Kabanata 4: Pagdududa

Napatitig si Scarlett sa sa lalaking nasa harapan niya ngayon. Matangkad ito at may itsura. Mukhang galing sa isang prominenteng pamilya. Siya na ba si Mr.Vasquez na siyang tumawag sa kanya kanina? Bakit kaya? Sa pagkakaalala niya ay hindi pa niya ito kailanman nakita.

Subalit kahit ano paman ang sadya nito sa kanya, nagpapasalamat parin siya at dumating ito. Nang sa ganun, makapagpahinga siya sa pakikipagtalo kay Amelia. Napahawak siya sa gilid ng mesa at dahan-dahang umupo at iniwasang masulyapan si Amelia.

Sinipat naman ng tingin ni Amelia ang lalaking kaharap mula sa maganda nitong tindig, mga matang nakakatunaw kung tumingin, simpleng pananamit subalit napakaeleganteng tingnan at galing pa sa isang sikat na law firm. Napagtanto niyang hindi ito ang klase ng tao na sasantuhin ang sinumang makakalaban nito.

Matagal din siyang nagtatrabaho sa gobyerno kaya't marami siyang alam na law firm at isa na doon ang Nexus. Nais niyang matawa. At nagtawag pa talaga ng isang abogado si Scarlett para lang harapin siya!

Siguro ay sinadya nitong galitin siya para magkaroon ito ng ebidensya na magagamit laban sa kanya at madiin siya. That sly bítch! Kung inaakala nito na susuko siya sa pagbura ng video ay nagkakamali ito! Pero agad niyang naisip na hindi na niya pwedeng alipustahin at takutin si Scarlett gaya ng dati niyang ginagawa kaya't umisip siya ng paraan para makuha ang kanyang gusto sa mahinahon na paraan.

Tumikhim siya at pilit na ngumiti. "Lawyer Vasquez right? Alam mo kasi, hindi ko naman sinasadya ang nasabi ko sa kanya. She's my daughter-in-law after all. We are still family. Nadala lang ako ng galit ko. Hindi mo naman ako masisisi lalo na't sinagot-sagot ako ni Scarlett imbes na respetuhin niya ako bilang nakakatanda sa kanya."

Umarko ang isang kilay ni Scarlett. "Ah, pamilya pala tayo. So hindi pala ilegal na sirain ko ang mga gamit ko, right?" Singit niya habang nasa likuran siya ni Kairo.

Napangiti naman si Kairo sa pagiging palaban ni Scarlett at marahang tumango. "Of course. It's not illegal since it's yours."

Napatingin si Amelia kay Scarlett na ngayon ay prente ng nakaupo sa silya. "Pero divorce na kayo ng anak ko at bahay ko yun. Hindi ba't trespassing na ang tawag doon sa pagpasok mo ng walang pahintulot mula sa akin?"

Nilingon ni Kairo si Scarlett na kasalukuyan ng nakaupo. Mas lalo pa itong namutla kaysa kanina. Pawis na pawis din ang noo nito at mukhang nanghihina. Huminga siya ng malalim bago nagsalita. "You don't look well, Miss Lopez. Gusto mo bamg dalhin muna kita sa ospital?

Nag-angat siya ng tingin kay Kairo bago palihim na hinagod ang kanyang tiyan. "Ayos lang ako, salamat."

Sandali pang pinagmasdan ni Kairo si Scarlett bago muling hinarap si Amelia. "Madam, please allow me to state a legal fact. Ang bahay po na sinasabi ninyo ay common property nilang mag-asawa noong kasal pa sila kaya ibig sabihin, kalahati ng bahay na iyon ay pag-aari parin ni Miss Lopez," malamig at seryoso niyang turan.

"Ngayon, kahit na legal ng hiwalay si Mr.Vergara at Miss Lopez, may karapatan parin siya sa bahay nilang mag-asawa at hindi matatawag na trespassing ang kanyang ginawa," pagpapatuloy pa niya.

Natulala si Amelia sa mga sinabi ni Kairo. Nais man niyang magdahilan subalit walang salitang namutawi sa kanyang bibig. Nang mapagtanto niyang talo siya sa laban nila ni Scarlett sa ngayon, agad siyang nakaisip ng paraan para mabura parin ang video na nasa cellphone ni Scarlett at masiguro ang kaligtasan ng anak niya.

"Okay, hindi na ako magdedemanda at hindi narin ako hihinginng compensation sa ginawa mo sa bahay ko pero kailangan mong burahin ang video ni Liam sa cellphone mo dahil kung hindi, irereklamo kita sa mga pulis."

Pinukol ni Scarlett ng malamig na titig si Amelia bago nagsalita. "You're right. Dapat ko na itong burahin dahil ayokong mabahiran ng dumi ang cellphone ko," aniya at walang pag-aalinlangan na binura ang video.

Matapos niyang mabura ang video ay agad ng binawi ni Amelia ang reklamo nito laban sa kanya. Magkasabay naman sila ni Kairo na lumabas ng presinto. Humarap siya sa lalaki at nagpasalamat dito.

"Maraming salamat, Mr.Vasquez."

"You're welcome." Tinitigan ni Kairo si Scarlett. Hindi niya maiwasan na mag-alala sa kalagayan nito lalo na ng masikatan na ito ng araw at nakita niya ang kaputlaan nito. "Ayos ka lang ba talaga? Dalhin na kaya kita sa ospital?"

Marahan namang umiling si Scarlett at tipid na ngumiti. "Hindi na. Ayos lang talaga ako. This is an old problem. Mawawala din ito kapag nainuman ko ng gamot," tanggi niya. "Ano nga pala ang sadya mo sakin Mr.Vasquez?" Pag-iiba niya ng usapan.

Napatingin si Kairo sa pharmacy na nasa kabilang kalsada. "Mas mahalaga ang kalusugan mo, Miss Lopez. Give me the name of the medicine. Ako na ang bibili para sayo."

Kinagat niya ang pang-ibaba niyang labi nang muli na namang sumigid ang kirot sa kanyang tiyan. Wala na siyang nagawa pa kundi sabihin sa lalaki kung anong gamot ang iinumin niya.

"Wait for me here, okay? Babalik din ako agad," paalam ni Kairo at mabilis na nagpunta sa pharmacy.

Umupo siya sa bato na nasa harapan ng police station at dinukot ang kanyang cellphone. Pinagmasdan niya ang video na kanyang binura kani-kanina lang. Pinindot niya ang restore button para ibalik ang video sa kanyang folder. Kilala niya si Liam lalo na si Amelia kaya't mas mabuti ng may hawak siyang ebidensya. Ayaw man niyang ipalabas iyon pero kung sakaling kinakailangan ay hindi siya mag-aatubili.

Bumalik si Kairo dala ang gamot at isang cup ng maligamgam na tubig. "Gusto mo bang kumain muna? Sabi ng pharmacist mas mainam kung kumain ka ng lugaw o kahit anong pagkain na may sabaw."

"Hmm, may malapit na pansit lomi dito. Gusto mo bang subukan?"

Mabilis namang tumango si Kairo kaya't agad niya itong dinala sa lugar na sinasabi niya. Umupo sila sa isang bakanteng upuan sa may sulok.

"Pasensya ka na kung maliit itong kainan pero huwag kang mag-alala, maselan ang may-ari nito kaya sigurado akong malinis ang pagkain."

Tipid na ngumiti si Kairo at tumango. "I can see it. By the way, you seemed familiar with this place. Lagi ka ba dito?"

Marahang umiling si Scarlett. "Nagpartime job ako dito noong highschool ako."

Ilang sandali pa'y dumating na ang order nila. Agad niyang tinikman ang sabaw. Mabilis na nanuot ang init sa kanyang lalamunan pababa sa kanyang sikmura. Unti-unti ring nawala ang sakit ng kanyang tiyan na iniinda.

Napatingin siya kay Kairo na mukhang sarap na sarap sa kinakain nito. "Ano nga pala ang pag-uusapan natin?" 

Nag-angat ng tingin si Kairo. Agad niyang napansin ang unti-unting pamumula ng pisngi nito. Napangiti siya at mukhang umayos na ang kalagayan nito. "Saka na tayo mag-usap pagkatapos nating kumain."

"May kaso po ba ako Mr.Vasquez?" Tanong niya nang matapos na silang kumain.

"Don't worry too much Miss Lopez, wala kang kaso. Pero mas mabuting sumama ka sakin sa Nexus para makapag-usap tayong mabuti tungkol sa pakay ko," nakangiting tugon ni Kairo.

Nakahinga siya ng maluwag nang marinig na wala pala siyang kaso. "Okay, sure."

Ilang sandali pa'y dinala na siya ni Kairo sa sinasabi nitong Nexus. Habang nakasunod siya sa lalaki ay hindi niya maiwasang itanong sa sarili niya kung bakit ang isang abogado na gaya ni Kairo na nasa isang sikat na law firm ay nais na makipag-usap sa kanya?