Chapter 3

Pagkaalis ni Alfred sa kwarto, muling nanahimik ang paligid. Nakakabingi ito.

Nakatayo pa rin si Clark sa harap ng bintana, nakatanaw sa mga taong naglalakad sa kalye sa ibaba.

Nasa kanto na noon si Alyanna, iniunat niya ang kanyang braso upang tumawag ng masasakyan, ngunit tuloy-tuloy lang ang pagdaan ng mga kotse. 

Walang taxi ang huminto para sa kanya. Para bang itinakwil siya ng buong mundo, at napaka-awkward ng feeling para sa kanya kung titingnan.

Hindi niya alam kung gaano katagal ang oras na lumipas, pero naubos na ang sigarilyong hawak ni Clark noon bago pa man makasakay si Alyanna ng taxi at tuluyan nang umalis ng building.

"Mr. Benitez,nahanap ko na po kung sino ang nagpadala ng babae para sa inyo kagabi," muling pumasok si Alfred sa kwarto ni Clark. 

"Ang babaeng nakatabi mo rito sa kwarto kagabi ay si Alyanna Suarez. Isa siyang  hindi kilalang entertainment reporter. Kadalasan, sinusundan niya ang mga celebrity at palihim na kinukuhanan ng ilang pictures ang mga ito.”

Sa isip-isip ni Clark, ‘isa pala siyang paparazzi.’

"Agad na tingnan ang buong kwarto ko," malamig na utos ni Clark kay Alfred. Tila ba nahulaan na niya ang tunay na layunin ni Alyanna kaya pumunta siya sa kwarto nito kagabi at sumiping pa sa kanya.

Titingnan ang buong kwarto? Bakit?

Natigilan si Alfred sa loob ng kwarto ng ilang sandali bago niya naintindihan ang gustong ipagawa ni Clark sa kanya. Iyon ay tingnan kung may camera ba sa loob ng kwarto niya na pwedeng nilagay ni Alyanna kagabi.

Sikat si Clark Denver sa mundo ng negosyo. Maraming mabababang uri ng reporter ang nagtangkang maglagay ng camera sa mga kwarto ng hotel na tinutuluyan niya noon pa man.

Ngunit dahil palaging mag-isa si Clark, kahit pa matagumpay silang makapaglagay ng camera, wala rin silang makuhang kontrobersyal na pangyayari sa buhay nito kahit na ano pa ang gawin nila.

Tulad ng inaasahan ni Clark Denver, nakakita si Alfred ng isang wireless na pinhole camera sa loob ng kwarto.

Nang makita ito ni Clark, nanlilimahid ang kanyang mukha sa galit niya kay Alyanna.

‘Ang galing mo talaga, Alyanna. Para lang makagawa ka ng mainit na balita na ikakataas mo sa kumpanya, handa kang isakripisyo ang sarili mong katawan sa akin! Anong klaseng babae ka?!’

"Itapon mo na ang camera na iyan. Huwag na huwag sanang kakalat ang balitang ito. Wala ni isang kompanya ng media sa Manila ang puwedeng makaalam nito, lalo na si Alyanna. Kung hindi, gulo ang ihahatid ko sa buhay nila. Huwag na huwag nila akong kakalabanin dahil hindi nila magugustuhan kapag nagalit ako," malumanay ang boses ni Clark nang sabihin niya iyon. 

Ngunit habang siya’y nagsasalita, tila ba karaniwan lang sa kanya ang sirain ang karera ng ibang tao. 

"Opo, Mr. Benitez. Masusunod po,” sagot ni Alfred pero ramdam ang takot sa kanyang boses nang sabihin niya iyon.

Pagkabalik ni Alyanna sa kanyang dorm sakay ng taxi, agad siyang nagmamadaling pumasok sa banyo para maligo. Tumayo siya sa ilalim ng shower nang hindi matukoy kung gaano katagal. Ang mainit na tubig ay nagpasugat sa kanyang balat, ngunit hindi nito maalis ang sakit at sama ng loob sa kanyang puso.

Ang mga salita ni Clark ay sobrang sakit, sagad sa buto. Tinawag siyang malandi at pinagbantaan na papatayin pa siya. Lahat iyon ay patuloy pa ring umuukilkil sa kanyang isipan.

Naupo siya sa sahig, yakap ang kanyang ulo, at humagulgol. Walang pakialam kung marinig siya ng iba sa dorm.

"Clark, bakit mo ako sinabihan nang gano'n? Hindi ako gano'ng klase ng tao. Hindi ko ibinebenta ang katawan ko para lang sa pera. Bakit hindi mo ako mapaniwalaan? Noon, pinapaniwalaan mo lahat ng sinasabi ko..."

Hindi maintindihan ni Alyanna kung paano sila nauwi ni Clark sa ganitong sitwasyon. Magkaklase sila noong high school, parehas din ng university noong college  at minsang nagsama sa iisang bahay. Pero bakit ngayon, para silang mortal na magkaaway?

Ayaw niyang maging kaaway si Clark Denver Benitez. Masakit para sa kanya iyon at hindi maganda sa pakiramdam.

Mula nang ituring siyang kaaway ni Clark, huminto siya sa pag-aaral, nawalan ng trabaho, at iniwan ang kanyang tirahan.

Bawat araw sa kanyang buhay ay naging bangungot, para siyang nahulog sa isang walang hanggang bangin ng sakit at pighati. Para siyang lumulutang sa isang malalim na dagat, pilit na lumalangoy, ubos ang lakas, ngunit hindi pa rin makarating sa pampang.

Pagkatapos maligo at matapos ang kanyang pag-iyak, narinig ni Alyanna ang tunog ng kanyang cellphone.

Tawag iyon mula sa kanyang kasamahan sa trabaho na si Kira.

"Kira, ikaw ba ang—" Sagot ni Alyanna sa tawag at handa na sanang itanong kung bakit siya nasa kwarto ni Clark kagabi.

Ngunit laking gulat niya nang marinig si Kira na nagsabing, "Alyanna, pinapasabi ni boss na tanggal ka na sa trabaho. Effective today.”

Nabigla si Alyanna at ilang segundo pa bago siya naka-react, "Si boss ba talaga ang nagsabi niyan? Bakit niya ako tinanggal? Anong kasalanan ko?"

Nakarinig na lang siya ng sound sa kabilang linya. Pinatay na pala ni Kira ang tawag. Basta na lang itong binaba at hindi na nagpaliwanag.

Lalong umiyak si Alyanna dahil hindi na niya alam ang nangyayari sa kanya. Una, nakita niya ulit si Clark Denver Benitez pagkatapos ng ilang taon.

Tapos ngayon, sasabihin ni Kira sa kanya na wala na siyang trabaho? Makatao pa ba iyon? Sa pagkakaalala niya, wala naman siyang ginawang masama.

Sa katunayan ay siya nga pa nga ‘yong ginawan nang masama. Bigla na lang siyang iniwan ni Kira roon sa tabi ng isang Clark Denver Benitez.

Pero sa isip-isip ni Alyanna, wala namang mangyayari kung iiyak siya. Nangyari na ang nangyari. 

Matapos kumalma ay nagbihis siya at nagpalit agad ng sapatos. Nagmadali din siyang lumabas.

Hindi siya puwedeng mawalan ng trabaho. Lalo na ang pagiging reporter.Kailangan niya ng pera.

Kailangang pumunta siya sa kumpanya para alamin ang tunay na dahilan kung bakit nawalan siya ng trabaho. Hindi siya puwedeng basta-basta na lang tanggalin ng kanyang boss nang walang dahilan o paliwanag.