na tumayo mula sa kaniyang upuan. "Kakausapin ko na ang abogado para sa kasunduan. Aayusin natin ang Certificate of Marriage ngayong araw."

"Ngayon agad?" gulat niyang tanong.

"May problema ba?"

Umiling si Ayella.

Mas maaga, mas maganda.

Kailangan na kailangan na niya ang pangalang 'Misis ni Wyatt Fitzwilliam' para mapatahimik at matakpan ang bibig ng mga taong nagmamagaling sa kaniya.

Pagkalipas ng dalawang oras, nakatayo na si Ayella sa mismong harapan ng Local Civil Registrar. Nakatitig siya sa hawak niyang marriage certificate habang tulala pa rin at hindi ganap na makapaniwala.

Napakabilis ng lahat. Para siyang nanaginip.

Kagabi lang, puno siya ng pag-asa na makakasal sa lalaking kinasama niya nang ilang taon na si Mateo. Pero ngayon, hawak na niya ang katibayan na kasal na siya kay Wyatt.

Pula ang pabalat ng papel na may gintong tatak, at sa loob ay ang kaniyang larawan kasama si Wyatt.

Sa litrato, bahagyang ilang at pilit ang kaniyang ngiti, habang si Wyatt naman ay nananatiling malamig at walang anumang emosyon sa mukha—hindi bakas kung masaya ba ito o galit.

Pero simula sa araw na ito, legal na silang mag-asawa.

"Misis ni Wyatt Fitzwilliam, ikaw na ang bahala sa akin."

Nagmula ang malalim at baritonong boses na iyon sa kaniyang itaas.

Bahagyang nag-angat ng tingin si Ayella at mabilis na nagtama ang kabilang mga mata sa seryosong titig ni Wyatt.

"Mr. Fitzwilliam, ikaw rin po ang bahala sa akin," mahinhin at halos pabulong niyang sagot.

"Ang galing!" hiyaw ng maliit na dumpling sa kaniyang isip na abot-langit ang saya. "Simula ngayon, kumpleto na ako! May mommy at daddy na ako!"

Nang marinig ni Ayella ang musmos na boses na iyon, biglang may gumapang na kakaibang init at lambot sa kaniyang dibdib.

"Mommy, 'wag kang mag-alala, babantayan ko si Daddy para sa 'yo!" buong-kumpyansang deklarasyon ng dumpling. "Kapag naglakas-loob siyang lumapit o makipagflirt sa ibang babae, sisipain ko ang tiyan mo para ipaalala sa 'yo!"

Napatigil si Ayella sa kaniyang isip.

Maninisip sa tiyan para lang magpaalala? Anong klaseng plano 'yon?

Hindi napigilan ni Ayella ang bahagyang pagtaas ng gilid ng kaniyang labi. Napaka-kakaiba talaga ng batang ito.

"Anong iniisip mo?" tanong ng lalaki sa kaniyang tabi.

Mabilis na nabalik sa realidad si Ayella. "Wala naman po. Parang hindi lang talaga ako makapaniwala hanggang ngayon."

Tinitigan siya ni Wyatt. May bahagyang gumalaw na emosyon sa malamig nitong mga mata na mabilis ding nawala.

"Masanay ka rin kalaunan. TARA na," simpleng utos nito habang tumatagilid para pagbuksan siya.

Lalakad na sana silang dalawa patungo sa nakaparadang sasakyan nang biglang tumunog ang cellphone ni Wyatt mula sa bulsa nito.

Inilabas nito ang cellphone at tiningnan ang screen. Bahagyang sumalubong ang makakapal nitong kilay nang mabasa ang pangalan ng tumatawag, ngunit pinalipas din iyon agad at sinagot ang linya.

"Lola," malamig ngunit may paggalang na bungad ni Wyatt sa kabilang linya.

"Wyatt, umuwi ka sa ancestral house ngayong gabi. Nagsaayos ako ng blind date para sa 'yo," mariin at maawtoridad na bungad ng matandang boses sa kabilang linya ng cellphone. "Ang babae ay ang bunsong anak ng mga Boniel. Kakauwi lang niya mula sa ibang bansa. Maganda siya at nanggaling sa maayos na pamilya. Ikaw..."

"Lola," mabilis na putol ni Wyatt sa kaniyang pananalita. "Hindi niyo na kailangang mag-ayos ng kahit ano."

Natahimik ang matanda sa kabilang linya bago muling nagsalita, halatang naiinis na.

"Ano'ng ibig mong sabihin? Gumagawa ka na naman ba ng dahilan para takasan ako?"

maawtoridad na pangaral ng lola nito. "Sinasabi ko sa 'yo, kailangan mong pumunta ngayon! Ilang taon ka na? Lagpas tatlumpu ka na pero wala ka pa ring asawa! Gusto mo bang maputol ang lahi ng mga Fitzwilliam? Wala akong pakialam kung ano man 'yang mahalagang ginagawa mo ngayon, ipagpaliban mo 'yan at umuwi ka!"

"I am married," malamig ngunit direktang sagot ni Wyatt.