Kabanata 5: Anak

"Nagbibiro ka ba?" Nanginginig ang boses na tanong ni Scarlett kay Kairo nang masabi ng lalaki ang pakay nito sa kanya.

"Unfortunately, hindi ako nagbibiro, Miss Lopez. Romero Hospital… Does it ring a bell?" Ani Kairo.

Of course alam niya ang tungkol sa Romero Hospital. Madalas itong banggitin ng kanyang ina sa kanya noon  kung gaano kalaki ang nagastos nito mula sa panganganak sa kanya.

Dahil mahirap ang buhay ng mga magulang niya noon sa bukirin, lumuwas ang kanyang ama sa Maynila para magtrabaho sa construction, sumunod naman ang kanyang ina habang buntis ito sa kanya at tumulong bilang tagapagluto subalit hindi paman nito kabuwanan ay napaanak ito ng wala sa oras at isinugod sa Romero Hospital.

Hindi niya aakalain na malaki ang magiging parte ng ospital sa buhay niya at magdudulot ng kaguluhan sa isipan niya. Pilit man niyang pinapakalma ang sarili, sobrang lakas parin ng tibok ng puso niya.

Halo-halo ang emosyong nararamdaman ni Scarlett  kaya naman lumipas muna ang ilang minuto bago siya muling nagsalita. "Attorney Vasquez, napakaraming sanggol ang ipinanganak ng mga panahong iyon. Paano ka nakakasiguro na ako nga ang nawawalang anak ng pamilyang sinasabi mo?"

Huminga ng malalim si Kairo bago siya sinagot. "Tatlong araw ang pananatili ng aking kliyente sa Romero Hospital, Miss Lopez at sa loob ng tatlong araw na iyon, nasa limampu't walo ang bilang ng mga batang isinilang kasabayan mo. Dalawa ang namatay at ang iba naman ay hindi kapareho ng kasarian sa anak ng aking kliyente. Nasa pitong sanggol ang babae at kabilang ka na doon."

Mas lalo lang siyang nagulat sa mga nalalaman niya. "So, lahat ba sila ipina-DNA ninyo o ako lang mag-isa?"

"The DNA testing with the other people involved is already done," tugon ni Kairo bago inilapag ang isang cheke sa harapan niya. "Kapag pumayag kang magpa-DNA test, magbibigay ang kliyente ko ng isang milyon para bayad sa pag-abala namin sayo."

Napatingin si Scarlett sa tseke na nagkakahalaga ng isang milyon. Napakalaking pera nun para sa kanya. "Isang milyon para sa DNA test? Wala naman siguro kayong gagawin na ilegal hindi ba?" Puno ng pagdududa niyang sambit.

Tila naiintindihan naman ni Kairo ang nararamdaman niya. "Huwag kang mag-alala Miss Lopez, kilala ang Nexus sa buong bansa kaya hindi kami gagawa ng bagay na maaring makadungis sa pangalan ng law firm namin. Isa pa, ang ospital ang bahala sa lahat kaya wala kang dapat na ikabahala," nakangiti nitong paliwanag.

Matapos mapakinggan ang sinabi ni Kairo ay agad na naglaho ang lahat ng pagdududa niya. Nais pa nga niyang pagtawanan ang sarili niya. Sino ba siya sa tingin niya para pag-aksayahan ng panahon ng mga kagaya nina Kairo.

"Anong mga kailangan para sa DNA test na iyan. Kukuhanan ba ako ng dugo?" Sa wakas ay tanong niya.

"Sa ngayon ay hibla lang muna ng buhok," tipid na tugon ni Kairo.

"May gunting ka ba? Igugupit ko lang sana sa buhok ko," aniya sa lalaki.

Sobrang laki ng ibabayad nito kumpara sa ilang hibla lang ng buhok. Kahit na magbanat siya ng buto buong taon, hindi siya basta-basta kikita ng isang milyon sa trabaho niya. Kahit na hilingin pa ni Kairo ang lahat ng buhok niya at makalbo siya ay ayos lang sa kanya. Walang reklamo niya itong ibibigay sa lalaki.

Isa pa, sigurado naman siya na hindi siya ang nawawalang anak ng kliyente nito. Mas lalo ng hindi niya pinagdudahan na anak siya ng mga kinikilala niyang magulang ngayon.

Galing ang pamilya nila sa Batanes at pagsasaka ang kanilang pangkabuhayan doon. May isa siyang kapatid na lalaki na walong taon ang tanda sa kanya. Hindi man siya galing sa may kayang pamilya, ramdam naman niya ang pagmamahal at pag-aalalaga ng mga magulang niya sa kanya mula pa noong bata siya.

Dahil sa kahirapan nila noon, muling lumuwas ng Maynila ang mga magulang niya para magtrabaho habang naiwan silang dalawa ng kanyang kapatid sa Batanes. Nang makaipon ang mga ito ng sapat na pera ay saka lang sila isinama ng mga ito sa Maynila at dito na sila tumira hanggang sa lumaki siya.

Pareho sila ng kapatid niya na nag-aral sa isang unibersidad sa Maynila. At dahil matalino ang Kuya niya, nakakuha ito ng scholarship at nagtapos bilang isang pulis habang siya naman na hindi ganun katalas ang isipan, ay nakapagtapos din naman ng kurso.

Ngayong matanda na ang mga magulang niya, nasa kuya na niya nakatira ang mga ito. Ito narin ang nag-aalaga sa mga anak ng kanyang kapatid habang nagtatrabaho ang mag-asawa. Habang siya ay paminsan-minsan ding bumibisita sa mga magulang niya. May mga pagtatalo man sila minsan, pero alam niyang mahal na mahal nila ang isa't-isa bilang pamilya.

Napukaw ang naglalakbay na diwa ni Scarlett nang magsalita si Kairo. "Wait a minute."

Pinagmasdan niya si Kairo na may tinawagan sa cellphone nito. "Hello Doctor Reyes, you may now come in."

Ilang minuto lang ang lumipas ay bumukas na ang pinto at iniluwa nun ang dalawang panauhin na nakasuot ng puting coat. Mukhang ito na ang doctor na tinawagan ni Kairo…