Episode 3: In Relationship

Habang nagkakaedad siya, napapaisip na rin siyang lumagay sa tahimik. Oras na makita niya ang right woman niya, hindi siya magdadalawang-isip na pakasalan ito. Ito ang paulit-ulit na hinihingi sa kanya ng makulit niyang mama dahil solong anak lamang siya ng mga ito.

"Babe, I said... payakap!" Hagikgik ng babae lang ang narinig niya kaya kusa nang yumakap ang braso niya. "See? Mas nakakatulong ang yakap kapag ganitong malamig ang panahon. Ahm, M-Maria?" Nakasandig na sa dibdib niya ang babae at ang kamay niya, humahaplos ito nang kusa sa ulo ng babae.

"Y-yes?" puno ng siglang sagot nito. "Bakit, baby, may problema ba? Alam mo, mas gugustuhin pa kita kaysa sa ibang lalaki na nirereto sa'kin kaya mas pinili kong maging single muna dahil hindi ko pa natatagpuan ang tamang lalaki para sa'kin."

Napangisi siya pero sinupil na lang niya. "A-ako ba ang unang boyfriend mo?" Ang swerte pala niya kung ganun. "Huwag kang mag-alala dahil bukas, ako mismo ang maghahatid sa'yo sa bahay niyo. Gusto mo 'yon? Para makilala ko ang magulang mo."

Katahimikan. 

Hindi niya alam kung tama itong pinagsasabi niya pero napakagaan ng loob niya sa dalaga. Kakaiba ang dating nito sa kanya sa kabila ng pagiging probinsyana nito. Mali man pero nae-enjoy niya ang presensiya nito na hindi niya mahanap sa iba.

Tikhim ni Maria ang biglang bumasag sa katahimikang iyon. "Naku, matutuwa sigurado si Nanay kapag dinala kita sa'min pero natatakot ako kasi unang beses kong magdala ng lalaki sa baryo namin." 

Simpleng buhay lang ang meron sila noon pero sinuwerte lang sila kaya nasa subdivision na sila nakatira. "Hindi hadlang kung ano ka basta gusto kita, Maria." May kasamang haplos ito sa ulo ng dalaga nang sambitin niya iyon. "Hindi naman kami mayaman pero nagpursige ako kaya heto, very successful na. So, bibigyan mo ba 'ko ng pagkakataong maging tayo?" 

"Benjamin, ang ibig s-sabihin nito, tayo na b-ba?" nautal na tanong ng dalaga. "P-parang ang bilis naman."

Sinupil niya ang ngisi kahit pa hindi siya nakikita ng babae. Kapag babae ang usapan, talagang lumalabas ang lahat ng kalambingan niya sa katawan. Isang prinsesa ang turing niya sa mga ito. Para sa kanya, ang mga babae ay dapat minamahal nang tunay at hindi sinasaktan. Iyon ang isang tunay na gentleman.

"D-Diyos ko, B-Benjamin, hindi ako makapaniwala. T-tayo na ba talaga?"

Napahalakhak siya nang malakas. "Yes, babe. Tayo na." Mabilis man ito pero napakagaan ng loob niya sa dalaga. "B-babe?" nautal niyang tawag dito nang magpakiramdaman lamang sila. "Single ako at naghahanap ng babaeng magdadala ng pangalan ko balang-araw." 

Punong-puno ng pag-aalinlangan ang puso niya pero wala namang mawawala kung susubukan niyang maging sila. Ito ang request ng kanyang mama—ang mag-asawa na siya para maisalin sa kanya ng magulang ang pamana niyang pinakaaasam. Mukhang na-in love rin sa kanya ang dalaga. Kahit pa sa isip na lang niya nabubuo ang mukha nito, isang napakagandang prinsesa ang kanyang nakikinita. Ang importante, happy sila pareho sa bagong yugto ng buhay nila.

"B-Benjamin, hulog ka ng langit ngayong gabi." Sinundan ito ng malalim na paghinga ng dalaga at sunod-sunod na pagtikhim nito na animo'y may bumara sa lalamunan nito. "Ikaw ang katuparan sa pangarap kong makapag-asawa na. Dininig ni Lord ang panalangin ko. Ang tagal kong naghintay sa'yo at pareho nating pangarap 'to."

Napangiti siya pero walang salitang namutawi sa kanya.

"Sabi ko nga, kung hindi man ako palarin sa lalaki, ok na ang bungi o kalbo basta makapag-asawa lang ako. Maganda naman ako."

Nang marinig ito, mas lalo siyang nabihag dito. "I believe you, Maria."

"Sexy naman a-ako," may bikig sa lalamunan na dugtong ng dalaga. "Pero b-bakit walang nagkakagustong guwapo?"

This time, tumikhim na siya, "Dahil ako ang nakatadhana sa'yo," anas niya sa punong tainga ng babae. Ubod lawak siyang ngumiti dahil sa hatid nitong saya sa gitna ng panganib na dala ng bagyong ito. "Kung ganun, may tiwala ka ba sa'kin kung maging tayo na?" Grabe! Ito ang unang beses na nakipag-date siya sa dilim pero ayos lang. Sadya nga yata silang pinagtagpo ng tadhana at labis niya itong ikinasiya. Nang mahawakan niya ang babae, hindi niya napigil ang pagkomento. "Baby, ano ba 'tong nahawakan ko?" 

"Ay!" Napahalakhak ang dalaga. "Ano, braso ko 'yan. Ano bang ginagawa mo? Kung sa'n-s'an na napupunta ang kamay mo. Ay, Bentot, este my baby, nakikiliti ako."

Agad niyang kinapa ang babae at niyakap ito. "Sorry, babe. Ang dilim, eh." Kailangan niyang maging maginoo dahil siya ang unang lalaki sa buhay nito. "Maria?"

Katahimikan.

Na-trap sila sa maliit na kuweba kung sa'n sila nagtatago pansamantala pero mukhang mas na-trap siya nang yakapin siya ng babae bigla. Hindi siya makagalaw sa pwesto niya. Bakit mukhang ang laki ng katawan nito o baka guni-guni lang niya? Masyado siyang judgemental.

"Benjamin," malumanay na tawag ng babae. "Oo, nobya mo na ako. Bukas, sasama na'ko sa'yo pabalik ng Manila, ok?"

Hindi niya nakuha ang ibig sabihin nito pero nang rumehistro ito sa utak niya, napuno ng galak ang puso niya. "S-sigurado k-ka?" may pag-aalinlangang tanong niya bago siya nakaramdam ng ginhawa nang matanggal nito ang braso sa katawan niya. "Hindi ka magsisisi dahil whole package na ako oras na masilayan mo ang kaguwapuhan ko bukas ng umaga. Aalis tayo rito bukas pabalik ng Manila."

Siguradong magugulat ang kanyang mama kung may itatanan siyang babae. Nasa tamang edad na siya at kailangan niya rin si Maria para maisalin sa kanya ang ibang ari-arian ng kanyang papa kapag nag-asawa siya.

"Talaga, my Benjamin?" May kilig sa boses ng dalaga nang itanong iyon. "G-ganito pala ang may boyfriend? Istrikto pa naman si Nanay pero hindi mo naman ako pababayaan, 'di ba?"

"Oo naman," pampalubag-loob niya. "Hindi kita iiwan, my Maria."

Sa totoo lang, hindi niya alam kung tama itong pakikipagrelasyon niya pero nang maisip ang ina, siguradong matutuwa ang mama niya. Kailangan niyang maipakilala ang babae sa ina bago pa man mapunta sa charity works ang lahat ng yaman nila. 

"Maria, final na 'to, ha?" Agad niyang inakbayan ang babae na ikinatahimik nito. "Don't worry, ok? H-hindi kita pababayaan pagkatapos nito at siguradong magugustuhan ako ng pamilya mo." Nang hindi sumagot ang babae, muli siyang nagtanong. "Maria, may tiwala ka ba sa'kin?"

Tumikhim ang babae, "Oo, my Benjamin. Ramdam kong ikaw na talaga ang lalaking hinihintay ko."

May pag-aatubili man mula sa babae, winalang-bahala na lamang niya ito. Iniyakap niya ang mga braso para mawala ang panginginig niya. Sa totoo lang, ang lahat ng naghahabol sa kanya, dinadaan na lang niya sa pera kapag nakikipag-break siya. Walang gulo dahil kalimitang materialistic naman ang napupusuan niya but this time, isang probinsyana naman kaya for sure, wala siyang magiging problema rito. Ramdam niyang ibang-iba si Maria at pwede na itong iharap sa kanyang magulang. Kailangan niyang maghanap ng babae para maisalin sa kanya ang pamana ng boss ng kanyang ama. Weird man pero ito ang gusto ng kanyang papa. 

"Sabi mo sexy ka?" may pag-aalinlangang tanong niya bigla. Bakit mukhang malapad ang pangangatawan nito nang gantihan niya ang yakap nito? "M-Maria?"

"Oo, sexy ako." Mabilis nitong saad sa kanya. "Mabait pa at maalaga kaya hindi ka magsisisi na ako ang naging nobya mo."

"S-sure, Maria. I love that and I believe you, my love."

"Oo!" buong tatag na saad ng dalaga. "Isa akong Diyosa, my Benjamin."

Habang lumalalim ang gabi, muli na namang nagsungit ang panahon. Nagsimula nang umulan at ang panaka-nakang salitan ng kulog at kidlat. Nakaramdam na sila ng gutom sa magdamag na paghagupit ng bagyo na dinagdagan pa ng lamig dahil sa lakas ng hangin sa labas. Mas piniling yakapin na lang ng binata ang dalaga para mawala ang panginginig nila pareho. Nakaramdam siya ng takot sa mga tunog na naririnig niya sa labas. 

"Maria, wala bang m-multo rito?" anas niya habang yakap ito. "Deserted ang lugar na ito at mukhang nakakatakot."

"A-ano 'yon?" litong tanong nito. "Nandito lang ako at kaya kitang protektahan pero bakit ganito? Nanliliit ako dahil mukhang mataas ang pinag-aralan mo hindi kagaya ko na—"

"Stop, please!" Nang makapa ang ulo ng babae, agad niya itong kinintalan ng halik sa noo. "Don't worry, Maria, simple rin ako kagaya mo."

Napahikbi na naman ang dalaga nang marinig ito mula sa kanya, "Salamat, Benjamin. Wala akong alinlangan sa'yo basta mangako ka, hindi mo'ko iiwan, ha?"

"Oo naman." Kasimbilis ng kidlat sa labas ang sagot niya kahit puno ng alinlangan ang puso niya pero kung para sa mama niyang panay ang apura, baka nga mag-asawa na siya. "Basta 'wag ka nang mag-drama at panay iyak, ok? Ang sakit sa heart, eh. Ayokong umiiyak ang baby ko."

Yakap ang sinagot ng babae sa kanya kaya napangiti siya. Bakit pakiramdam niya, parang ang lapad nito? Ang bigat ng paa nitong nakadantay sa kanya kung paa ba ito, ay parang kasing bigat ng medium size na barbel na ginagamit niya sa gym. 

"Benjamin, ang saya ko!" naiiyak na saad nito habang nakayakap sa kanya. "May nobyo na'ko sa wakas. Hindi na'ko tutuksuhin ng mga ka-baryo ko."

"Oo, Maria."

Napangiti siya dahil akala niya, wala siyang pag-asa lalo't madilim at wala silang makita. Hindi siya mapagsamantala kaya may respeto siya rito. Panaka-naka lamang ang paghalik niya sa pisngi ng dalaga na hinahayaan lamang nito. Naisip niya ang kanyang mama, baka nag-aalala na ito sa kanya. Kahit 25 years old na siya, isa siyang dakilang mama's boy. Nakakatakot ang kidlat sa labas kaya napahigpit ang yakap niya sa dalaga. Tago ang kinaroroonan nila kaya tuwing kumikidlat, hindi pa rin niya makita ang pagmumukha nila.

"Maria, hindi ka ba natatakot?" anas niya rito.

"Hindi, bakit?" balik-tanong nito sa kanya, "B-bakit, my Benjamin, may nararamdaman ka bang kakaiba? Kulog at kidlat lang 'yan kaya 'wag kang matakot."

"Sure, Maria, ang swerte ko pala sa'yo."

Yumakap pa lalo ang dalaga sa kanya, "Sobra, Benjamin. Ikaw ang lalaking pinakaswerte sa balat ng lupa."