Chapter Twenty-three

Chapter Twenty-three: Key

Paulit-ulit kong binasa ang huling text niya at prinoseso pa ng utak ko kung ano iyon. Gusto niya akong pakasalan? He's joking right?

Kahit pa affected sa nabasang text ay nagpatuloy ako sa paglalakad papuntang parking. Pinipilit kong alisin sa isip ko iyon ngunit nang makita ko na siya na nakasandal sa isang BMW ay bigla ko ulit naalala kasama ang pagbilis ng tibok ng puso ko.

Gumalaw siya nang masulyapan ako at hindi pa man ako nakakalapit ay pinagbuksan na niya agad ako ng pinto.

"Salamat," sabi ko at sumakay na agad sa front seat. Siya naman ay umikot na sa driver seat.

"Saan ka ba maghahanap ng apartment?" tanong niya nang tuluyan nang umandar ang BMW niya.

"Uh... sa malapit lang. 'Yung walking distance lang sana..."

"Emman told me that you are living with them. Bakit ka pa maghahanap ng apartment? Malapit lang naman ang mansion nila dito ahh."

"Gusto ko sanang maging independent. Ayokong palaging umasa sa kanila lalo pa't ngayong may trabaho na ako."