Chapter 5

BAGO pa tuluyang lumalim ang ginagawa ay agad na silang nagambala ng pagtunog ng cellphone ni Cain.

Sa isang iglap ay bigla itong bumangon at sinagot ang tawag. Ang exposed na katawan ni Katherine ay agad niyang binalutan ng kumot.

Ilang sandali pa matapos ang tawag ay humarap si Cain. "May pupuntahan lang ako, matulog ka na."

"Saan?"

Hindi sinagot ni Cain at basta na lamang nagpalit ng damit. Sa hindi nito pagsagot ay nakumpirma ni Katherine na si Margaret na naman ang dahilan ng pag-alis.

Ang dalaga na naman ang pinipili nito... At heto siya, parang tangang umaasa na mapapahalagahan din, kahit hindi naman talaga.

Pagkaalis ni Cain ay saka lang hinayaan ni Katherine na bumuhos ang kanina pa pinipigilang luha. Bumangon siya sa kama at nagbihis. Nandidiri at hiyang-hiya para sa sarili. Para siyang isang mababang uri ng babae na pagkatapos magamit ay basta na lamang iiwan para sa babaeng tunay nitong minamahal. Matapos ay kinuha niya ang sonogram sa drawer at pinagpupupunit. Nagpasiyang hindi na niya sasabihin ang pagbubuntis.

Itutuloy niya ang pakikipaghiwalay at tatapusin na ang kasunduan.

~~

SAMANTALANG sa ospital naman ay dumating si Cain. Pagpasok sa private room ay boses agad ni Margaret ang narinig.

"Cain, I'm glad you're already here."

Tinitigan niya ang dalaga. Naka-hospital dress ito at halatang nanghihina pa rin.

"Gabi na pero pumunta ka pa rin, sorry," hinging paumanhin ni Margaret.

"It's fine. Nagugutom ka ba? Tatawagan ko si Joey para madalhan ka rito ng pagkain."

"Hindi, ang gusto ko lang ay makasama ka. Kaya pwede bang dumito ka lang? Samahan mo 'ko. Natatakot akong matulog dito ng mag-isa." Matapos ay pahaplos na hinawakan ang kamay ni Cain sanhi para bigla itong umatras.

Pareho silang nabigla sa reaksyon ng bawat isa.

"M-May mali ba sa ginawa ko?"

Umiling si Cain. "Of course, wala. Nabigla lang ako."

Biglang nalungkot ang ekspresyon ni Margaret. "Alam ko naman kahit hindi mo sabihin... pabigat na 'ko sa'yo ngayon."

"Hindi gano'n ang tingin ko sa'yo, Margaret. Nabigla lang talaga ako," depensa pa ni Cain sa sarili.

"Really? So, sasamahan mo na 'ko rito?" umaasang tanong ni Margaret.

Tumango naman si Cain at sinamahan ang dalaga hanggang sa makatulog. Nang masiyado nang lumalalim ang gabi ay napagpasiyahan na niyang umuwi.

Pagkasarang-pagkasara ng pinto ay bigla na lamang nagmulat ng mata si Margaret. Iritadong bumangon at nanlilisik ang mga matang tumingin sa saradong pinto.

Nayayamot siya ng maamoy kanina si Cain. Amoy babae ito at kumukulo ang dugo niyang isipin na may kasama itong iba.

Walang ibang babaeng malapit kay Cain maliban sa sekretarya nitong si Katherine. Nagngingitngit siya sa galit habang iniisip kung anong klaseng pang-aakit ang ginawa ng babaeng iyon sa kanyang pinakamamahal.

"Humanda ka sa'kin, Katherine. Sisiguraduhin kong magsisisi kang binangga mo 'ko."

Samantalang hatinggabi na nang makauwi si Cain sa mansion. Hindi na niya binuksan ang ilaw nang mapansin na natutulog na si Katherine. Tahimik lang niya itong tinabihan.

Ngunit talagang nahihirapan siyang balewalain ang humahalimuyak na bango'ng nagmumula rito. Muli na naman niyang naalala ang naudlot na ligaya kanina.

Ngayon siya nagsisising umalis pa. Kung sana ay itinuloy na lamang nilang dalawa ang...

Hindi niya napigil ang sariling hawakan ang malambot nitong labi. Gusto niyang tikman, muling lasapin nang biglang gumalaw si Katherine.

Agad siyang natauhan at mabilis na tumalikod ng higa. Inaalis sa isip at sistema ang pagnanasang nararamdaman hanggang sa nakatulugan ang pag-iisip kay Katherine.

Ngunit sa kalagitnaan ng pagtulog ay nagising siya ng marinig ang pag-ungol nito. Sinalat niya ang noo at leeg ni Katherine, mainit ito. Upang makasiguro ay gumamit siya ng thermometer.

"May sinat nga," aniya.

Bumangon si Cain at lumabas ng kwarto. Nais niya sanang magpautos ng maligamgam na tubig para ipangpunas sa katawan ni Katherine. Ngunit madaling-araw pa at namamahinga pa ang mga katulong kaya siya na lamang ang kumuha at nag-alaga sa asawa.

~~

NAGISING si Katherine sa ingay ng tunog ng cellphone. Nanghihina at mabigat ang kanyang pakiramdam pagbangon sa kama.

"He--"

"Sissy~!" matinis na tili ni Lian.

Nailayo naman ni Katherine ang cellphone sa tenga nang marindi sa boses ng kaibigan. Nang tingnan ang oras ay nanlaki ang kanyang mata matapos makitang magtatanghali na pala, pasado alas-onse.

"Hello, Lian? Napatawag ka?"

"Nakalimutan mo na? Ngayon ang dating ko, nasa bahay na nga ako, e," anito'ng nagtatampo.

Nabaling ang tingin ni Katherine sa side-table. Nagtataka kung bakit may thermometer at baso ng tubig gayong natulog siya na malinis ang table.

Nang maalala na weekends ngayong araw ay napabuntong-hininga siya, hindi obligadong pumasok. Maliban sa kanya at kay Joey ay may tatlo pang assistant ang Presidente ng kompanya.

"Hello, earth to Katherine~"

"Oo, nakikinig ako."

"Meet tayo ngayon, miss na kita."

Napangiti si Katherine. "Miss na rin kita," aniya.

Walong buwan niya ring hindi nakita ang kaibigan matapos nitong umalis ng bansa.

Pagkahapon ay bumuti ang pakiramdam kaya nakipagkita siya kay Lian sa restaurant.

Ngunit hindi ito nag-iisa. "Sissy~" Sabay yakap. "I would like you to meet, Sam, my boyfriend."

Hindi na siya nagulat na may iba na itong karelasyon ngunit bahagya pa rin siyang nabigla na ipapakilala ito agad ng kaibigan.

"H-Hi," awkward na tugon ni Katherine.

Naglahad ng kamay si Sam para makipag-shake hands. "Matagal ka ng nakukuwento ni Lian sa'kin. Nice to finally meet you."

Nagpasalamat naman si Katherine saka naupo. Ilang sandali pa ay kumakain na silang tatlo ng dinner.

Sa kalagitnaan ng pagkain ay sandaling nagpaalam si Sam na magtutungo sa restroom.

Huminto sa pagkain si Katherine nang maramdaman na tila babaliktad ang kanyang sikmura.

"Okay ka lang, Sissy?"

Tinakpan ni Katherine ang bibig saka umiling. Bago pa magkalat ay agad na siyang nagpaalam sa kaibigan na magtutungo rin sa restroom.

Nagduduwal siya roon ngunit wala namang lumalabas kaya hinugasan na lamang niya ang bibig. Balak ng bumalik nang madaanan ang male restroom at marinig ang boses ni Sam na tila may kausap, nasa may tenga ang cellphone.

"Oo, Pare. Sinisigurado ko sa'yong makukuha ko na siya ngayon. Sayang at wala ka rito. Kung nagkataon ay tiyak na tiba-tiba ka rin. Kasama ni Lian ang kaibigan niya. Sh*t, Pare! Ang ganda, kung pwede nga lang silang dalawa mismo ang tutuhugin ko ngayong gabi." Sabay tawa nang malakas.

Si Katherine na narinig lahat ng sinabi nito ay agad nakaramdam ng pagkamuhi. Hindi niya inakalang ang nobyo ni Lian ay isa pa lang manyak.

"Kailangan niya 'tong malaman," anas ni Katherine.

Ngunit bago pa makaalis ay may biglang humila sa kanyang braso. Paglingon ay si Sam pala na may kakaibang tinging ipinupukol.

"Anong ginagawa mo rito? May narinig ka ba?"

Binawi agad ni Katherine ang braso mula rito at matapang itong hinarap. "Sasabihin ko'ng lahat kay Lian ang mga narinig ko." Matapos ay saka umalis.

Mabilis namang humarang sa daraanan si Sam. "Talaga? Sisiraan mo 'ko sa kanya? Anong klase kang kaibigan kung sisirain mo ang relasyon niya sa'kin?"

Kunot-noo at hindi makapaniwala si Katherine sa narinig. Ngayon lang siya nakatagpo ng isang lalakeng grabe kung mang-gaslight at magmanipula. Nakakatakot.

"Inililigtas ko lang ang kaibigan ko mula sa lalakeng gaya mo!"

"What's happening here?"

Sabay na napalingon ang dalawa nang biglang sumulpot si Lian.

"Sissy, ba't mo sinisigawan ang boyfriend ko?"