Chapter 1.1

Continuation....

PAGKATAPOS isauli ni Athana ang mga gamit na kanyang nakuha ay dumiretso na kaagad siya pabalik sa kanilang bahay. Muntikan pa siyang matumba pagkalundag niya sa may balkonahe nang makita niya si Gun na nakaupo sa may sahig sa gilid ng kama habang mahimbing pa rin na natutulog ang kanyang mga anak.

Mukhang hinihintay siya nitong dumating. Ilang beses na niya itong ginagawa ngunit ngayon lamang siya nahuli ng isa sa mga miyembro niya.

Nagkunwari siya na parang walang nangyari, saka niya sinenyasan si Gun na sumama sa kanya sa baba. Nag-usap sila sa may hagdanan.

"Anong ginagawa mo rito, Gun?" Siya na ang unang nagtanong dito.

"Tuwing alas tres ng madaling araw ka ba talaga umuuwi rito sa inyo, Miss Eight?" Tanong niya kay Athana habang pinaglalaruan ng kanyang mga daliri ang kanyang itim na mask.

Sinulyapan siya nito saglit bago sumagot.

"Hindi. May inasikaso lang ako." Matipid na sagot ni Athana kay Gun.

"Bakit may sariling kompanya ka ba na kailangan mong asikasuhin ng ganitong oras, Miss Eight?" Seryoso ang tono ng boses na tanong ni Gun.

Napakunot naman ang kanyang noo.

Bakit ganito si Gun sa kanya? Gusto niyang ituring ito na parang isang tunay niyang kapatid dahil mas matanda siya rito, ngunit parang ayaw pa ng binata kahit maging magkaibigan man lang silang dalawa.

"Huwag mong pakialaman ang buhay ko, Gun. Ako ang pinuno ninyo, kaya sumunod ka sa akin." Maawtoridad na sabi niya.

"Fine. Just be safe and vigilant, Miss Eight. Hindi puwedeng may mangyaring masama sa 'yo." Huling saad ni Gun bago siya iniwan nito na nakaupo sa may hagdanan.

Mas lalo naman na napakunot ang kanyang noo.

Totoo kaya ang mga sinasabi ng kanyang mga kasamahan na may gusto raw sa kanya si Gun? O baka naman concern lang talaga sa kanya si Gun dahil siya ang pinuno ng grupo nila?

Napailing na lamang siya at pumasok na sa loob.

Naghilamos muna siya bago nagbihis ng pantulog na damit. Saktong paglabas niya ng banyo ay nagising naman ang kanyang bunsong anak na si Thana kaya agad niya itong tinabihan sa kama.

Kinaumagahan, nagising si Athana dahil sa paghalik ng kanyang mga anak sa kanyang mukha. Hindi nila tinigilan ang paghalik sa mukha ng kanilang ina hangga't hindi ito nagdidilat ng kanyang mga mata.

Nagkunwari naman siyang tulog pa rin.

"Momma!" Reklamo ng kanyang anak na si Thana nang hindi pa rin siya nagigising, saka ito sumakay sa kanyang tiyan.

Kiniliti naman siya ng kanyang anak na si Ather sa may leeg niya kaya napahagikgik ito. Maya-maya ay silang dalawa na ni Thana ang kumiliti sa kanya dahilan upang maidilat niya ang kanyang mga mata.

Dali-dali siyang umupo sa kama, saka siya naman ang kumiliti sa kanyang mga anak.

Nagluto na rin pagkatapos si Athana ng breakfast nila. Naglagay na rin siya ng mga plato at kutsara pagkatapos niyang magluto ng fried egg at saka fried rice na paborito ng kanyang kambal na anak.

"Momma, aalis ka na naman po ba?" Tanong ng kanyang panganay na anak na si Ather pagkatapos nitong kumain.

Napatigil naman saglit si Athana nang marinig niya ang sinabi ng kanyang anak. Nginitian niya muna ito bago siya nagpaliwanag.

Pagkatapos nilang kumain ay dali-dali na siyang naghugas ng kanilang mga pinagkainan dahil ilang oras na lang at susunduin na siya ng kanyang mga kasamahan. May ipapagawa na naman kasi si Boss Cheng sa kanila ngayong araw kaya kailangan niyang iwan ulit sa kapitbahay ang kanyang mga anak. Wala rin kasing anak ang kapitbahay niyang babae dahil mas pinili nitong maging matandang dalaga, kaya pinakiusapan niya ito na bantayan ang kanyang mga anak sa tuwing may lakad siya at binibigyan niya rin naman ito ng pera tuwing katapusan ng buwan.

Lagi niya rin sinasabihan ang kanyang mga anak na huwag maging pasaway para hindi ma-stress si Ate Mabel sa kanila, dahil ayaw na niyang humanap pa ng ibang taong magbabantay sa mga anak niya dahil sobrang bait ni Ate Mabel sa kanilang mag-ina.

Matiyaga siyang naghintay sa labas ng building. Mahigit isang oras na rin ang nakakalipas at wala pa rin ang kanyang sundo.

"Nasaan na ba ang mga 'yon? Bakit ang tagal nila ngayon?" She murmured.

Maya-maya ay dumating na rin ang kanyang sundo.

"Bakit ngayon lang kayo?" Tanong niya sa kanyang mga kasamahan, bago siya pumasok sa loob ng passenger seat.

"Pasensya na, Miss Eight. Hinanap pa kasi namin ang gonggong na 'to!" Saad ni Bel, saka nito binatukan si Jugs.

"Saan ka nanggaling, Jugs? Alam mong hindi ka puwedeng sumama sa ibang grupo kapag wala tayong misyon." Saad ni Athana kay Jugs.

"Alam ko naman 'yon, Miss Eight. Saka, takot ko lang sa 'yo... May pinuntahan lang naman ako saglit at hindi ko namalayan na medyo napahaba na pala ang usapan namin." Pagpapaliwanag naman ni Jugs habang ngumingiwi naman si Bel.

Nakikita kasi ni Athana ang reaksyon ni Bel mula sa rearview mirror ng sasakyan.

"Sus! H'wag kang maniwala d'yan, Miss Eight. Nakipag-date lang ang lalaking ito sa babaeng p****k!" Singit naman ni Bel.

"Sus, aminin mo na kasi Bel kay Jugs na nagseselos ka lang." Tukso naman sa kanya ni Patrick short for Pat, kasamahan din siya ni Athana.

Hindi kasi nila puwedeng gamitin ang buong mga pangalan nila dahil mabilis silang matitimbog.

Napailing na lamang si Athana habang pinapakinggan sila sa likuran.

"Yucks! Kadiri! Hinding-hindi ko papatulan si Jugs. N.E.V.E.R—never! As in never ever in my life." Nandidiring saad ni Bel.

Sa ilang years na nakasama ko sila ay mukhang ngayon lang na may namumuong love team sa grupo namin. I can really say na Jugs really likes Bel. Ngunit, hindi niya lang kayang aminin ito dahil torpe si Jugs. But I can't blame him though, kasi it takes a lot of courage naman talaga to confess to someone you like.

Hinayaan na lamang sila ni Athana na mag-ingay, dahil siguradong tatahimik din ang mga iyan kapag nakaharap na nila si Boss Cheng. Ayaw kasi ni Boss Cheng sa mga maiingay. Medyo may edad na rin kasi ito kaya gusto nang tahimik na paligid habang siya'y nagsasalita.