Chapter 3: Babaguhing Kapalaran

HINDI LANG SIYA basta payat. Napakaputla rin ng kanyang balat na pagkakamalan din siyang hindi nasisikatan ng araw mula ng ipanganak. Ibang-iba ang hitsura niya kay Odessa na malaman kahit halatang mas bata sa kanila ang edad. Sariwa ito. Hindi gaya niyang marangya nga ang buhay, lahat ay nasa kanya na ngunit bakit buto at balat ang hitsura.

“Sabi ko naman sa’yo, uminom ka rin ng vitamins. Hindi ka marunong makinig. Iwasan mo na ang mga inuming walang dulot na ayos sa katawan mo. Kung hindi kape, milk tea, soft drinks at kung anu-ano pa.” rant ni Jago na noon lang din ginawa ng asawa niya. “Paano ka magiging healthy sa mga inuming iyon, Feli? Lahat iyon ay walang dulot na maganda sa’yo!”

Hindi pinansin ni Fae ang huling sinabi ni Jago. Ang mga taon ng malungkot nilang pagsasama ang nagdulot noon sa kanya ng maraming problema sa kalusugan at hindi ang mga binanggit nito. Nawalan din siya ng interes sa pagkain ng mga healthy foods na naging malaking factor sa pagbagsak ng timbang. Madalas siyang magpalipas ng gutom dala ng stress, kaya't pumayat siya nang pumayat, hanggang magmukha na siyang kalansay. Hindi iyon alam ni Jago na iniisip ni Fae kung ano ang initial nitong reaction kapag nalaman. Magugulat ba o mas galit pa?

“Jago…” mahina niyang tawag sa pangalan ng lalaki.

“Hmm? May sasabihin ka?”

Sa mga sandaling iyon ay nakatingin na ang asawa sa hawak nitong cellphone. Naagaw ang atensyon nito doon kanina nang mag-vibrate. Buong akala pa naman ni Fae, magkakaroon na sila ng heart to heart talk. Mukhang namaling akala na naman siya dito. Hindi mapigilan ni Fae na pasadahan ng tingin ang asawa. As usual, suot nito ang walang kamatayang tuxedo nang dahil sa uri ng kanyang trabaho. Balingkinitan ang perpekto nitong pigura. Gwapo ang asawa niya kaya hindi na nakakapagtaka na habulin ito ng mga babae noong wala pa itong asawa.

“Maghiwalay na tayo, napapagod na ako sa set up natin na ganito. Matagal-tagal na rin naman—”

Natigil sa kanyang ginagawang pag-e-scroll ng cellphone si Jago. Hindi siya makapaniwala sa narinig. Hindi niya mapigilan na magpanting na ang tainga.

Siya? Hahamunin ni Fae ng hiwalayan?

Malaking kalokohan!

“Anong sinabi mo?!”

Madilim na agad ang mga tinging pinupukol ni Jago. Malamang, isang malakas na sampal ang sinabi ni Fae sa kanya tungkol sa pakikipaghiwalay. Siya na pinipilahan ng maraming babae, mapangahas na hihiwalayan ng asawa niya? Anong kahibangan iyon?!

“Felicity, anong kalokohan mo ‘yan?!”

Binitawan na ni Jago ang hawak na cellphone. Hindi alintana kung mahalaga man ang binabasa niya doon. Nais ng harapin ang kalokohang sinasabi ng asawa.

“Ano bang problema mo at ganyan ka ngayon umasta? Ibang-iba ka ng ugali. Nasapian ka ba, Feli?”

Nameywang na si Jago na nakatunghay na sa asawa ang dalawang pares ng matang nagliliyab sa galit. Tila naapakan nito ang kanyang pride. Dumalas ang hinga niya mula sa dibdib na parang bulkang sasabog noon.

“Anong dahilan? Bakit hindi ka makasagot? Ako pa ang hahamunin mo? Hindi ako nakikipagbiruan!”

“Seryoso ako, Jago. Nakakapagod ang ganito.”

Umupo nang tuwid si Fae sa may kalayuang sofa, sinalubong ang nagbabagang titig ni Jago sa kanya. Alam niyang magagalit ang asawa sa sinabi niya at lakas-loob na ginagawa niya, pero sabi nga niya ay uunahan na niya si Jago bago maulit ang lahat. Hindi na kailangang hintayin na maulit ang nangyari noon; ang malagim niyang sinapit sa mga kamay nito bago pa siya kumilos. Uunahan na niya ang plano ni Jago.

“Limang taon na rin naman. Matagal-tagal na. Alam ko rin namang hindi mo ako magagawang mahalin. Hayaan na lang natin ang isa't-isa na maging malaya.”

Isang buwan mula sa araw na iyon ay isang malaking conference sa negosyo ang gaganapin sa lungsod at doon makikilala ni Jago si Odessa na nagtatrabaho ng part-time bilang receptionist doon sa paggaganapan. Mai-in-love sa unang tingin si Jago sa babaeng iyon at handang pilitin ang sarili sa kanya na angkinin pa rin siya kahit marami ang masasaktan. Sa loob-loob ni Fae ay hindi siya magiging pabigat at singit sa isang dramatikong kwento ng pag-iibigan nila. Siya na ang kusang maglalayo sa kanyang sarili sa kapahamakan.

“Feli, ano bang meron sa kapeng ininom mo at pumasok iyan sa utak mo? Tigil-tigilan mo nga ako!”

Marahil ay tunay na seryoso ang titig ni Fae na naging dahilan upang agad na dumilim ang mukha ni Jago. Noon pa man ay mainitin na ang ulo niya; kung may ayaw sa kanya, hindi siya magpapakita ng awa o hindi siya manlilimos ng atensyon. Iiwasan na niya.

“Ano bang tingin mo sa akin? Tanga? Mapapaikot mo at mapapapayag sa gusto kapag sinabi mong pagod ka na? Alalahanin mong ikaw ang nagpumilit sa akin na pakasalan ka at hindi naman ako. Tapos ngayon, ikaw pa ang may lakas ng loob na makipaghiwalay?!”

Hindi sumagot si Fae. Inaasahan na niya iyon, sa katunayan may sagot siya dito ngunit ngayong nakikita niya ang reaction ng asawa. Nablangko ang isipan niya at hindi na mahagilap ang mga sasabihin.

“Pinaglalaruan mo ba ako?”

Limang taon na ang nakalilipas, maayos ang relasyon ng kanilang mga pamilya kaya inayos nila ang kasal. Dahil sa personalidad ni Jago na hindi siya magiging ganoon ka-masunurin sa kagustuhan ng magulang. Mariin niyang tinanggihan ang kasal. Paulit-ulit iyon. Dumating ang punto ng pagbabago ni Jago sa desisyon nang magkasakit nang malubha ang lolo nito, kaya naman napilitan siyang pakasalan si Fae.

Isang malaking kahihiyan iyon para kay Jago. Hindi maganda ang unang buwan ng kanilang pagsasama, ngunit di naglaon nakapag-adjust din sila. Unti-unti niyang pinangasiwaan ang negosyo ng pamilya El Gueco. No commitments iyon ang napagkasunduan nila ni Fae, ngunit di inaasahan ni Jago ang hiwalayang mungkahi ng asawa kaya sinong hindi iinit talaga ang ulo sa vow na kanilang binitawan?

Habangbuhay na magsasama hanggang pagtanda.

Good mood pa naman ang lalaking maagang umuwi ng araw na iyon tapos ganito lang ang mangyayari?

“Gusto mo pa bang ituloy ang kasal na ito sa pangalan lang? Hindi mo ba ako narinig? Pagod na ako, Jago…”

“Sa pangalan lamang? Pagod? Sa tingin mo hindi ko rin nararamdaman ang pagod na sinasabi mo? Hindi ko naman ikaw inoobliga na gampanan mo ang pagiging asawa, Feli. Ginamit ko ba ang katawan mo? Hindi naman di ba? Huwag mo akong paandaran!”

Pinanliitan siya ng mga mata ni Jago, iba na ang naiisip na dahilan kung bakit siya nakikipaghiwalay.

“Bakit? Nakahanap ka ba ng ibang lalaki at matapos mong makipaghiwalay ay sasama ka na sa kanya?”

“W-Wala akong lalaki—”

“Ganun naman pala, bakit kailangan natin maghiwalay? Malungkot ba ang mag-isa, Felicity? Ano pang gusto mo? Nakukuha mo ang lahat-lahat.”