KABANATA 7

Mabuti na lang pumayag si Mrs. Al-Andas na mag-leave muna ako sa work kaya malaya kaming mag-sho-shopping ni Karina ngayong araw. Mamayang gabi naman ay dadalo kami sa engagement party ng kaniyang boss.

Business partner nga pala ni Rad ang boss ni Karina kaya posibleng makita ko siya mamaya at malamang sa malamang ay kasama rin niya ang asawa nito. Ewan ko ba ba't kailangang magpakasal para lang sa negosyo kung hindi naman nila mahal ang isa't-isa. Kahit pa para sa kapakanan ng negosyo kung ang magiging anak nila ay maiipit sa sitwasyon. Kawawa naman.

Sa isang maliit ngunit kilalang boutique kami pumunta para mamili ng susuotin naming dress mamayang gabi. Nag-suggest nga ako na mag-ukay na lang kami dahil mas mura pero binatukan lang ako ni Karina. Pero 'di bale, parang ang bantot at cheap naman namin kung dadalo kami sa isang engrandeng party tapos ukay lang ang suot namin.

"Bagay ba sa akin 'to? Ano kayang magandang hairstyle?" tanong ni Karina noong makalabas siya sa fitting room. Nakaupo ako sa sofa habang pinapanood siyang tingnan ang suot niyang dress.

Bumuntong-hininga ako dahil ika-sampung palit na niya iyon. Kahit lahat naman ng pinipili niya ay maganda at bagay sa kaniya ay hindi pa rin siya kontento.

"Nakalugay. Hindi mo naman ako kailangang tanungin dahil sa ating dalawa, ikaw ang may pinakamagandang taste sa fashion," sagot ko. Totoo naman iyon. Well, may sense of fashion naman ako pero hindi kasing-galing niya.

"Siyempre, I also need your advice 'no!" aniya, inirapan niya pa ako na kitang-kita sa repleksyon niya sa salamin.

"Iyong una na lang tas partner-an mo ng itim na stockings, mas hot ka doon," suhestyon ko. Maganda lahat pero mas sexy talaga siya sa unang dress na napili niya. Itim na dress iyon na may cape sleeve. Red, black and white naman ang theme color ng engagement party kaya hindi siya ma-o-out of place doon.

"E ikaw, bff? Okay na talaga 'yung sa'yo? Dalawang beses ka lang nagpalit," aniya bago pumasok sa fitting room para magpalit.

Kulay pulang one-hand slim dress na may slit ang napili ko at napag-isipan kong mag-bun na lang. Okay naman na iyon sa akin dahil kahit anong isuot ko ay bagay pa rin sa akin. Baka lalong maakit lang sa akin si Radzmir kapag ginalingan ko masiyado sa pagpapaganda.

"Oo, okay na 'yon. Baka mamaya pati mga tatay ng mga businessmen doon ay maghabol sa akin. Ang hirap namang maging maganda at sexy," saad ko. Narinig ko namang humagalpak ng tawa si Karina sa loob, narinig ko pa ang pagtunog ng kaniyang zipper bago lumabas at pinaningkitan ako ng mata.

"Kapal mo 'te ah, porket naka-sex mo 'yong CEO ng Al-Andas Hotel Chains lumaki na iyang ulo mo," aniya. Nag-ayos pa siya saglit sa salamin bago ako inayang magbayad sa counter.

"So, ano pala ang Balita sa inyo? Imposibleng hindi kayo nagkakasalubong," tanong niya. Natawa naman ako at umiiling-iling na binigay ang card ko sa counter.

"Ako na rin ang magbayad ng pinamili niya," saad ko na lalong ikinanlaki ng mga mata ng kasama ko, bahagya pang umwang ang kaniyang bibig.

"Hoy! Putangina! May hindi ka ata sinasabi sa akin ah!" hindi makapaniwalang saad niya. Sinundot-sundot niya pa ang tagiliran ko kaya hindi ko tuloy mapigilang tumawa ng tumawa.

"Gaga, ano ba! Pumaldo lang ako sa trabaho! Baka nakakalimutan mong ikaw ang nagbigay sa akin noong poster?" pag-depensa ko sa aking sarili. Ayoko namang malaman niya na kabit ako ni Radzmir dahil paniguradong puputak na naman siya at hindi niya ako titigilan hangga't hindi ko siya nabibigyan ng magandang rason kung bakit ko iyon nagawa.

"At saka, isipin mo na lang na libre ko 'to sa'yo pero siyempre, ikaw naman ang manlilibre sa akin next time," dagdag ko at tumatawang kinuha ang dress ko bago naunang lumabas, sumunod naman agad siya sa akin.

"Aba! Aba! Wala 'yon sa usapan! Walang ganyanan, bff!" sigaw niya noong makalabas kami sa boutique pero tinawanan ko lang siya.

Alas Otso Y Medya na noong nakarating kami sa mansion ng mga Villamore. Entrance pa lang ay masasabi ko talagang mayaman sila at sosyal. Marami na ring bisita na nakasuot ng eleganteng dress at suit. Grabe naman talaga. Marami na akong na-encounter na mayayaman pero iba pa rin talaga kapag sa mismong event ka nila nakadalo, lalo na't pinapalibutan ako ng mga sosyalin at mga importanteng businessmen at businesswomen.

Nakadalo lang naman kami ni Karina dahil favorite siya ng boss niya. Buti na lang din ay pinayagan siyang mag-imbita ng kaibigan niya kung 'di magmumukha siyang kawawa sa mga matataas na taong ito.

Halos lahat ng mga bisita ay kulay pula, puti o itim ang mga kasuotan, may mga iilan lang na nakasuot ng ibang kulay akala mo naman mga main character, panira ng theme.

Ilang minuto pa lang kami sa loob ay iniwan na ako ni Karina dahil nakita niya ang dati niyang ka-talking stage na mukhang isa ring businessman. Kapag nagkamabutihan ang mga iyon paniguradong makakaahon na siya sa kahirapan. Mabuti pa ang gagang iyon. Ako kaya? Bakit ba kasi ang agang nagpakasal ni Radzmir. Hindi man lang niya ako hinintay. Well, magaling naman ako sa mga gawaing bahay. Siya ang bahala sa pera, ako sa bahay, siyempre.

Wala naman akong kilala sa mga bisita kaya dumiretso na lang ako sa mga pagkain pero siyempre hindi pagkain ang kinuha ko kung 'di ay... wine! May mga staff namang naglalakad para mag-alok ng wine pero hindi pa sila nadaan sa akin kaya ako na lang ang lalapit sa alak. Paniguradong mga mamahaling alak ang nakahain kaya wala akong sasayangin na oras at titikman ko ang lahat ng alak!

Nakadalawang baso pa lang ako nang biglang may nagsalita sa mikropono. Lahat ay natahimik, tumigil sa kani-kanilang ginagawa at humarap sa pinanggalingan ng boses. Matatangkad na guests ang nasa harapan ko kaya hindi ko makita kung anong ganap sa harapan pero alam kong dumating na soon-to-be groom and soon-to-be bride.

Hindi na sana ako makikinig at mag-focus na lang sa mga alak at pagkain nang marinig ko ang apilyedong Al-Andas at Dela Fuerte.