Chapter 21

Masama pa rin ang loob ng Young Master sa ‘kin. Hindi ko alam kung anong dapat kong gawin. Pakiramdam ko, habang tumatakbo ang araw na hindi kami nagkikibuan gaano ay palayo rin siya nang palayo sa ‘kin.

“Anastacia, kunin mo na ang bulaklak at naiayos na,” tawag sa ‘kin ni Dama Apostola.

Kadarating ko lang din naman sa kusina. Naroon ang isang magandang pumpon ng rosas na may iba’t ibang kulay at may magandang disenyo. Iyon ay para sa prinsesa. Ito ang unang araw na pupunta ang Young Master para magsimulang kunin ang loob ng prinsesa.

Kagabi pa ‘ko nahihirapang matulog.

Kahit sabihin ko talagang maayos lamang ito at magiging sapat sa ‘kin na pangalawa, hindi ko pa ring mapigilang masaktan.

“Ingatan mo ‘yan, lahat ‘yan ay mga mamahaling bulaklak sa Vampire City.”

Nauunawaan ko naman ang sinabi ni Dama Apostola. Ang bulaklak ay mga kasunurang uri ng mga Moonshine Roses. Iyon ay mga kamukha ng bulaklak na rosas pero wala silang tinik at mababango na nakahahalina. Madalas iyong mga sangkap sa mga mamahalin ding pabango at pampaligo ng mga mayayamang bampira.

Nakasuot ako ng kasuotan ng isang servant. Ito ang bilin ni Mistress Rossana sa ‘kin.

Tatlong araw na simula nang lumabas ako ng mansion. Hindi naman ‘yon nakarating kay Dama Apostola kaya hindi ako napagalitan. Naging lihim ‘yon sa pagitan namin ng Young Master.

Naging abala rin sa mga huling araw ng pag-aaral ng Young Master bago siya pumasok sa Vampire University. Iyon ang Vampire school na pinakamalaki dahil karamihan ay doon pumapasok ng kolehiyo. Iyon ang lugar kung saan mas hinahasa na ang kanilang kakayahan. Doon na rin siya mananatili at uuwi na lamang paminsan-minsan.

Binitbit ko na ang bulaklak. Nakita ko ang Young Master na pababa na ng hagdanan.

Humanga kaagad ako sa kanya. Nakasuot siya ng mamahaling suit and tie. Hindi niya ‘ko tiningnan dahil mas napokus siya sa kanyang ina na siyang nilapitan niya pagbaba.

May kirot akong naramdaman dahil sa ganoong sitwasyon, ngingitian muna niya ‘ko.

Tuwang-tuwa si Mistress Rossana at ang lola ng Young Master nang makita ito.

Sa isang mamahaling sasakyan kami sumakay. May kalayuan ang lugar ng mga Pureblood at medyo nahuli siya ng gising kaya hindi na naging magandang sakyan sa ganitong oras ang karwahe.

Hindi kami magkatabi dahil tumabi ako sa driver.

Sa ibang pagkakataon pipilitin niya ‘kong tabihan siya at kakausapin niya ‘ko nang kakausapin. Ngingiti rin siya nang ngingiti pero ngayon ay seryoso ang hitsura niya habang nakatingin sa labas ng bintana sa backseat.

Hindi ko alam kung paano ko maaayos ang sa amin.

Ilang oras din ang inabot namin bago kami makarating sa tarangkahan ng mga Pureblood. Dahil maaga pa ay mas napagmasdan ko ang lawak at kagandahan ng mala-paraisong lugar ng mga Pureblood. Napakarami ring servants at Knights.

Nauna akong bumaba nang huminto ang sasakyan. Sumunod ang driver para pagbuksan ang Young Master. Nang makalabas siya’y palabas naman ng palasyo si Princess Alexandra. Ibang-iba ang ngiti nito, mapapansin kaagad iyong kagalakan niyang makita ang Young Master.

Naramdaman ko ang pagkain ng selos sa ‘kin ng lapitan siya ng Young Master, kunin ang kamay at halikan ‘yon. At kung sa tatlong araw na lumipas ay hindi niya ‘ko nginitian, ngayon nakita ko uli ‘yon. Pero hindi na para sa ‘kin, para na sa ibang babae.

Ang kalamigan niya sa mga babaeng nakikilala niya noon ay nararanasan ko na mismo sa kanya.

Ibinigay ko ang bulaklak sa prinsesa at nginitian naman niya ‘ko.

“Salamat, ito ang pinakamagandang bulaklak na natanggap ko,” sabi ng prinsesa na ang tingin ay sa Young Master.

“I’m glad that you like it,” sagot ng Young Master.

“Let’s go, naghihintay ang tea party natin. Pero kung may gusto kang iba na ihain sabihin mo lang at gagawin ‘yon kaagad ng mga servants.”

Nakita ko nang hawakan ng prinsesa ang palad ng Young Master. Nakagat ko ang ibabang labi ko para pigilin ang emosyon ko nang makita kong tanggapin at hawakan din ng Young Master ang palad ng prinsesa.

Maraming nakapansing servants. Iyon pa lamang, mapapansin na kaagad nino man na ang Princess Alexandra ay may pagtatangi talaga sa Young Master.

Sumama kami ni Butler Calix sa kanila. Pero hindi kami lumapit katulad ng ibang servants no’ng naroon na kami sa mismong tea party. May dalawa lamang servant ang nakalalapit sa kanila at mukhang matataas silang servant ng palasyo. Sila ang nagse-serve sa dalawa.

Makikita kaagad ang katuwaan ng prinsesa habang nagsasalita siya. Hindi ko naririnig ang pinag-uusapan nila. Pero para bang nauunawaan ko ‘yon lalo kapag nakikita kong ngumingiti ang Young Master. Ang ngiti na dati ay ipinagdadamot niya sa iba at malayang ibinibigay sa ‘kin ay napunta na sa iba. Sa ‘kin, halos hindi na niya ‘ko matingnan.

Hindi ko hinahayaang mapaluha ako kaya pigil na pigil ako sa emosyon ko.

“Sa tatlong Young Master, ang Bezarius ang mukhang gustong-gusto ng prinsesa Alexandra,” narinig kong bulong ng isang servant.

“Totoo ‘yon, mukhang iyong iba ay kaswal lamang niyang kinakausap. Isa pa, hindi sila magkasundo ng isa naman,” sagot ng isa.

“Balita ko naman ay may iba na raw talagang nagugustuhan ang Young Master na ‘yon. Mabuti na lamang at mukhang kasundo at pareho ang nararamdaman ng prinsesa at ang Young Master ngayon.”

Pinigil kong makinig sa kanila. Nakikita ko naman. At mas napatunayan dahil sa sinabi nila.

Lumingon sa bahagi namin ang prinsesa at nagkatitigan kami. Ngumiti siya kaya lumingon ako sa ‘king likuran pero wala naman. Nang bumalik ako ng tingin ay nakatalikod na uli siya sa ‘kin.

“Ikakasal na rin sila kaagad kung sakaling siya na ang mapili ng prinsesa,” narinig kong sabi na naman ng isa sa servant na nagkukuwentuhan.

“Mukhang nakapili na naman ang prinsesa. Ibig sabihin, may maganda at malaking piging na naman tayo.” Mukhang tuwang-tuwa sila.

Sa loob ng siyam na taon ko sa lugar ng mga bampira, isang beses pa lamang akong nakarinig na may ikinasal na Pureblood. At ang kasal nga nila ay isang malaking pista ang dating. Lahat halos ay imbitado at tumatagal ang kasiyahan ng magkakasunod na pitong araw. Lahat ng gabi ng pitong araw na ‘yon ay nasa sayawan at bumabahang handa’t alak.

Nabigla ako nang tila may humila sa ‘king buhok malapit sa tainga.

Nabigla rin si Calix sa ‘kin.

Tiningala ko siya dahil halos kasing-taas siya ng Young Master.

“May dahon na maliit na dumikit sa buhok mo inalis ko lang. Hindi ko sinasadyang maramdaman mo,” nahihiyang aniya.

Nginitian ko siya. “Salamat, malalim lang ang iniisip ko kaya hindi ko napansin.”

“Akala ko magagalit ka,” nangiti rin siya.

Si Calix ang isa sa pantasyang Butler ng mga servants. May kulay mais siyang buhok at magandang hitsura. Sabi nga, mukha raw itong prinsipe. Siya ay isang Half-Vampire. Ang pamilya nila ay matagal ng nagsisilbi sa mga Bezarius at halos magkadugo rin sila dahil may mga kapamilya silang naanakan ng Bezarius. Iyon lamang, ang apelyido ay nakukuha lamang ng pinalalaki ng mga Royal Blood. Ang iba sa kanila ay kadugo lamang ang tawag pero ang apelyido nila katulad ni Calix ay kung ano ang apelyido ng kanilang ina. Sa pagkakaalam ko ay sa pamilya ng kapatid ni Mistress Rossana siya nagsisilbi at ang kapatid ni Mistress Rossana ang ama nito. Pero hindi ito pinalaki bilang anak sa loob dahil may anak ng dalawa ang kapatid ni Mistress Rossana at sapat na ‘yon. Madalas ang mga Half-Vampire ay nakakapasok lamang sa mismong mansion kung walang anak talaga na isang true blooded Vampire ang ama o ina ng mga ito.

Pagdiretso ko ng tayo at muling pagtingin sa Young Master ay masama ang tingin niya sa ‘kin.

Nagtindigan ang balahibo ko. Pero hindi naman nagtagal ang pagtitig niya dahil hinawakan ng prinsesa ang pisngi ng Young Master.

Natutok ang Young Master sa prinsesa, halalta ang pagkabigla niya sa sinabi ng prinsesa. Hindi ko alam kung bakit. Pero iyong pagkabigla niya ay nauwi sa pagngiti at pagsagot dito.

Hindi ko alam kung gusto kong marinig o hindi ang kanilang pinag-uusapan.

Oo, gusto kong marinig para hindi kung ano-ano ang tinatakbo ng isipan ko.

Hindi, dahil baka nga tungkol na sa kanila at pagpapakasal ang usapan nila. Baka doon, hindi ko na mapigilang umiyak sa harapan ng Young Master. Ngayon pa lang, parang nanginginig na ang tuhod ko.

Maya-maya ay tumayo na sila naglakad-lakad at muling nag-usap. Mukhang hindi sila nawawalan ng usapan. Nagkakasundo sila nang husto.

Nang pumasok sila sa loob ay kasunod kami ni Calix at dalawang servants na silang nag serve rin kanina. Nabigla pa ‘ko nang ang hinintuan nila ay isang silid na pribado.

Lumingon ang prinsesa. “Kung may maghanap sa ‘kin, pakisabi na nasa pribadong gawain ako at hindi maaaring istorbohin. Kusa akong lalabas.” Ngumiti ‘to.

Hindi ko alam kung marumi ang isipan ko pero bakit pakiramdam ko may mangyayari kaagad sa kanila?

Alam kong ang pakikipagtalik ay isang pangkaraniwang bagay lamang sa mga bampira. Parang isa ‘yon sa paraan ng pagkilala ng mga ito sa isa’t isa. Pero hindi ko inaasahan nag anito kabilis.

Nang magkatinginan kami ng Young Master ay nag-iwas kaagad siya ng tingin.

Pumasok sila ng silid at nakatitig ako sa pintuan hanggang tuluyang sumara ang pinto.

Nanlalamig ang buong katawan ko.

Kailangan kong magpakatatag. Kailangan kong tiisin ang sarili ko. Para ito sa ikabubuti niya. Para ito sa kanya. Hindi ko siya masasamahan ng habang panahon. Mas maganda ang kalalagyan niya kung magiging asawa siya ng isang Pureblood. At kung pipigilan ko siya, maaaring pagsisihan niya rin ‘to dahil ako ang pinili niya. Okay lang ako, okay lang ako.

Pasimple kong pinahid ang luha ko. Ilang ulit ko ‘yong ginawa dahil ayaw tumigil.

Hanggang may isang nag-abot sa ‘kin ng panyo. Si Calix ‘yon, nakaharang siya sa ‘kin kaya hindi napapansin ng dalawang kasama namin na umiiyak ako.

Hindi siya nagsasalita. Alam naman ng lahat kung ano ang mayroon kami ng Young Master. At alam na alam niya kung ano ang ginagawa ng dalawa.

Panay ang pagluha ko. Alam kong matagal din akong nagluluha nang nagluluha at kahit anong pigil ko ay hindi ko talaga mapigilang ang pagbagsak no’n.

Tatlumpung minuto siguro akong gano’n bago ako natapos.

Nang mapansin siguro ni Calix na maayos na ‘ko ay nagpaalam siya sa ‘kin saglit.

Inabutan pa ‘ko ni Calix ng bottled water pagkabalik niya.

Ininom ko naman ‘yon dahil parang natuyuan ako sa pagluha.

Huminga ‘ko nang malalim at marahang bumuga ng hangin.

Tatlong oras, tatlong oras kaming naghintay bago bumukas ang pintuan. At ang una ko kaagad napansin sa Young Master ay ang mapula sa kanyang leeg, tatlo ang kitang-kita at alam ko kung ano ‘yon.

Nakagat ko ang ibabang labi ko. Ako ang nag-iwas ng tingin sa kanya dahil baka maluha na naman ako. Ayokong makita niyang nasasaktan na ‘ko nang husto.