Kabanata 96

Hanggang pag-uwi ay dala-dala ko sa dibdib ang bigat ng balitang kasama nito sa tour si Hannah. Ito kaya ang dahilan kaya hindi siya nagpaparamdam sa akin?

"Oh, mukhang maaga ka ngayon, hija? Tamang tama nagluto ako ng minatamis na saging," wika sa akin ni Auntie Melva nang mapasokan ko sa kusina.

"Salamat ho, pero busog pa po ako." Diretso na ako sa lamesa kung saan naroon ang pitcher ng tubig at baso.

"Si Itay ho?" tanong ko matapos ibaba ang ininomang baso.

"Nasa likod bahay namamahinga sa may kubo."

"Sige ho, puntahan ko lang muna, paki tiran n'yo nalang ho ako niyang niluluto n'yo."

"Aba, sige."