Chapter 7

"Ma! bakit ka naman nag eskandalo dun?" inis na sabi ni Caleb sa ina ng makarating sila sa bahay. Inalis agad niya ang tie niya dahil pakiramdam niya, hindi siya makahinga.

Mas pinili niyang kausapin ang ina sa bahay, dahil nagtutungayaw ito sa sasakyan. Hindi mapigilan ang bunganga kakamura kay Hannah.

"Caleb, wag mo namang sigawan si mommy," awat ni Leona sa kanya habang hinahagod ang likod ng matanda na nakaupo sa sofa.

"Tama naman ang sinabi ko, wala akong ginagawang masama sa babaeng iyon!" inis na nakakuyom ang kamao ni Miraflor, "hindi ko nga alam kung bakit naisipan niya akong i- frame up ng ganoon katindi. Nakita ko pa naman si Edward Ignacio!"

Si Edward Ignacio ang talagang target nila sa Banquet na iyon. Naniniwala silang kapag malakas ang kapit nila sa lalaking iyon, lalakas ang kanilang kumpanya. May mga investors kasi na nag pull out ng kanilang investment matapos malamang naghiwalay na sina Caleb at Hannah.

"Kaya nga, ma! nagkaroon na kami ng chance na makausap siya, subalit anong ginawa mo?" napahilamos sa mukha niya si Caleb saka napatingala, "marami na kaming kinakausap na malalaking tao, subalit nasira ang diskarte namain, dahil sayo!"

"Wala nga akong ginagawang masama. Ni hindi ko nga hinahawakan ang babaeng iyon. Hindi ko alam kung bakit siya umaarte ng ganoon," mariing sabi ni Miraflor. Halata ang galit sa kanyang mukha, at ang kanyang mga mata ay nanlilisik na parang sa isang aswang.

"Kung hindi niyo siya hinawakan, bakit siya natumba? bakit siya umiiyak? hindi siya ganoon kadaling masaktan!"  tanong pa niya.

"Teka nga, Caleb, ang sisti, parang ipinagtatanggol mo pa ang babaeng iyon at hinahamak si mommy na may kasalanan ng lahat ah? bakit? dahil ba nakita mo na maganda na siya ngayon? baka akala mo, hindi ko napansin na natulala ka kanina nung makita mo siya?" may pang uuyam sa tinig ni Leona. Mababakas ang selos sa pangungusap na iyon.

"HIndi sa ganun, nagulat lang ako," bahagyang bumaba ang tono ni Caleb. "Isa pa, wala sa amin ang issue! paano kung may sugar daddy siya na mayaman? at sa halip na mag iinvest sa atin ay hindi na, dahil nga nasaktan siya? sa mundo ng negosyo, kinakalimutan muna ang nakaraan kung nais mong umangat."

"May CCTV naman siguro doon, bakit hindi natin kunin at idemanda ang babaeng iyon kapag nakita nating sinadya niya ang lahat?" suhestiyon ni Miraflor, "parang maganda ang ganoong plano. Para sa ngayon, bumagsak na siya! hindi pa siya umaangat ng mataas, baliin na agad natin ang kanyang pakpak!"

"Tama ka, mommy! bukas na bukas, puntahan natin yan, ng maipakita natin na inosente ka. Hindi ako papayag na apakan ka lang ng malditang babaeng iyon. Isa pa, alam kong nagsasabi ka ng totoo," kinampihan ni Leona si Miraflor.

Kailangan niyang magpalakas sa kanyang magiging biyenan. Gustong gusto siya ng matanda, kaya kailangan, pagbigyan niya ito palagi.

"Exactly! dapat, maipamukha talaga sa babaeng iyan kung saan siya nararapat. Nakakilala lang at kumabit sa isang mayaman, feeling anak na ng Diyos! kapag nakita ko talaga ang CCTV, ipagkakalat ko sa buong mundo ang kaartehan niya, para hindi pa man nag uumpisang tumubo ang kanyang pakpak, puputulin ko na!" labis ang gigil ni Miraflor.

KINABUKASAN..

Maaga silang nagtungo sa hotel upang ipa-check ang CCTV. Hindi basta makakapayag si Miraflor na ganoon ang nangyari.

"May kumuha na rin po ng CCTV dito kanina.. kukuha din kayo?" tanong ng manager.

"Sino ang kumuha? at anong CCTV ng kinuha niya?" tanong ni Caleb at napatingin sa ina.

"Yung tungkol po sa insidente kahapon nung may nanulak na--" napatingin ito kay Miraflor saka napalunok, "kayo yung nasa video?"

"Oo, ako nga.. kailangan kong makuha ang CCTV dahil sinisiraan ako ng babaeng iyon. Wala akong ginawang masama sa kanya!" may gigil ang tinig ni Miraflor habang binubuksan ang kanyang abaniko at bahagyang nagpaypay.

"Sige po, halina kayo," napapailing ito, at dinala sila sa operating area ng CCTV.

"Sir, pakiplay po nung nangyari kahapon, mga 7 ng gabi iyon, yung sa kumosyon sa may pasilyo.." sabi ng mangaer sa lalaki.

Kahit paulit ulit nilang panoorin, kita talaga na itinulak ni Miraflor si Hannah. Kaya nanlaki ang kanyang mga mata, nung makita ito.

"No! no! hindi ko siya itinulak!" nanginginig ang kanyang kalamnan, halos mabuwal siya.

"Mommy!" inalalayan agad siya ni Leona.

"Kukuha pa po ba kayo ng kopya? kapag kumuha daw kayo, ilalabas daw ni Miss Agoncillo ang video na ito." sagot ng manager.

"Ano? sinabi talaga ni Hannah yan?" naiinis na sabi ni Caleb.

"Yes sir.. sabi pa niya, kailangan niyo daw makipag settle sa kanya, kung hindi, idedemanda niya ang nanay niyo."

"Walanghiya talaga ang babaeng yun!" kuyom ni Miraflor ang kanyang kamao, "kakalbuhin ko siya, kapag nakita ko siya!"

"Sabi rin po niya, kapag may sinabi kayong masama against sa kanya, ipapablotter niya kayo."

Nanlaki ang mata ni Caleb, at hindi mapigilang magreklamo, "bakit? sino siya sa akala niya? at bakit niyo siya susundin? boss ba siya dito?"

"Ah.. sir.. malakas po ang kapit niya sa itaas.. malalagot po kami kapag hindi kami sumunod."

"Wala akong paki!" sigaw ni Miraflor, "basura lang siya ng aking anak, sino siya para magmalaki?"