Chapter 64

ILANG minuto ang ginugol ni Sahara para lamang mabuksan ang lumang pinto ng lumang apartment na iyon. Agad niyang kinapa ang switch ng ilaw sa dingding at makailang-ulit pa iyong nagpatay-sindi bago tuluyang nagliwanag ang buong kabahayan.

Laglag ang balikat na nanatili siyang nakatayo sa may pintuan habang pinagmamasdan ang nakakalat pa niyang mga gamit doon sa sala, hanggang sa kusina. Ang karamihan sa mga iyon ay nakalagay pa sa loob ng malalaki at maliliit na kahon, samantalang ang iba pang hindi importanteng gamit ay nakalagay lamang sa mga itim na garbage bags.

Hindi na niya hinintay pa na itapon ni Karen ang kanyang mga gamit sa labas ng townhouse at ipagtabuyan siya. Umalis siya sa townhouse nang parehong araw, kahit pa nga hindi na siya nakapasok sa opisina, para lamang makahanap ng pansamantalang matutuluyan. Wala naman siyang malaking pera para makakuha ng magandang apartment kaya nagkasya na lamang muna siya sa isang maliit at nabubulok na