Chapter 23 - Solitude

Nababalot ng kaba ang buong katawan ni Neal. Hindi niya alam kung sino ang nagpadala ng picture nila ni Diana kay Payne. Iniisip rin niyang baka si Diana lang ang may pakana ng lahat. Naghihintay siya sa mga kasunod na irereply ni Payne, ngunit dumaan ang limang minuto ay wala pa ring reply ang dalaga. 

"Payne... galit ka yata, sorry, oo mali ako hindi ko naman talaga siya pinsan, pero hindi ko rin naman siya kilala. Pero tama ka, si Diana nga 'yang nasa picture pero mali ang iniisip mo, mabilis ang pangyayari at pati ako ay nagulat." Ito ang naiipon sa isip ni Neal na hindi naman niya mai-type sa kaniyang cellphone.

Hindi na tinangkang mangatwiran ni Neal kay Payne, at magtatype na siya ng mga salita para suyuin si Payne... ngunit mas pinili niyang tumahimik nalang at plano niyang magpaliwanag ng personal. 

Sa personal, makikita niya ang totoong reaction sa mukha ni Payne, malalaman niya ang totoong gustong sabihin ng dalaga at kapag dumating sa punto na hindi na siya nito maintindihan ay yayakapin na lamang niya para bigyan siya ng isa pang pagkakataon. 

Kinabukasan pag gising ni Payne dala-dala pa rin ang inis sa puso niya nang makita ang picture ni Neal kasama si Diana. Nabuo na sa isip niya na si Diana ang nasa picture, "Ganun naman talaga siguro ang babae, malakas ang intuition." Ito ang bulong niya.

Magtatanghali na nang nagdesisyon siyang tawagan si Maya upangmagpasama sa convenient store. Gusto niyang maglibang. Gusto niyang mag-practice ng mga sasabihin niya kapag nagkita sila Neal. Gusto lang niyang tumawa, gusto niyang maging maligaya kasama ang bestfriend niya.

"Bbbbrrriiinggg.....  bbbrrrriiiingg....."

"Oh Maya, parang nag vivibrate and cellphone mo." Lumingon saglit si Brian kay Maya habang nagdidrive ito.

"Ha? Ah wait, papantayin ko lang ang kilay ko." Sagot ni Maya habang nag-aapply siya ng eyeliner sa lids ng kaniyang mga mata. 

Chinita si Maya kaya naman hindi mawawala ang guhit ng dark brown eyeliner niya upang magmukhang mayroon siyang mata. Hindi na nagawa ni Maya na tapusin ang pagme-make up niya sa bahay dahil pagkatapos niyang manghalian ay nasa gate na nila si Brian para sunduin siya.

"Naku si Payne tumatawag!" Nagulat siyang sinilip ang kaniyang cellphone.

"Hello besprend! Kumusta ka na? Ano na-confirm mo na ba kay Neal?" masigla nitong pagsagot sa cellphone.

"Oo na... hindi." nanlulumong sagot ni Payne.

"Huh? What do you mean?" Kumunot ng bahagya ang pagitan ng mata ni maya at napatingin sa kaniya si Brian.

"Magka-text kami kagabi, ok naman. Tinanong ko siya tungkol sa game niya at kung may iba pa ba siyang nakilala o nakasama sa university. Ang sabi niya wala naman dahil hindi na siya sumama kina Maven."

"Oh tapos?" Umangat ang mga balikat ni Maya sa kinauupuan niya.

"Tapos... na-wrong sent siya. Alam kong na-wrong sent siya dahil Diana ang pangalan nung nasa message niya."

"Huuuwaattt??!!! " napatakip ng bibig si Maya at nanlaki ang kaniyang mga mata. Si Brian naman ay lalong naging interesado sa kanilang kuwentuhan na parang humahaba ang mga tainga.

"Oo, you heard me right. Ang last text message niya sa akin ay may Diana na pangalan. Meaning dalawa kaming ka-text niya kagabi."

"Besprend..." bumaba ang boses ni Maya at gusto niyang i-comfort si Payne.

"Tama ka naman eh, dapat tlaga hindi na ako nagpadala sa panunuyo niya nuon. Once a playboy always a playboy."

"Wait, anong plano mo Payne?"

"Hindi ko alam... hindi ko nga alam ang sasabihin ko kapag nagkita kami ni Neal, hindi na kasi siya nag-reply nang i-send ko sa messenger niya 'yung picture na pinakita ko sa'yo."

"Huh? So inaamin niya ganun? So 'yun ba si Diana talaga? Nakuuuuuu! kapag nalaman ko talaga kung sino 'yung babaeng 'yun..."

"Ewan ko, wala siyang inamin.. ang sabi niya lang, "Payne, let me explain, it's not what you think." 

"Sige, gusto mo bang kausapin ko si Neal?" ngiting tanong ni Maya.

"Hindi..."

"Okay, gusto mo bang hanapin ko kung sino 'yung Diana na 'yun?"

"Hindi..." naiiyak na tugon ni Payne.

"Huh? Eh anong gusto mong gawin ko para gumaan ang loob mo?"

"Punta ka naman dito please..."

"Ha? Naku Payne kasi..."

Napalingon si Brian kay Maya dahil parang nag-aalangang magsalita si Maya kay Payne, "Malapit na tayo Maya."

"Sinong kasama mo? at...nasaan ka?" gulat na tanong ni Payne.

"Aah... kasi.. kasama ko si Brian..."

Lalong nalungkot si Payne at nakaramdaman ng pagkahiya,  "Ganun ba? Sorry, sige baka nakakaistorbo lang ako."

"Naku, hindi besprend ano ka ba naman?!"

"Nasaan ka? Nasaan kayo ni Brian?"

Nagpark si Brian ng kotse niya sa Parking Area ng mga performers sa recital at ngumiti kay Maya, "Let's go, magbibihis pa ako sa dressing room."

"Sss...sige." lumabas na si Maya sa kotse habang inaalalayan siya ni Brian."

"Nasaan kayo Maya?" mahinahon na tanong ni Payne.

"Aah.. oo nga pala, sorry, naku andito kasi ako besprend sa violin recital ni Brian..."

Hinawakan ni Brian ang kamay ni Maya habang naglalakad na kinalaki ng mata ng dalaga ngunit hindi niya magawang kumalas dito dahil gusto rin niya ang ganitong moves ni Brian.

"Aaahh...okay. Matatagalan ka ba?"

"Naku to tell you honestly hindi ko alam kung anong oras matatapos 'to eh, kasi 3pm talaga ang start pero andito na kami kasi may preparations pa si Brian sa backstage. Hindi ko rin alam ilan silang magpeperform eh, baka gabihin na kami."

"Aaah... so hindi mo ako masasamahan... sige ok lang ako nalang." malamig na tugon ni Payne.

"Wait, saan ka ba pupunta?"

"Wala... gusto ko lang sana pumunta sa convenient store, gusto ko lang ng may makaka-usap, pero sige okay. 

"Payne... pasensya ka na ha, first time kasi ito eh, nag-invite si Brian, pero kung alam ko lang na kailangan mo ako..." umupo na si Maya sa audience seat at nagsensyas kay Brian na okay lang siya.

"Suus... diba sabi ko naman sa'yo gusto ko maging maligaya ka, oh ayan na si Brian... isa pa, alam mo namang kayang-kaya ko naman 'toh diba? masiglang sagot ni Payne.

"Oo naman besprend! Fight lang ha?! Magkaka-ayos din kayo ni Neal."

"Sige enjoy ka diyan ha! balitaan mo nalang ako, okay, bye..."

"Ba..." bago pa man makapgsalita ng babye si Maya ay nag-end call na si Payne. Nagkibit-balikat na lamang si Maya pero may kirot sa puso niya. Hindi niya alam kung totoo bang magiging masaya siya at kasama niya ngayon si Brian o ma-gi-guilty siya dahil hindi niya madamayan si Payne sa unang pagkakataon.

"Huhuhuhuhu!!!" Humagulhol si Payne at nagtakip ng unan sa kaniyang luhaang mukha. 

Pakiramdam niya, wala siyang karamay sa ganitong sitwasyon. Hindi niya maisumbong sa mommy niya ang lahat dahil alam niyang pagagalitan at sisisihin lang siya nito. Ayaw na rin muna niyang kulitin si Neal dahil gusto niyang makapag-isip at natatakot siya sa kung anong aminin ni Neal.

"Anong gagawin mo Payne?" tanong ni Jessica sa kaniyang isip.

"Ano ka ba Jessica, kailangang maglibang ni Payne. Gusto ko lang lumabas at magpakasaya mag-isa sa Eco-Park." nakangiting sagot ni Lea.

"Hindi, mag-rereview nalang ako para sa exams para maretain ko ang grades ko." Pumalit agad si Jojo sa kaniyang katauhan.

Sa mabilis na papalit-palit ni Payne ng personality ay napaharap siya sa kaniyang salamin, "Sino ba ako ngayon? mabuti pa kayo, hindi kayo umaalis sa akin, hindi niyo ako iniiwan." nakangiti nitong sabi.

Kinuha ni Payne ng kaniyang brown mini backpack na twinning sa white backpack ni Maya. Nagbihis ito ng plain white t-shirt, fitted jeans at black flipflops.

"Mommy, alis lang po ako saglit. Pupunta lang po ako sa convenient store."

Nasa dirty kitchen ang Mommy ni Payne at ayaw niyang ipahalatang narinig niya ang paghagulhol ng kaniyang anak dahil nakikinig siya sa pag-uusap nila ni Maya kanina, "Sige, pero paalis din ako, may imi-meet akong client mamaya."

Hindi na sumagot si Payne dahil lumabas na ito ng gate bago pa man matapos ang sinasabi ng kaniyang Mommy Ayla.

Habang inihahakbang niya ang mabibigat niyang mga paa sa magagaspang na daan sa kanilang lugar sa gitna ng init ng araw at mabahong singaw ng lupa dulot ng katatapos lang na ulan ay tumingala siya sa matinding sinag ng araw na nagtatago sa mga kasisibol palang na mga ulap.

Nababalot ng lungkot ang puso niyang pinagtaksilan. Nangingibabaw ang kalungkutan sa mga mata niyang pagal sa pagbuhos ng mapapait na mga luha. Ang kaniyang payat na katawan ay pumapasang mag-isa sa hapis ng pangungulila sa kaniyang matalik na kaibigan.

Ganito ang nararamdaman ni Payne sa mga sandaling ito, nang mapagtanto niyang may iba ng mundo si Maya sa piling ni Brian at si Neal naman ay baka nakakabuo na rin ng iba niyang mundo kay Diana. Blanko ang kaniyang mukha nang pumara siya ng jeep. 

Dinaraanan niya ang mga magkasintahan, magkahawak ang kanilang mga kamay at nagtatawanan. Mayroon din grupo ng mga babaeng parang high school students na naka-uniform nagtatawanan at nagbibiruan. Naaalala-ala niya ang mga panahong magkasama sila ni Maya.

"Sige pa inggitin pa ninyo ako, normal kayo eh kaya happy kayo. Balakayojan! ", napairap at umiwas ng tingin si Payne, ito ang malungkot niyang konklusyon.

Tumigil ang jeep sa labas ng Eco-Park at bumaba si Payne ngunit may sumalubong sa kaniya...

"Neal? bakit nandito ka?" Pagtatakang tanong ng dalaga.