007: VISITOR

SA DALAWANG ARAW NA nakalipas ay naging maayos naman ang buhay ko. Nanny na nga ako ni Theo at masasabi kong madali lang siyang alagaan.

Susunod kaagad siya sa mga sasabihin ko lalo na kapag pinagbabawalan ko siya sa isang bagay na ikakapahamak niya. Nagmamatigas nga lang ito sa kanyang ama, palibhasa ay binibigay ni sir Alex ang lahat ng gusto ni Theo.

Nagpapakain ako ngayon ng mga isda sa fish pond. Wala kasi akong ibang magawa habang hinihintay na magising si Theo, ayoko naman siyang gisingin dahil masyado pang maaga.

"Tatiana..."

Napalingon ako sa gilid nang marinig ko ang pagtawag sa akin ni Adriana, may hawak itong malaking basket at puno ng nakatuping damit.

"Bakit?" tanong ko habang pinapagpag ang kamay kong madumi dahil sa pagkain ng mga isda.

"Ikaw na lang ang bahalang mag-ayos nitong damit ni Theo" ani niya saka itinaas ang basket.

Tumango na lang ako dahil wala na rin akong gagawin. Kinuha ko na sa kanya ang basket saka ako naglakad papasok sa loob ng mansyon. Napangiwi pa ako sa bigat ng basket pero kaya pa naman.

'Oh, sh*t!'

Mura ko ng wala sa oras dahil pagkaapak ko pa lang sa ikawalang palapag ay nakita ko kaagad si sir Alex na nasa labas ng office niya, nakatalikod ito sa akin tapos pinipindot ang cellphone niya.

Binilisan ko ang paglalakad ko habang mariing nakapikit saka tahimik na humihiling na sana ay hindi niya ako makita. Para bang kapag pumikit ako hindi maglalaho ako na para bang bula.

Nakahinga ako ng maluwag nang makapasok na ako sa kwarto ni Theo nang hindi ako nakikita ni sir Alex. Maingat kong binaba ang basket malapit sa kama ni Theo saka huminga nang malalim.

"Muntik na ako doon, a" ani ko sa sarili ko.

Iniiwasan ko kasi si sir Alex nitong nakalipas na dalawang araw. Hindi ko pa siya kayang harapin, saka makakaramdam lang ako ng awkwardness kapag nangyari 'yon. Hindi pa rin kasi ako makapaniwala na hinalikan niya ako.

Pumasok na ako sa loob ng walk in closet ni Theo nang makapagpahinga ako saglit. Isa-isa kong inayos ang mga damit niya at inilagay iyon sa tamang lagayan.

Matagal din ako natapos dahil napakadami ng damit ni Theo na kailangan ayusin. Napakalawak ba naman ng walk in closet niya tapos iyong iba kailangan talagang ayusin kasi parang basta na lang nilagay 'yong damit, hindi man lang inayos.

Nang matapos ay lumabas na ako sa walk in closet. Naabutan ko naman si Theo na nakaupo sa kama tapos nilalaro na naman iyong mga laruan niya.

"Good morning, Theo" kuha ko sa atensyon niya dahil mukhang hindi niya pa rin nararamdaman ang presensya ko dito sa loob ng kwarto niya.

Agad na nanlaki ang mata nito saka tumayo, "Mommy!!" masayang sigaw niya at nagsimula nang tumalon-talon sa ibabaw ng kama.

Lumapit ako sa kama tapos binuhat siya, agad naman niyang ipinalibot ang maliliit niyang braso sa aking leeg.

"How's your sleep, Theo?" tanong ko.

Lumapit ako sa bintana at inayos ang kurtina at bintana para pumasok ang sinag ng araw dahil medyo madilim dito sa loob.

"I sleep well, mommy" bulong niya saka sinandal ang kaliwang pisngi sa aking balikat.

BUMABA KAMI SA sala nang matapos ko siyang liguan at bihisan ng komportableng damit. Binaba ko muna siya sa carpet saka ako nagpaalam na kukuha ako ng pang-umagahan niya. Nauna na kasi si Sir Alex na kumain kanina dahil may meeting daw.

Nagsasalin ako ng orange juice sa baso habang ang ibang kasambahay ay naghahanda para sa pananghalian. Naagaw naman ng dalawang kasambahay ang pansin ko nang pumasok sila sa kusina tapos mukha pang galit ang mga mukha nila.

"Ba't ganyan hitsura ng mukha niyo?" tanong ng isang kasambahay. Akala ko ay ako lang ang nakapansin.

"Paano ba naman, nandiyan na naman si Ma'am Valerie tapos grabe na naman maka-utos. Akala mo naman siya ang nagpapasweldo sa akin" inis nitong sambit.

'Ma'am Valerie?' Sino na naman kaya itong babaeng ito? Mukhang masama ang ugali base na lang sa reklamo ng dalawang kasambahay.

"Sino 'yon?" tanong ko habang kinukuha ang plato na may lamang pancake.

Tumingin sa akin ang mga kasambahay nang tanungin ko iyon.

"Iyon 'yong babaeng ipinagpipilitan ang sarili kay sir Alex, tapos grabe 'yon mag-utos sa lahat ng kasambahay. Akala mo siya ang amo, e si sir Alex nga hindi gano'n, tapos siya? Grabe!" parang sasabog na sa inis at galit itong isang kasambahay na sumagot sa tanong ko.

'So, parang si Sheena din pala itong si Ma'am Valerie?

Napakadami namang nababaliw kay sir Alex. Siguro may susunod pa akong makikita at makikilala. Iba talaga ang kagwapuhan niya.

Maglalakad na sana ako paalis ng kusina nang marinig ko ang malakas na iyak ni Theo mula sa sala. Nagkatinginan kaming lahat saka ako dali-daling lumabas ng kusina.

Puno ng kaba ang dibdib ko nang makarating ako sa sala. Tinignan ko si Theo, nakatalikod ito sa akin kaya hindi niya ako nakitang pumasok sa sala.

May babae namang nasa harap niya at nakataas pa ang isang kilay habang nakatingin kay Theo. Mukha itong naririndi sa pag-iyak ng alaga ko.

Kumuyom ang kamay ko nang pumasok sa isip ko kung anong ginawa ng babaeng ito sa alaga ko. At kung tama man ang hinala ko ay hinding-hindi makakatakas itong babaeng ito sa akin.

Lumapit ako sa kanila, "Theo, baby, come here" malambing kong tawag kay Theo.

Agad siyang humarap sa akin ng marinig niya ako. Parang may kumurot sa puso ko nang makita ko ang hitsura niya. Basang-basa ang mukha niya sa luha pero hindi nakaligtas sa mata ko ang kanang pisngi niya na namumula.

Huminga ako nang malalim. Ang bilis ng tibok ng puso ko. Nanginginig ang kamay ko, parang gusto kong manapak.

"Mommy!!" sigaw niya sa gitna ng kanyang pag-iyak. Naawa ako sa hitsura niya, para siyang nakahanap ng kakampi ng dumating ako.

Agad ko siyang binuhat at ikinulong sa bisig ko. Isinandal ko ang mukha niya aking balikat. Nadagdagan ang galit na nararamdaman ko nang marinig ko ang hikbi niya. Marahan kong hinaplos ang likod niya habang tinitignan nang masama ang babaeng nasa harapan ko ngayon.

'Ang kapal ng mukha!'

Mamaya ka lang sa akin! Tignan natin kung may kilay ka pa bang itataas sa susunod!

"Mommy?" nanunuyang saad ng babae, "Kailan pa nagkaroon ng karelasyon si Alex sa isang kasambahay?"

Ngumisi ako, "Ano naman ngayon? Hindi mo ba tanggap kasi mas nagustuhan niya ang isang kasambahay kaysa sa'yo?"

Tumawa ito, "What the hell! Gano'n na ba kababa ang taste ni Alex para pumatol sa'yo?"

Umirap ako, "Mas lalo lang bababa ang taste ni sir Alex kung ikaw ang pinatulan niya" laban ko. Akala niya magpapatalo ako sa pangbababa niya.

Nakarinig ako ng tawa sa likod ko. Alam kong ang mga kasambahay iyon.

"What's going on here?!"