CHAPTER 5

“CHOLO?” tanong ko pagkarating ko sa bahay. Nasaan naman kaya ang asungot na ‘yon?

“Ate, nandyan ka na pala,” bati niya sa akin. Kakalabas niya lang galing sa kwarto.

“Nandoon na ba sila sa palengke?” tanong ko. Tinutukoy ko sina Mama at Papa.

“Opo. Ate, may assignment pala ako tungkol sa division.”

“Cholo, pwede bang mamayang gabi na lang ‘yan kasi alam mo naman na busy ako sa palengke ‘di ba?”

“Oo naman ate pero ‘wag mo lang kakalimutan ha?”

“Oo na.” Ginulo ko ang buhaghag niyang buhok at umakyat na ako sa ikalawang palapag ng bahay namin para magbihis.

“Cholo, alis na ako!” paalam ko. “Ikaw na ang bahala sa bahay ha?”

“Oo naman ate makakaasa ka.” Nag-thumbs-up pa siya.

Umalis na ako ng bahay at naglakad na naman papunta sa palengke. Ito ang routine ko pagkauwi ko galing eskwela. Nakakapagod din minsan pero kapag pamilya ang pag-uusapan, gagawin ko.

May tumawag sa akin pagkalabas ko ng gate.

“Leslie!”

Lumingon ako at nakita ko ang pinsan ko na tila nag-aabang sa akin. “Oh bakit?”