KABABATA 2

NAGWAWALA pa rin si Rodel sa labas ng kwarto. Naiingayan na rin ang ilang kababaihang naghahanda para sa kanilang performance maya-maya lamang.

"Girls, don't worry, ako na ang bahala," ani Monique na halatang naiinis na. Padabog niyang tinungo ang pintuan at ngumiti muna ng peke bago binuksan ang p***o.

"Ano ka ba baby, halika na nga... pahuhupain natin 'yang init ng ulo mo," dinig ni Rose Marie ang malambing na boses ni Monique mula sa labas.

Kaagad namang isinara ni Kelly ang pintuan at ini-lock ito. Epektibo ang pang-aakit ni Monique kay Rodel kaya nawala na sa isip ng lalaki ang pakay sa kwartong iyon. Narinig na lang nila ang tawa ni Rodel habang palayo ang mga yabag nila.

Napabuntong-hininga si Rose Marie nang masiguro niyang tahimik na ang paligid. Nakasandal pa rin siya sa pader dahil alam na alam na niya ang takbo ng buhay sa lugar na iyon.

Nakahinga siya ng maluwag nang tahimik na muli ang kwarto. Narinig niya muli ang tawanan ng kanyang mga kaibigan sa labas ng banyo. Kahit sa simpleng tawanan man lang kasi ay pansamantalang nakakalimutan nila ang kanilang masalimuot na sitwasyon.

Binuksan niya ang shower at hinayaan niyang mabasa ang kanyang damit at buong katawan. Ang malamig na tubig ay kahit papano'y nakabawas sa tensyon at kaba niya. Tila nawala na rin ang kanyang kalasingan dahil sa matinding takot kanina.

Nakaharap siya ngayon sa salamin habang umaagos ang tubig na nagmumula sa shower sa kanyang buong katawan. Blangko ang isipan habang pinagmamasdan ang sariling repleksyon—babaeng kapal ang makeup, gulo-gulo ang buhok, at halos walang suot. Unti-unting nag-init ang paligid ng kanyang mata kasunod ang pagdaloy ng masaganang luha na humalo sa tubig ng shower.

Pinatay ni Rose Marie ang shower habang inaalala ang kanyang masasayang alaala kasama ang pamilya noon sa probinsya.

"ANG GANDA talaga ng dalaga ko!" tumingin sa mukha niya si Mang Nestor pagkatapos suklayan ang anak. Todo ngiti naman si Rose Marie habang tinitingnan sa salamin ang sarili. Isinuot niya ang kulay rosas na headband pagkatapos ay yumakap nang mahigpit sa ama.

"Thank you, 'tay, the best ka talaga!"

"Ikaw rin ang the best na bunso ko, kaya mag-aral kang mabuti, ha. Huwag ka muna magbo-boyfriend," malambing na wika ni Mang Nestor habang hinahaplos ang tuwid at mahabang buhok ng dalagitang anak.

"Opo, 'tay, promise! Tsaka na lang ako magbo-boyfriend kapag nakatapos na ako at nasa tamang edad na, kagaya ng palaging sinasabi niyo ni inay."

"May tiwala ako sa iyo, anak, alam kong matalino ka," sagot ng ama.

Bihira lang ang tatay na kagaya ni Mang Nestor na nag-aayos at nagtatali ng buhok ng anak na babae. Kahit na busy at pagod si Nestor sa furniture shop na pinagtatrabahuan nito araw-araw ay hindi pa rin niya nakakalimutang tulungan ang asawa sa pag-aasikaso sa mga anak mula sa panganay hanggang sa bunso na si Rose Marie.

"Ang galing naman ni tatay mag-ayos," bulalas ng kanyang ina na si Aling Thess habang inaayos ang mga baon at gamit sa eskwela nilang magkakapatid.

Bunso siya sa limang anak ni Mang Nestor at Aling Thess. Pinalaki silang may takot sa Diyos at may respeto sa kapwa. Maalaga ang kanyang mga magulang kahit na simple lamang ang buhay nila sa baryo. Kuntento na sila sa kung anong meron sila araw-araw. Hindi naman sila nagkukulang sa pagkain at sapat ang kita ng ama para sa pang-araw-araw nilang gastusin.

Mahusay sa paggawa ng mga furniture ang kanyang ama kaya naman ayaw siyang matanggal sa trabaho ng kanyang amo. Lalo namang pinag-iigihan ni Nestor ang trabaho dahil ang tanging pangarap lamang nilang mag-asawa ay mapagtapos sa kolehiyo ang lima nilang anak upang sa ganoon ay magkaroon sila ng magandang kinabukasan at hindi mamuhay sa hirap.

"O, sige na mga anak, alis na kayo ng kuya at ate mo baka mahuli kayo sa klase. Mag-iingat kayo sa daan ha," h******n muna ni Mang Nestor ang mga anak sa noo. Gan'on din si Aling Thess na hinalikan sila sa pisngi bago sila tuluyang lumabas ng kanilang tahanan.

Gan'on lang kasimple ang buhay nila noon. Lahat silang magkakapatid ay masipag mag-aaral. Maayos din ang relasyon nilang magkakapatid—walang lamangan, walang inggitan, at laging nagtutulungan sa bahay.

Hindi pa man sila nakakalayo sa kanilang bahay habang naglalakad sa kalsada ay may bumubusina na sa kanila mula sa likod.

"Pastor Rodney!" tuwang-tuwa si Rose Marie nang makita ang kanyang ninong na si Pastor Rodney lulan ng minamaneho nitong van.

"O, ano pang hinihintay niyo diyan, sakay na at ihahatid ko na kayo sa eskwelahan," anyaya ni Pastor Rodney habang binubuksan ang p***o. Agad namang tumalima ang magkakapatid at masayang pumasok sa sasakyan. Parang pangalawang magulang na rin nila si Pastor Rodney dahil ito ang pastor sa simbahang dinadaluhan ng buong pamilya nila.

"O, nagpraktis ba kayo ng presentation niyo para sa Sunday?" tanong ni Pastor Rodney habang nakatingin sa salamin ng kotse.

"Opo Pastor, kabisado na po namin," sagot ng kuyang si Melvin.

"Mabuti kung ganun. Pagbutihin niyo ha, at tandaan niyo, gagawin niyo iyon para sa Panginoon at hindi para magpasikat, okey?" paalala ni Pastor Rodney na may kasamang ngiti.

Silang magkakapatid ay may natural na talento sa musika at pag-awit. Ang kanyang mga kuya ay marunong humawak ng gitara at iba pang instrumento, habang silang dalawang babae naman ay sa pag-awit at pagsasayaw sa church. Maraming kapitbahay at kasama sa simbahan ang natutuwa sa kanila dahil nakikita nila ang kabutihan at biyaya ng Panginoon sa buhay ng kanilang pamilya.

Pero ang lahat ng alaalang iyon ng saya at kapayapaan ay biglang napalitan ng pait nang bumalik ang isip ni Rose Marie sa kasalukuyan. Biglang nanghina ang kanyang mga tuhod at nahilo siya sa matinding pagod at sama ng loob.

"Nanay... tatay... tulungan niyo ako..." iyon ang huling nasambit niya habang nanginginig ang boses, at tuluyan na siyang nawalan ng malay sa malamig na sahig.

Isang malakas na kalabog ang narinig mula sa loob ng banyo.

"Rose Marie?" tawag ni Kelly mula sa labas ng pintuan. Nakailang katok at tawag na siya pero walang sumasagot kaya nataranta at nag-alala na tuloy siya nang husto.

Agad niyang kinuha ang ekstrang susi ng banyo sa drawer at mabilis na binuksan ang p***o.

"Roseyyyy!!!"