Chapter 3

Hindi maipinta ang mukha ni Abigail habang nakasakay sa pickup ng nagngangalang Axis. Kung 'di siya nagkakamali ay ito ang binanggit ng magulang niya na may-ari ng bahay na tutuluyan niya. Hindi niya alam kung paano nila nakilala ang lalaking 'to na parang hindi naliligo. Nang sumilip ito sa bintana ay halos lumuwa ang mata niya nang makita ito.

Magulo ang mahabang buhok nito na basta lamang nito tinali. Ang suot nitong pang-itaas ay luma at kupas na. At nang bumaba siya ay 'di na niya napigilan ang pagngiwi niya nang makita ay suot nitong itim na jogging pants. May butas iyon sa tuhod at may mga mantsa pa. At ang sapin nito sa paa ay itim na tsinelas. Kung puwede lang ay hindi niya gugustuhin ang mapalapit sa lalaki pero nilunok niya lahat ng pagkasura niya.

Bakit nga ba siya biglang tinapon ng magulang niya rito?

Maasim na napangiti siya nang maalala ang dahilan. Sinamantala niya na nasa business conference ang magulang niyaatt nag-host siya ng party sa mismong bahay nila. Maayos naman iyon sa una pero nagkagulo nang biglang dumating ang mga police. Nag-report ang kapitbahay nila dahil sa ingay na nagmumula sa kanilang bahay. May mga underage pa na dumalo kaya isa ito sa naging dahilan para mapauwi ng wala sa oras ang magulang niya. Sa galit nila ay nagdisisyon na silang 'itapon' siya rito.

Kahit na labis ang pagtutol niya ay hindi siya pinakinggan ng kaniyang magulang. Lalo na ang kaniyang ama na kung pina-freeze lahat ng cards niya at grounded pa siya.

"Narito na tayo," sabi ni Axis na pumutol sa pagbabalik tanaw niya.

Nang tumingin siya sa labas ay gilalas na kumuyom ang kamao niya. Nasa gitna sila ng palayan at tanging maliit na bahay ang nakatayo sa gitna ng bukid.

Pinagbuksan siya ni Axis ng pinto at parang ayaw na niyang bumaba ng sasakyan. Pero napilitan pa rin siyang bumaba. Pagtapak pa lamang niya ay nanlaki ang kaniyang mata at napasigaw nang bumaon sa lupa ang takong ng sandal niya. Kung hindi siya naging maagap na humawak sa pinto ng sasakyan ay baka natumba na siya.

"Oh my! Sh*t!!" malutong na mura niya at pulang-pula ang pisnging pilit niyang iginagalaw ang paa para mahugot niya ang takong ng sandals niya. Mas lalo pang kumulo ang kaniyang dugo nang makitang nakakuyom ang kamaong itinapat ni Axis iyon sa bibig at tumikhim. Halatang pinagtatawanan nito ang nangyari sa kaniya. "Are you laughing at me?" gigil na sikmat niya sa binata na agad ibinaba ang kamay at painosenteng tumingin sa kaniya.

"Tulungan na kita," alok nito at umuklo sa paanan niya. Bago pa niya mahulaan ang gagawin nito ay inalis nito ang suot niyang de-takong na sandals niya.

"What the h*ck are you doing??" horrified na bulalas niya lalo pa ng bitbitin nito ang sandals niya. Kinikilabutan siya na nakatapak siya sa maduming lupa nang walang suot na tsinelas.

"Tinutulungan ka na maayos na makalakad dito sa bakuran ko," balewalang sagot ni Axis at binalingan si Roger na nakamasid lang sa kanilang dalawa. "Tulungan mo akong ipasok ang bagahe niya. Pagkatapos ay imaneho mo na muna itong pickup sa inyo para maiuwi mo ang mga binili mo."

Tumango si Roger at ibinaba ang mga bagahe niya sa likod ng sasakyan. Habang si Axis ay binuksan ang pinto ng bahay nito.

Ilang beses siyang humugot ng malalim na hininga para kalmahin ang sarili niya. Pero kahit anong gawin niya ay umiinit pa rin ang ulo niya at parang gusto na niyang sumigaw sa iritasyon. Gusto niyang hablutin ang susi ng pickup sa kamay ni Axis para patakbuhin ang iyon at bumalik siya sa America.

Hindi talaga niya kaya ang tumira sa gitna ng bukid na 'to. Na sa tingin niya ay walang internet at signal. Idagdag pa na wala man lang siyang makitang ibang tanawin kundi ang mga bukirin.

Pinigilan niya ang mapaiyak dahil pakiramdam niya ay itinakwil na siya ng pamilya niya sa pagdala sa kaniya rito. Kung puwede lang niyang ibalik ang oras ay hindi na sana siya nagpa-party sa bahay nila at pumunta na lamang sila sa bar.

"Pumasok ka na sa loob Miss at magpahinga," ani Roger na sumakay muli sa pickup. "Huwag mong hinatayin na ayain ka ni Axis dahil abala na iyon sa pagluluto sa kusina."

Kahit na diring-diri ang paa niya ay naglakad siya ng barefoot at pumasok sa loob ng bahay. Maliit ang sala ng bahay pero kompleto ang sala set. Ang mesa at mga sofa ay gawa sa pine trees. May maliit na TV din doon pero hindi niya alam kung gumagana pa ba iyon o hindi.

Napatingin siya sa bukana ng kusina nang dumungaw soon si Axis na may hawak na baso ng tubig. Inilapag nito iyon sa mesa at ngumiti.

"Uminom ka muna habang hinihintay na makapagluto ako bago tayo kakain ng lunch. Kung gusto mo naman na magpahinga ay pumasok ka sa pintong iyon. Iyon ang magiging kuwarto mo. Dinala na namin doon ang mga gamit mo." Itinuro nito ang isang pinto.

Bumalik muli sa kusina si Axis. Pigil ang iyak na kinuha niya ang baso at ininom lahat ang laman 'nun. Pagkatapos ay muling inilapag at nilapitan ang pintong tinuro nito. Pagbukas niya ay nanlambot ang tuhod niya at pakiramdam niya ay nabuhusan siya ng nagyeyelong tubig sa nakita.

Maliit ang kuwarto at mas malawak pa ang banyo niya sa kanilang bahay sa America. Ang kama ay maliit din at may lumang aparador sa gilid.

Nagliliyab sa galit ang matang nagmartsa siya papunta sa kusina. Humarap agad sa kaniya ang binata na ngayon ay walang suot na pang-itaas.

Hindi niya alam kung dahil bakat sa mabibigat na trabaho si Axis kaya maganda ang pangangatawan nito. Lalo na ang abs nito na nakakatakam. Parang inaakit siya nito na pisilin at haplusin iyon. Halatang umitim lang ito sa araw-araw na nakabilad sa araw pero napaka-attractive pa rin tignan ang katawan niyo.

"May kailangan ka?" kaswal na tanong nito.

She snapped in her trance and pointed her finger at him. Halos umusok na ang ilong niya sa inis. "You expect me to sleep in that bed without any cushion or mattress? Are you kidding me?"

Itinaas nito ang kamay kaya napahinto siya sa masungit niyang paglilitanya. Masama ang tingin na tinignan niya ito.

"Puwede bang magtagalog ka at hindi ko maintindihan ang sinasabi mo," wika nito. "Isa lang akong hamak na magsasaka at walang pinag-aralan kaya kahit simpleng Ingles ay hindi ko maintindihan," hindi man lang nahiyang pag-amin nito.

"You!!" Namumula na ang mukha niya sa galit at napapadyak sa inis. Sa lahat ng nakilala niyang lalaki ay ito lang nagagawang buwisitin siya kahit wala itong ginagawang masama. "Ang sabi ko ay patutulugin mo ako roon na walang unan at kutson!!"

Animo napaisip ito. "Bukas na ako pupunta sa crosstown para maghanap ng kutson at nakalimutan ko kanina na bumili. Sa ngayon ay tiisin mo muna ang humiga sa matigas na kama. Kung ang unan naman ay tignan mo sa aparador at may dalawa roon. May banig at kumot din nga pala roon na puwede mong gamitin."

Pagkatapos sabihin iyon ay hinarap muli nito ang niluluto. Ngali-ngaling hablutin niya ang thermos at ibato sa nakatalikod na lalaki. Napaka-insensitive nito at hindi man lang inisip na ang katulad niyang laki sa ibang bansa ay hindi sanay sa ganitong klase ng pamumuhay.

Mariing pumikit siya bago impit na tumili at nagdadabog na bumalik sa kuwarto. Pabalibag na isinara niya ang pinto at namawyang sa gilid ng kama. Pinasadahan niya ng tingin ang matigas na kama at naiisip pa lang na doon siya matutulog mamayang gabi ay gusto na niyang umatungal ng iyak.

"How can I possibly sleep this kind of bed??" mangiyak ngiyak na bulalas niya. "Oh, Dad!! How can you punish me like this?"

Sumalampak siya ng upo sa malamig na sahig at animo latang-lata na humikbi siya. Hindi niya lubos maisip na darating ang araw na mararanasan niya ang ganito. Nasanay siya sa marangyang buhay kaya pakiramdam niya sa oras na 'to ay pinagsakbluban siya ng langit at lupa. Feeling niya ay inabandona siya ng mundo.

Exaggerated man ang nararamdaman niya ay iyon ang saloobin niya sa oras na 'to. Paano siya mabubuhay dito na walang kahit anong entertainment na puwede niyang pagkaabalahan?

Baka 'pag tumagal pa siya rito ay makakalbo siya dahil sa frustrations. Idagdag pa ang nakakaimbyernang Axis na 'yun. Na hindi yata makaramdam kahit na naiinis siya rito.

"Ang sarap kalmutin sa mukha!" gigil na bulong niya.