KABANATA 58

Hapong-hapo na napaupo siya sa sofa. Hindi alintana na basa pa rin ang damit niya.

Natatakot siya sa huling sinabi ni Sky. Alam niyang gagawa ito ng paraan para alamin ang gusto nitong malaman.

Kapag nalaman nitong nanganak siya, iisipin kaya nitong ito ang ama?

Parang ngayon pa lang ay gusto na niyang tumakas. Gusto na niyang lumayo bago pa man nito malaman ang lahat.

Napasandal siya sa sofa at matagal na nakatingala lang habang blangko na ang isip.

"Braille! Braille!"

Nagulat siya malakas na boses ni Audrey na basta na lang pumasok ng bahay niya.

Nakakunot-noong napatingin siya sa pinsan na para bang hinihingal sa sobrang galit.

Ano na naman ang problema ng babaeng ito?

Tumayo siya kahit parang ayaw kumilos ng katawan niya.

"Nasaan si Sky? Hindi ba't magkasama kayo?" Nakapameywang na tanong nito.

Tiningnan pa nito ang kabuuan niya. Mas lalong hindi maipinta ang mukha nito nang mapansing basang-basa ang buong katawan niya.

"Nagtampisaw ba kayo sa ulan ni Sky kaya't basang-basa ka?"