Episode 4: Misfortune

Nasa tabi niya lang ang dalaga na nagbibigay ng kapanatagan ng loob niya sa kabila ng hagupit ng bagyong kinatatakutan niya. 

"Huwag kang mag-alala dahil bukas ng umaga, mag-uusap tayo sa relasyon natin." Nagtagpo ang labi nila nang hindi sinasadya pero mabilis lamang niya itong ginawa.

"Huwag mo'kong lolokohin, ha, Benjamin?" Napasinok pa ang dalaga at lalong humigpit ang yakap nito sa kanya. 

Nalasahan niya ang luha nito sa pisngi nang bigla niya itong kintalan ng halik kaya pinilit niya itong pakalmahin ang sarili. "Maria," inis niyang sita. "I told you, 'wag ka mag-isip ng hindi maganda. Magiging ok din ang lahat. Wait nating humupa ang bagyo at bukas, ime-meet ko ang parents mo. Happy?" 

"Happy?" ulit ng dalaga. "N-natatakot lang ako, baby, kasi kapag niloko mo'ko, baka—ano." Napabuntong-hininga ang dalaga, "Baka kulamin ka ni Nanay pero wala pa naman siyang napapatay sa kulam niya kasi parang hindi naman umeepekto sa taong kinukulam niya. Hay!" 

Malakas na halakhak niya ang pumaimbabaw dahil kuwela rin pala ito. Mas lalong nadagdagan ang pagkagusto niya rito. Bahala na ang bukas pero tiwala siyang isang ubod ganda na dalaga ang kanyang kasama ngayon. 

Isa siyang ultimate heartthrob na businessman na may dignidad na iniingatan pero walang makakaalam kung saan niya nakilala ang bagong nobya. Tutulungan niya ang dalaga na mag-improve para naman maging presentable ito sa harap ng publiko. Kailangan niyang mag-ingat sa reputasyon niyang iniingatan lalo na't konektado sa kawanggawa ang kanyang mga adhikain. He's a philanthropist. Scholarships, jobs and trainings; these are some of the benefits he offered to all qualified applicants. 

"Babe?" untag niya nang manahimik ang babae bigla. "A-ayos ka lang b-ba?" 

Ang hikbi ng babae kanina, naging hagikhik na ito ilang sandali pa. "Yes, my Benjamin. Masaya lang ako sobra dahil hulog ka ng langit ngayong gabi. Maipagmamalaki ko nang may nobyo na'ko. Hindi na'ko sapilitang ipapakasal ni Nanay sa matandang iyon." 

"Good then." Wala man siyang alam sa buhay nito, hinding-hindi ito magsisisi oras na malaman nito ang estado niya. "Siguradong magugustuhan ako ng pamilya mo, I assure you that." 

Nalagay siya sa malalim na pag-iisip pero sinupil niya ang mga negatibong pumapasok sa utak. Ngayon lang niya na-realize, parang hindi pa siya handa mag-asawa pero ok lang sa kanya ang pagkakaro'n ng girlfriend muna. Sumasabay ang kulog at kidlat sa salit-salitang pagsasalita nila. Siya; pilit niyang pinapangakuan ang babae at ang dalaga, tiwalang-tiwala ito sa mga pangako niya. Napapitlag siya nang ubod lakas na kumulog kaya natakot siya. 

"Maria." Niyakap niya nang ubod higpit ang dalaga. Nakaramdam na naman siya ng lamig kaya kailangan nilang umamot ng init sa isa't isa. "Y-yakapin mo'ko," may nginig sa boses niya nang kapain niya ang dalaga. 

Malaki ang pasasalamat niya nang makaramdam siya ng ginhawa nang sundin ito ng dalaga. Malaking bagay ang presensiya ng babae at sukdulan ang saya niya dahil nakatulong ito sa kanya. Kung siya lang sa lugar na ito, baka himatayin siya bigla sa sobrang takot niya. 

"Matulog na tayo, babe. Masyadong malamig sa labas kaya kailangang magtago tayo r-rito pansamantala." Naririnig pa niya ang huni ng hangin pero wala na siyang narinig sa babae. "M-Maria?" 

Ilang sandali lang, malakas na hilik nito ang sumasaliw sa tunog ng kulog sa labas. Napangiti siya hanggang hilahin na siyang muli ng antok niya pero bago niya pinikit ang mata, isang desisyon ang nabuo niya. 

"I think, I found my perfect match—" Napangiti siya sa naisip. Ang weird niyang makipag-date sa dilim pero masaya siya sa naging desisyon niya. "You will be my new girl para tantanan na'ko ng ibang humahabol sa'kin. Thanks, Maria, and don't worry—I'll spoil you, baby." 

Ginupo na sila ng antok dala na rin ng malamig na panahon. May ngiti sa labi niya nang tuluyan siyang hatakin ng antok niya. Samut-sari ang nararamdaman niya pero hindi na ito mahalaga. 

Kinaumagahan...

"Naku, sino kayang lalaki ang kasama ni Maria sa loob? Ang lupit niya, ha. Kaya pala hindi nakauwi dahil may tinatago rito. Masyadong pinag-alala ang magulang, 'yon pala may kababalaghan nang ginagawa. Naku, hindi bagay sa kanya ang pangalan niyang Maria." 

"Grabe! Ang sabi ng nanay niya, guwapong lalaki raw. Ang swerte naman ni Tabatsoy sa kanya. Baka kinulam 'yan ni Maria kaya pumatol sa kanya, 'di ba? Posible! Macho raw ang nobyo ni Maria at mukhang Amerikano." 

Parang may mga bubuyog siyang naririnig pero antok na antok pa rin siya. Kanina pa niya naririnig ang mga usapang iyon at ang isa, ang malakas na sigaw nito. 

"Gumising kayong dalawa!" 

Kahit tinatamad, pinilit niyang minulat ang mata pero nagulantang siya. May isang matanda na nandidilat pa ang mata at nakapameywang sa paanan nila. 

"Ikaw pala ang nagtanan sa anak ko? Sino ka at sa'n ka nanggaling?" galit na singhal nito sa mukha niya.

Napabalikwas agad siya ng bangon. Para siyang nabuhusan ng malamig na tubig dahil agad nagising ang natutulog niyang diwa. Napaupo siya pero muli na namang napahiga nang biglang dumantay sa tiyan niya ang malaking hita ng katabi. Nanlaki ang mata niya sa nakita. Isang matabang babae na naglalaway pa ang nakayakap sa kanya. Ang masaklap pa, halos triple ng laki niya ang size nito. Napamura siya bigla. Ito ba ang nagmamay-ari ng mala-Diyosang boses na iyon kagabi? 

"Oh, God" nagulat na hiyaw niya pero napaaray siya nang biglang hilahin ng matanda ang tainga niya. "Fuck, what is this? Ouch! W-who are you?" hiyaw niya sa katabing mataba pero tulog pa rin ito. Panay din ang salag niya sa kamay ng matandang pilit siyang hinahawakan.

"Maria, gumising ka!" hiyaw ng matanda sabay yugyog sa natutulog na dalaga matapos siyang tantanan. "Sino ang lalaking ito, ha?" Nanlisik ang mata nito nang muling tumingin sa kanya. "Huwag mong bigyan ng kahihiyan ang walang bahid dungis na karangalan natin. Bakit mo ito ginawa, Maria?" bulyaw ng matanda sa tulog na babae. 

Napaungol ang dalaga bago dahan-dahan nitong minulat ang mata. "Nanay?" Gulat na gulat ang dalaga nang mapagsino ito. 

"Tumayo ka!" bulyaw ng babae. "Nakakahiya dahil alam na ng lahat na may kasama kang lalaki rito sa loob. Nasa labas ang mga pinsan mo at tiyuhin kasama ang ilang kapitbahay natin."

"N-naku, b-bakit kasama mo ang mga kapitbahay nating tsismosa, Nanay?" Napatingin ito bigla sa kanya kasabay ng panlalaki ng mata nito. "Diyos ko, Benjamin, ikaw ba 'yan?" Agad napaupo nang tuwid ang dalaga. "Nanay, siya nga pala ang... ang n-nobyo ko." 

Excited na tumayo ito at hinila na lang siya bigla palabas. Mas lalo siyang napamura na ikinatingin ng lahat sa kanya. Nagulat siya sa kumpulan ng mga taong naghihintay sa labas ng kuweba. Wala siyang suot na pang-itaas dahil sa bilis ng pangyayari pero hindi nakaligtas sa mata niya ang nakangangang mga kababaihan nang makita siya. Hindi niya masikmurang sulyapan ang malaking pangangatawan ng nagngangalang Maria at ang sandamakmak nitong taba sa katawan, nakakaumay sobra. 

"Makinig kayo, ipinapakilala ko ang nobyo ko, si Benjamin." Biglang napalingon ang dalaga sa kanya nang magulat siya. Isang mahigpit na yakap ang ginawa nito sa kanya. "My Benjamin, ako 'to, si Maria. Diyos ko, hulog ka nga ng langit. Napakaguwapo mo pala talaga." 

"Hay naku, Maria," komento ng isang kapitbahay ng dalaga. "Akala mo naman bagay kayo pero swerte mo riyan sa diyowa mo, ha. Ang guwapo, Maria. Ang macho niya."

Biglang ngumiti sa kanya ang katabi kaya kita niya ang sungki-sungki nitong ngipin. Halos masuka siya nang maalala na kahalikan niya ito kagabi. Muli na naman siyang napamura nang maalala na sinagot siya nito kagabi kaya magnobyo na sila para rito. Bakit sunod-sunod ang kamalasan niya? Gusto niyang tumakbo pero hindi niya magawa dahil kung titingnan ang mukha ng mga taong kaharap, parang wala siyang kawala.

"S-sandali." Napatingin siya sa katabing babae nang bigla itong umabrisyete sa braso niya. "Nagkakamali ka, M-Maria," nautal niyang saad. Pasimple niyang winaslik ang kamay nito pero parang tuko kung makakapit ang matabang babae sa kanya. "W-wala ho kaming relasyon nitong si Maria." 

Isang hampas sa braso mula sa nanay ni Maria ang natanggap niya. Pinanlisikan siya nito ng mata bigla pero napailing lang siya para patunayang wala silang relasyon ng anak nito.

"N-nakita ko kayong magkayakap sa loob, ah," galit na hiyaw ng matanda. "M-may relasyon kayo kaya 'wag niyo nang itago. Buko na kayo!"

"S-sandali lamang," sigaw ng isang binatilyo sa nanay ni Maria. "Tatawagin ko ang buong taga-baryo para hindi makatakas ang lalaking ito, Lola." Kumaripas na ito ng takbo nang makitang hawak-hawak na siya ng lahat habang nagpupumiglas. 

"S-sandali!" hiyaw niya nang panay kurot ang gawin ng mga babae sa kanya. "Mag-usap tayo," saad niya sa matandang babae. "Mag-usap po tayo, Nanay." Pera. Ito lang ang katapat ng matanda para tantanan siya nito. "Magbabayad ako basta pakawalan niyo lang ako. Hindi ako tatakas." 

Hangga't maaari, gusto pa rin niyang magpakatao kahit pa ubod ng panget ang babaeng nakahalikan niya kagabi. Gusto niyang iuntog ang sarili sa malaking puno dahil sa frustration niya. Ito ang napapala niya sa pagiging Mr. Romantiko niya sa babae. Kahinaan niya sobra ang babae kaya heto, he had suffered a great deal of misfortune. Gusto niyang tumakbo pero papaano? Six footer ang tangkad niya at ang babaeng nakahalikan niya kagabi, hanggang balikat niya lang ito. Nagmukha itong unano kaya asar na asar siya. Walang dating ang inaakala niyang ganda nito dahil ubod ito ng panget sa paningin niya.