Chapter 22

Ysla

“Nakakainis ka!” bungad ko agad pagkapasok ni Nathan sa kwarto namin, agad ko na siyang sinalubong ng inis. Galing siya sa trabaho. Ako naman, nauna nang dumating dahil naka-motor ako. Katunayan ay nakapagpalit na ako ng damit at ilang minuto na ring naghintay sa kanya.

Napahinto siya sa may pinto, parang napag-isipan kung tatakbo na lang pabalik palabas. Pero tuloy-tuloy pa rin siyang naglakad papasok habang inaalis ang kanyang coat at ipinatong iyon sa ibabaw ng kama.

“Ano na namang ginawa ko?” tanong niya habang tinatanggal ang necktie, kita sa mukha niya ang pagod pero mas kita ko ang inis ko.

“Hindi pa nga ako nakakaupo, sinalubong mo na agad ako ng sermon.” Tumagilid siya para ilapag ang necktie sa ibabaw din ng kama, katabi ng kanyang coat.

“Bakit, kailan ba kita ginaganito? Ngayon lang, ‘di ba?” malakas kong sagot. Tumayo ako sa gitna ng kwarto para harapin siya nang buo ang loob. “At hindi ko ‘to gagawin kung hindi dahil sa sinabi mo kanina.”

“Ano na naman ang sinabi ko?”