Chapter Five

Nanlaki ang kanyang mga mata. “At ano naman idadahilan natin?”

“Simple lang, hindi na natin gusto ang isa’t isa,” sagot nito, waring walang alinlangan. “Ano ang desisyon mo?” agad na tanong nito kasunod.

Saglit siyang natahimik, ilang segundo bago sumagot. “Pag-iisipan ko muna.”

“Sige, bibigyan kita ng tatlong araw para pag-isipan,” aniya, bago tuluyang tumahimik.

Dalawang araw ang lumipas pagkatapos ng pag-uusap nila ni Axel.

Tahimik siyang nagtatrabaho sa kanyang cubicle nang muling maramdaman ang pananakit ng tiyan.

Ilang araw na rin niyang nararanasan ito at napapansin niyang mabilis siyang mapagod kahit na maikling distansya pa lang ang kanyang nalalakad.

Sa sandaling iyon, bigla siyang nakaramdam ng matinding pagduduwal. Agad siyang tumayo at nagmamadaling tumakbo papuntang banyo.

Mabuti na lang at walang tao sa banyo ng oras na iyon nang siya ay masuka. Hindi na niya alam kung gaano siya katagal doon, naubos ang kanyang lakas matapos mailabas ang lahat.

Nanghihina man, nagpunta siya sa opisina ng kanyang boss para magpaalam.

“Puwede ba ‘ko mag half-day ngayon, Mr. Palmer?” mahina niyang sabi.

Tinitigan siya nito at pinagmasdan. “Namumutla ka, Selena. Mukhang hindi maganda pakiramdam mo.”

Bahagya siyang tumango. “Napakabigat talaga ng pakiramdam ko, Mr. Palmer.”

“O sige, pagbibigyan kita ngayon. Magpahinga ka pagkatapos mo magpatingin sa ospital,” anito bago siya tuluyang pinayagan umalis ng maaga.

Nagpasalamat siya at agad na nagtungo sa ospital.

Pagdating niya roon, nagpa-full body check-up siya at kinuhanan ng sample para sa pagsusuri.

Mahigit tatlungpung minuto siyang naghintay bago siya tinawag ng nurse at inihatid sa opisina ng doktor. Pinaupo siya at binati ng nito.

“Magandang araw, Ms. Payne. Ako si Dr. Valeza, isang OB-GYN dito sa ospital,” pagpapakilala ng doktor.

Nanlaki ang mga mata niya. “O-OB-GYN?” dahil sa narinig, kinutuban na siya.

Tumango ang doktor. “Base sa resulta ng pregnancy test mula sa iyong urine sample, lumabas na positibo ito, na nangangahulugang buntis ka. Kung gusto mong makasigurado pa, maaari tayong magsagawa ng ultrasound.”

Nanlumo siya sa narinig. “Huwag na. Naniniwala na ‘ko,” mahina niyang sambit.

Humingi na lang siya ng reseta para sa mga gamot na makakatulong sa kanyang nararamdaman bago umalis.

Pagkalabas niya ng opisina ng doktor, hindi niya napansin na nasa likuran niya si Axel. Tahimik siyang pinagmasdan nito hanggang sa makaalis siya ng ospital.

Tiningnan ni Axel ang pinanggalingan ni Selena at nabasa ang salitang OB-GYN. Agad siyang pumasok.

Nakaupo pa rin si Dr. Valeza sa kanyang desk nang dumating si Axel.

Tumingala ang doktor. “Mr. Strathmore, nandito ka. Kamusta ang pag-iinspeksyon mo sa ospital?” Tanong ng doktor.

“Dr. Valeza, bakit nasa opisina mo si Selena?” direktang tanong nito, hindi sinagot ang tanong ng doktor.

“Selena?” ulit nito, nag-isip sandali bago nagsalita muli. “Si Ms. Payne ba tinutukoy mo?”

Tumango lamang siya.

“Pumunta siya rito dahil sa pananakit ng kanyang ulo at tiyan. Panay din daw ang pagduduwal niya, kaya nagsagawa kami ng full body check-up pati pagkuha ng sample mula sa kanya,” detalyadong paliwanag nito.

Sa puntong iyon, isang hinala ang sumagi sa isip niya. “At ano ang naging resulta?”

“Kagaya ng suspetsa ko, nagpositibo siya sa pregnancy test. Dalawang buwan mahigit na siyang buntis,” sagot nito.

Hindi makapaniwala si Axel sa narinig. Bigla niyang naisip ang gabing pinagsaluhan nila. Nagbunga ang gabing iyon.

Napansin ng doktor ang reaksyon niya kaya muling nagsalita. “Sa totoo lang, Mr. Strathmore, may isang bagay akong hindi sinabi kay Ms. Payne,” pag-amin ng doktor.

Napatingin si Axel, bakas sa mukha ang kaba. “At ano naman ‘yon?”

“Hindi ko pa masisiguro pero sa tingin ko, base sa resulta ng test niya, may posibilidad na kambal ang ipinagbubuntis niya,” sagot nito.

Nanlaki ang mga mata ni Axel. Para siyang nablangko ng ilang segundo.

Kambal?

Kung totoo ang sinabi ng doktor, hindi na siya mag-aalala pa sa susunod na tagapagmana ng Strathmore family.

Nagpasalamat siya kay Dr. Valeza at sinabing huwag ipaalam kay Selena ang kanilang pag-uusap o kahit na kanino.

Samantala, kahit nanlulumo si Selena sa nalaman, pinilit niyang maging matatag. Kinuha niya si Silas sa bahay ni Aling Ferliza at umuwi silang magkasama. Masaya ang kapatid niyang si Silas dahil bihira lang siyang umuwi ng maaga. Pero hindi niya ipinaalam sa kapatid ang bigat na dinadala niya.

Habang papalapit na sila sa kanilang apartment, napansin niyang may kumakalampag sa pintuan ng mismong apartment nila.

Napatigil siya. Mabilis siyang kinabahan. Habang papalapit sila ay nakilala niya ang mga lalaking nanggugulo.

“Ano sa tingin niyo ang ginagawa niyo?” galit niyang tanong, humigpit ang hawak niya sa kanyang kapatid.

Isa sa mga lalaki ang lumapit sa kanya. “Aba, Selena, buti naman nagpakita ka na. Kanina pa kami naghihintay sa’yo.”

Nakasimangot siya. “Ano’ng kailangan niyo?”

“Nandito kami para singilin ka sa inutang ng iyong ama,’’ nakangising sagot nito.

Napakuyom siya ng kamao. “Binayaran ko na ang inutang niya. Tapos na ‘ko.”

Mabilis na nagbago ang ekspresyon ng lalaki. Mula sa mapanuksong ngiti, naging seryoso ang mukha nito. “Yung unang inutang niya, oo, pero umutang ulit siya. Kaya ka namin sinisingil.’’

Napatigil siya. Umutang ulit ang kanyang ama?

Galit siyang sumagot. “Wala na akong pakialam kung umutang ulit ang taong ‘yon sa inyo! Basta ako, tapos na ako magbayad. Siya ang singilin niyo, hindi ako!’’

Hinatak niya si Silas papasok ng kanilang apartment. Pero bago pa siya makapasok, biglang may humablot sa kanyang buhok at tinulak siya pabagsak sa lupa.

“Agh!”

Nabigla siya sa nangyari, pero bago pa siya makagalaw, idinuldol ng lalaki ang kanyang mukha sa lupa.

“Kung hindi mo babayaran ang utang ng iyong ama, mapipilitan kaming gumamit ng dahas,” malamig na sabi nito. “Hindi pa sapat kahit ibenta mo ang lamang-loob mo.”

Napasinghap siya sa takot.

Hinila nito ang kanyang buhok upang tingnan siya sa mata. “Puwede ka rin naming ibenta. Marami kaming kilalang may interes sa mga babaeng kagaya mong magaganda.”

Kasabay nito ang mapanuksong humagikgik ng mga kasamahan ng lalaki.

Nanlamig ang kanyang katawan.