36.

(Kiray pov) Tahimik akong nakaupo sa harapan ni Laxus habang mataman itong nakatingin sa akin. Samantalang si manang naman ay may sinusupil na ngiti na parang kanina pa nagpipigil, habang ang asawa ko naman ay hindi maipinta ang mukha.

‘Pero wala naman masama sa ginawa ko. Nagmamalasakit lang naman ako.’ Isip-isip ko.

Nabanggit ni Jigs kanina na dahil sa ginawa ko ay may na-trigger akong alarm. Kaya siguro galit ang asawa ko ngayon. Kaya pala mayamaya lang ay dumating ang mga tauhan ni Laxus dala ang kanilang mga baril. ‘Pero para saan naman ang alarm na ‘yon?’ Takang isip ko.

Napapitlag ako ng tumayo si Laxus. Akala ko ay masasakal na ako sa galit nito. Pero laking gulat ko ng iluhod nito ang isang tuhod sa harap ko. Hindi lang ‘yon, hinawakan pa nito ang kamay ko, maingat na parang babasaging bagay ito.

“Bakit mo ‘yon ginawa, Rayana? Sinabi ni manang sa akin na may inaalala ka kaya mo ‘to ginawa. Come on tell me para alam ko kung ano ang dapat kong ipagawa sa mga tauhan ko.”