Chapter 19

KALAHATING oras na akong naghihintay pero ni anino ni Merry ay hindi ko pa nakita. Nakailang bili na rin ako ng mineral water. Nangangalay na ang puwet ko sa kinauupuan. Tayo, lakad at upo ang ginawa ko ngunit wala pa ring Merry ang dumating.

May usapan kasi kaming lalabas. Matagal-tagal na rin kasi noong lumabas kami. Nami-miss ko na rin lumabas kasama siya pero ganito pa ang nangyari.

Nakaramdam na ako ng tampo sa ginawa niya. Hindi naman siya ganito noon. Nagtaka lang ako dahil wala namang bakas na makikita sa mukha niya na may tinatago siya sa akin dati o kahit noong nasa Baguio pa ako. Pero napapansin ko minsan na tahimik siya kapag magkasama kami. At kung minsan naman kapag hindi ko siya tinitingnan ay pasimple siyang tumingin sa akin. Pero pinagkibit-balikat ko lang iyon.

“Jessy . . .”

Dahan-dahan akong lumingon sa pinagmulan ng boses. Hinihingal siyang lumapit sa akin. Kumunot ang aking noo nang mapansin ang pamumula ng kanyang braso. Kaagad napako ang mga mata ko sa kanya.