Chapter 03

HALOS dalawang linggong hindi nakasama si Athana sa kanyang mga kasama sa misyon nila dahil nagkasakit ang kanyang bunsong anak na si Thana. Nang gumaling na ito ay bumalik na rin siya kinabukasan sa trabaho.

"Miss, Eight! Namiss ka namin." Sabay na sigaw ni Bel at Shine.

Si Shine ay bagong miyembro sa grupo ni Athana.

Umupo kaagad si Athana sa tabi ni Bel, at kaharap niya ngayon si Shine na halos abot langit ang ngiti nito habang nakatitig sa kanya.

"Pasensya ka na, Shine. Ngayon lang kasi ako nakabalik, hindi tuloy natin na-celebrate 'yong pagpasok mo sa grupo namin." Saad ni Athana.

"Naku, ayos lang 'yon, Miss Eight. Hindi na po kailangan, saka mas importante po 'yong maalagaan mo 'yong anak mo para mas mabilis gumaling. Ganyan din po kasi ako noon kapag may sakit ako. Mas gusto ko po iyong nasa tabi ko lang ang nanay ko sa tuwing may lagnat po ako." Saad naman ni Shine.

Nginitian na lamang siya ni Athana.

"Nasaan yung iba? Bakit wala sila rito sa warehouse?" Biglang tanong niya kay Bel at Shine.

"Hindi namin alam. Lumabas silang lahat at hindi nila kami isinama ni Shine." Sagot naman ni Bel sa tanong niya.

Maya-maya lang ay dumating na ang mga kasamahan nilang lalaki na sina Jugs, Gun, Prince, at Drew. Si Prince ay dati na nilang miyembro, at si Gun naman ay galing sa kabilang grupo. Lumipat siya sa kanila noong araw din na nakita nila siyang binubugbog ng kanyang mga kasamahan. May tatlo pa sana silang kasamahan, ngunit namatay ang mga ito nang magkaroon ng aberya sa kanilang misyon.

"O, andito na pala sila... Saan kayo galing?" Tanong ni Athana sa kanila nang makalapit na ang mga ito.

"Tumambay muna kami sa isang bar kanina, tapos narinig namin na nawawala raw ang isang leader na si Big Nine kasama na rin 'yong mga miyembro niya." Saad naman ni Jugs bago ito naupo sa tabi ni Bel.

Hinawi naman ni Bel ang kamay ni Jugs nang umakbay ito sa kanya.

"May balita ba kayo kung ano raw ang nangyari sa kanila?" Mausisang tanong ni Athana.

"Ang sabi lang sa akin ate noong nagtanong ako—" naputol naman ang sasabihin ni Gun nang bigla silang magkantiyawan, maliban kay Shine na nagtataka lang.

"Woah! Tinawag ka niyang "ate" miss eight." Natatawang sabi naman ni Bel.

Napailing na lamang si Athana.

"Bakit, ano bang gusto mong itawag ko sa kanya? Kuya ba dapat?" Pabalang na sabi ni Gun.

Umakto naman si Bel na kunyare ay susuntukin niya si Gun. Muli naman silang nagtawanan.

"Pagpasensyahan mo na itong si Gun, Bel. Kanina pa kasi namin ito binibiro." Natatawang sabi ni Jugs, at nakitawa na rin sina Prince at Drew.

"Walang namang masama ro'n kong tawagin niya akong ate. Mas matanda naman talaga ako sa kanya. Kaya dapat lang talaga na tawagin niya akong ate." Depensa naman ni Athana, dahil wala naman talagang namamagitan sa kanilang dal'wa ni Gun.

Tumahimik na sila at tumayo na rin sila nang makatanggap ng text si Athana mula kay Boss Cheng na may bago na naman daw silang misyon. Nagtungo kaagad sila sa may opisina nito.

Inilapag ni Boss Cheng ang isang envelope sa kanyang mesa.

"Pag-aralan ninyong mabuti ang paglusob ninyo sa bodega ni Sergeant Rafael. Nand'yan na lahat ng impormasyon na kailangan ninyo." Saad nito.

Kinuha naman ni Athana ang envelope.

"Ano pong meron kay Sergeant Rafael?" Mausisang tanong niya.

Umupo muna si Boss Cheng bago niya sinagot ang tanong ni Athana.

"Si Sergeant Rafael ay may kasong panggagahasa ng isang menor de edad. At naulit pa ito ng tatlong beses ngunit walang lumabas na kahit isang kaso mula sa kanya sa medya dahil inilihim lamang nila ito."

Nanlumo naman si Athana nang marinig niya ang sinabi ni Boss Cheng.

"Wala na talagang awa ang ibang mga tao ngayon." Wala sa sariling sabi ni Athana.

Umalis na sila at bumalik na sa warehouse. Doon, inumpisan na nilang planuhin ang lahat, dahil hindi naman puwedeng basta-basta na lamang silang pupunta sa bodega ng target nila dahil baka malagasan pa siya ng kasamahan, kagaya noong nangyari dati.

Kinabukasan din ay nagpunta na sila sa misyon nila. Kagaya nang nakagawian nila, sa gabi na nila isinagawa ang misyon nila.

Pagkarating nila sa labas ng gate, nagmamasid muna sila sa buong paligid. Napapalibutan ng guwardiya ang buong bodega at sigurado rin sila na may mga tauhan din si Sergeant Rafael roon sa loob. Nagdadalawang isip na ang kanyang mga kasamahan, ngunit buo pa rin ang loob ni Athana.

Napagdesisyonan nilang lumipat na lang muna sa mansyon ni Sergeant Rafael dahil mukhang mga droga lang ang nasa loob ng bodega ni Sergeant, dahil nakita nilang may lumabas na tatlong tao mula sa loob na nakasuot ng personal protective equipment.

Sinimulan na nilang akyatin ang likod ng bahay ng kanilang target. Nagpahuli na si Gun para makatungtong sa kanyang balikat si Athana. Sobrang dilim sa kuwartong pinasukan nila kaya gumamit na lamang sila ng maliliit na flashlight.

Isang puting kuwarto lang ang napasukan nila. Wala itong kahit na anong mga gamit sa loob. Sinimulan na nilang magsilabasan para pasukin ang lahat ng mga kuwarto, at para mas mabilis din silang makakilos. Si Shine na ang inatasan nilang magbantay sa bawat galaw ni Sergeant Rafael dahil nasa trabaho pa naman ito, at sinadya talaga nila iyon na si Shine ang piliin dahil baguhan pa naman ito sa grupo nila. Kulang pa rin kasi sa kaalaman at practice si Shine, saka kasama niya rin naman ngayon si Prince. Ito ang nagmaneho ng sasakyan dahil hindi pa marunong magmaneho si Shine.

Napatigil si Athana sa pagpihit ng pinto ng susunod na kuwartong papasukan sana niya nang biglang tumawag sa kanya si Shine. Nakasuot naman siya ng earbud sa isang tainga niya kaya hindi naman niya mabubulabog ang mga security sa labas ng bahay.

"Miss Eight, this is Shine. The target is moving. I repeat, the target is moving."

Kaagad na tinawagan ni Athana ang kanyang mga miyembro na magmadali. Lumipat na rin sina Jugs at Drew sa kuwartong pinasukan ni Bel, dahil nandoon ang lahat ng mga pera ni Sergeant Rafael nakatago.

Pinuntahan ni Athana ang kanyang mga kasamahan at naabutan niya sila roon na inilalagay ang lahat ng mga pera ni Sergeant Rafael sa dala nilang itim na mga bag.

"Dalian n'yo na. The target is moving." Maawtoridad na sabi ni Athana.

Napahinto naman sila sa paglalagay ng mga pera nang biglang may narinig silang boses mula sa ibaba. Sinenyasan sila ni Athana na huwag mag-ingay, saka siya sumilip sa may pintuan.

Nakita ni Athana ang isang matipunong lalaki na kausap ng isang guwardiya na mukhang pamilyar sa kanya kahit ngayon pa lamang niya ito nakita.

Mayroon siyang matikas at matigas na panga, a neatly groomed beard, matangos na ilong at kissable na lips. Makapal din ang kanyang madilim na buhok na inayos nang may bahagyang alon. Ang attractive ng lalaking ito sa kanyang paningin.