Chapter 15

Kinaumagahan ay tuloy pa rin ang trabaho ko. Ang pinagkaiba lang, naging maayos na ang pakikitungo sa'kin ni Lino. Hindi na siya biglang nagsusungit o biglang nang-ssnob.

"Sasama ka na?" nakangiting tanong ni Berto nang makita akong kasama si Lino pababa ng bahay.

Ngumiti ako at tumango. "Baka raw kasi lasing ka pa," natatawang sabi ko kaya natawa rin siya.

Napailing na lang si Lino habang natatawa rin at sumakay na kami sa karwahe. May check up kasi ngayon si Padre Roque at gusto ko na ring humingi ng dispensa lalo pa't nang bumisita si Manong Pedro kay Josefa kahapon, sinabi niyang hindi na raw pinalayas sa bahay iyong mga pinalalayas ni Padre Roque. Kapitbahay kasi nila ang mga iyon at malapit na kaibigan na rin ni Lola Juana. Sila ang nandiyan kapag walang ibang kasama si Lola Juana sa bahay.

"Ayos ka lang?" tanong ni Lino habang naglalakad kami papasok sa monesterio.

Tumango ako at pinilit na ngumiti para hindi niya mahalatang kinakabahan ako.