Chapter 11

Isang magaspang na haplos sa kamay ko ang gumising sa akin. Nakita ko ang nag-aalalang mukha ni tatay na nakaupo sa tabi ng kamang hinihigaan ko habang hawak ang aking kamay.

Ngumiti siya at tila nataranta nang makitang gising na ako. Dali-dali siyang lumabas upang tumawag ng doktor.

Inilibot ko ang aking paningin sa isang hindi pamilyar na kwarto. Sigurado akong hindi ito sa bahay o sa hacienda. Naramdaman ko ang bagay na nasa aking ilong, oxygen, at swero sa kamay ko. Nasa ospital ako.

Huli kong naaalala ang pakikipaghiwalay ko kay Arman na nagresulta sa pagtatalo.

Bigla akong nakaramdam ng pagkahilo sa pag-iisip kung ano ang sumunod na mga nangyari nang bumukas ang pinto at pumasok ng isang doktor.

Sinuri niya ako at tinanong ng ilang mga bagay.

Dalawang araw na pala akong walang malay. Naaksidente kami ni Arman, kaya pala masakit ang aking katawan dahil nagtamo ako ng mga pasa.

"Laking pasasalamat ko na hindi malubha ang sinapit mo sa aksidente anak."

Sa kabila nang pagpapabaya ng aking ama noon ay nararamdaman kong mahal niya ako  sa nakikita kong pag-aalala niya ngayon.

"Nasaan po si Arman?" Hindi maganda ang huli naming pagkikita ngunit mas nananaig ang pag-aalala ko sa kan'ya. 

Matagal akong tinitigan ni tatay bago nagpakawala ng isang malalim na buntong hininga.

"Wala na siya anak. Patay na si Arman."

Hindi si Arman ang tipo kong lalaki. Hindi siya ang nakikita ko bilang kasama sa habangbuhay. Sa higit dalawang taon na kasama ko siya, pakiramdam ko'y nakakulong ako. Subalit sa kabila ng lahat ng ito naging maayos ang pamumuhay ko. 

Ang mga pangangailangan at luho ko ay ibinigay niya. Hindi niya hinayaan na maghirap akong muli. Inilayo niya ako sa madilim na paraan ng pamumuhay na mayroon kami noon.

Marami akong natutunan sa kan'ya. At kahit hindi ako naging tunay na masaya sa relasyon naming dalawa ay gusto ko pa din na makatagpo siya ng babaeng kaya siyang mahalin.

Nais kong makalaya mula sa kan'ya, kahit pa alam kong masasaktan siya, ngunit hindi sa ganitong paraan. 

Malaya nga ako ngayon subalit wala na siya.

Nailibing na si Arman. Labis ang kalungkutan ng mga naninilbihan sa hacienda. Hindi man nila sabihin alam kong sinisisi nila ako dahil ako ang huling kasama nito.

"Hindi malubha ang mga sugat na natamo mo mula sa aksidente dahil hanggang sa huling sandali ay prinotektahan ka pa rin ng kaibigan ko." 

Naramdaman ko ang himig ng paninisi mula sa tono ng pananalita ni Attorney Sheldon.

"Sorry." Wala akong ibang masabi sa kanila kun'di ang paghingi ng tawad.

Sinisisi ko din ang sarili ko. Kung naging mas mahinahon ako sa pakikipag-usap sa kan'ya, sana ay hindi ito ang sinapit niya.

"Ginamit mo lamang siya para sa pera!" Matalim magsalita si Attorney Sheldon. 

Ayon kay Arman ay tinulungan niya itong makapagtapos ng abogasya kaya hindi na nakakapagtaka na sobra siyang nasasaktan sa sinapit ng kaibigan.

"Nagawa ko lang naman iyon para kay nanay, pero nang gabing iyon gusto ko nang itama ang lahat kaya nakipaghiwalay ako sa kan'ya. Hindi ko akalain na ganoon ang mangyayari."

Kahit ano pang dahilan ang sabihin ko, alam kong hindi niya iyon pakikinggan. Nawalan siya ng kaibigan at ama ang buong Hacienda Miraflor.

Napagpasyahan namin ni tatay na umalis sa bahay na galing kay Arman. Lahat ng ari-arian na ipinundar niya para sa akin ay isinauli ko kay Attorney Sheldon.

Gusto kong magsimula nang bago, mula sa sariling pagsisikap ko.

Naghanap ako ng part time job, plano kong ipagsabay ito sa aking pag-aaral. Si tatay naman ay nagsisimula nang magnegosyo mula sa ipon ni nanay.

"Anong ginagawa mo dito?" tanong ko kay Attorney Sheldon nang siya ang bumungad sa akin isang umaga.

"Isa ka sa mga inimbitahan ni Attorney Francisco, abogado ng pamilya ni Arman, para sa pagbabasa ng last will and testament ng kaibigan ko." Hindi ko lubos maunawaan ang sinabi niya pero sa huli ay sumama ako.

Sa mahabang lamesa ng hapag kainan sa mansyon sa hacienda ay naabutan namin ang isang matandang lalaki, na ayon kay Attorney Sheldon ay ang abogado ng pamilya ni Arman.

Naroon rin sa kanang bahagi nito si Manang Dory, ang mayordoma ng mansyon at si Mang Carpio, ang pinagkakatiwalaan niyang tagapamahala ng plantasyon ng cacao kapag wala siya.

Umupo ako sa tabi ni Mang Carpio na binigyan naman ako ng isang ngiti katulad nang kay Manang Dory. Napatingin ako sa babaeng nasa harapan katabi ni Attorney Sheldon.

Nakasuot ito nang pormal na pananamit. Hindi ko alam kung abogado rin ba siya o sekretarya ni Attorney Francisco.

Ubod ng pula ang kan'yang mga labi pero hindi ito malaswang tingnan. Sa wari ko'y hindi nagkakalayo ang edad nila ni Attorney Sheldon.

"Cassandra, this is Veronica Solis, half-sister of Arman." Hindi ko sinasadyang mapaawang ang labi sa pagpapakilala ni Attorney Sheldon dito.

Ang sabi sa akin ni Arman ay nag-iisang anak siya. Higit sa lahat ay nakakapagtakang hindi ko nakita ang half-sister niyang ito sa burol.

Inalis ni Veronica ang shades na kan'yang suot at hindi ko inaasahan ang pagtataray niya sa akin.

"Huwag mo na kaming ipakilala sa bawat isa Sheldon. I am not interested. Attorney Francisco, please start," mataray nitong pagkakasabi.

Itinikom ko ang aking labi pagkatapos ay itinuon ang atensyon sa abogado.

Wala akong ideya kung bakit ako narito. Pinili ko na lamang na makinig sa mga binabasang papeles ng abogado kahit pa wala akong maintindihan 'ni ano man mula doon.

Unti-unti ko na lang itong naunawaan nang marinig na pinamanahan ni Arman ng bahay at lupa si Mang Carpio at Manang Dory.

Kasunod nito ay ang listahan ng mga charity na tinutulungan at patuloy na gustong tulungan ni Arman kahit wala na siya. 

Bumaling sa akin si Attorney Francisco bago nagpatuloy sa pagbabasa.

"Ang plantasyon ng cacao, mansyon, kompanya, at natitirang mga ari-arian ay iniiwan ko sa pangalan ni Cassandra Vidal. Siya na ngayon ang bagong mamamahala sa Hacienda Miraflor."

Nanlaki ang aking mata sa narinig. Bumaling ako kay Attorney Sheldon upang sana'y kumpirmahin ang narinig, ngunit naagaw ni Veronica ang atensyon ko nang marahas siyang tumayo.

"What? Are you serious Attorney Francisco? Ako ang kapatid ni Arman, I should be the one to inherit Hacienda Miraflor!" pagtutol nito.