KABANATA 5

"Will you marry me?"

Nakabibinging sigawan ang pumuno sa kahabaan ng hallway ng St. Javier Hospital. Kasalukuyang nakaluhod si Hunter sa harap ni Leigh.

"Dr. Leigh Guanez, will you marry me?" ulit ng binata.

"H-ha?" halos hindi ito lumabas sa bibig ng dalaga habang nalilitong nakatunghay sa kanilang direktor.

"Yes!"

Napamasid siya sa paligid, naroon ang ilang pasyente, kasamahan nilang doktor at nurse. Kilig na kilig ang mga itong nanonood sa dalawa.

"Leigh?" ulit ni Hunter dahilan para balikan niya muli ito nang tingin.

Napasulyap ang dalaga sa hawak nitong maliit na kahon na may lamang isang diamond ring.

Napakurap siya, at tiningnan ang kinakabahang mukha ng binata.

Hindi niya inaasahan na mangyayari ito. Ilang buwan pa lang sila nagda-date, para nga sa kaniya ay hindi iyon romantic date.

"Leigh, I'm waiting," may diin ang bawat pagbigkas ni Hunter, at lihim na inilibot ang mga mata sa mga nanonood.

"Yes na 'yan!"

"Doc. Guanez! Yes na iyan!' pambubuyo ng mga nanonood.

Hindi makangiti si Leigh sa nangyayari, hirap na hirap siyang lumunok at hindi makaisip ng kung anong salita ang lalabas sa bibig para sagutin ang tanong nito.

"Will you be Mrs. Hunter Ceneron?" naiinip ngunit pinanatili pa rin ni Hunter ang pagsusumamo kahit na bakas na pagkainip sa tugon ng doktorang dalaga.

Nanginginig ang mga palad ni Leigh, saan niya sisimulan ang pagtanggi sa inaalok nito?

Siguradong mapapahiya ito sa mga taong nanonood, lalo na't mataas ang posisyon nito sa hospital.

Pero ano'ng gagawin niya?

Hindi pa siya handa matali, lalo na sa lalakeng wala siyang nararamdaman.

Tila napansin naman ng mga nanonood ang pagdadalawang-isip ng dalaga. Natahimik ang mga ito, at makahulugan na nagtinginan. Ganoon na rin ang kanilang mga kasamahan.

Muling lumipad ang tingin ni Leigh sa mukha ni Hunter, hindi na maipinta ang mukha ng kanilang direktor. Hati sa pagitan ng pagkainip, at pagkapahiya ang nakaaawang anyo nito.

Nakaramdam siya ng awa kung basta-basta na lang niya tatanggihan ito nang harapan, sa harapan ng mga empleyado nito at mga tao.

Tumindig si Hunter habang hawak ang kahon, nasalubong ng dalaga ang alangang mga mata ng binata. Naaninag niya ang lungkot sa hitsura nito.

"You don't want to marry me?" mapait na tanong nito.

"W-what?" naguguluhan niyang usal, at hindi alam kung saan itutuon ang mga mata.

"Rejected 'yong marriage proposal ni Director?"

"Grabe naman, hindi ba nakahihiya iyon?"

"Oo nga, magkasintahan sila, 'di ba?"

"Bakit kailangan pa niyang ipahiya si Director?"

Umuugong ang bulungan sa paligid, at dinig na dinig niya ang kuro-kuro ng mga kasamahan sa paligid.

Napalunok si Leigh ng sariling laway, at lumipad ang tingin kay Hunter na nakayuko.

Pumikit muna ng mariin ang dalaga bago muling nagmulat, at tinitigan ang binatang nag-aalok ng kasal sa kaniya.

Bahala na!

Kung hindi niya sasagutin ito ngayon ay talagang magiging malaking kahihiyan ang nangyari na ito.

At sa lahat ng ginawa ni Hunter para sa kaniya, at sa kanilang mag-ama ay hindi katanggap-tanggap ito na maging sukli.

Pero hindi rin niya dapat isukli ang pag-oo sa inaalay nito.

Hindi niya mahal si Hunter, at wala siyang kaunti man lang na espeyal na nararamdaman dito, kaya bakit siya papayag magpatali sa lalakeng hindi naman niya gustong makasama?

"I thought we're good and you are ready for this, Leigh," malungkot na saad ng binata.

Nasalubong niya ang malulungkot na mata nito na nagpakurot sa puso ni Leigh. Hindi siya sanay na may nasasaktan dahil sa kaniya.

"We have been dating for almost a few months."

Tama ito, ilang buwan pa lang sila nagkakakilala. Dapat hindi pa sila umabot sa ganito, at hindi sa ganitong sitwasyon na maraming nanonood ito nagtatanong ng ganitong kahalagang bagay.

"I thought you are ready to be with me for a lifetime."

Bumaling nang tingin si Hunter sa mga taong nakapaligid. Kahit gustong magwala ng binata dahil sa galit ay hindi niya magawa. Sobra-sobra na ang pagpapahiyang nakamtam niya ngayon, at makasisira ito sa kaniyang magandang imahe na pinagkakaingatan niya.

"Everyone, sorry for inconvenience. You can all go!" anunsyo ng Director ng hospital habang namumula ang mukha dahil sa galit, at pagkapahiya.

Tinalikuran ng binata si Leigh, napakurap naman ang dalaga, at tinitigan ang nakatalikod na binata.

Nangangatog ang mga binti niya dahil sa kaba, nakakunotnoo siya, at hindi malaman ang gagawin, ang tamang gagawin. Para hindi mapahiya si Hunter sa mga tao.

"D-director!" lakas-loob na tawag ni Leigh.

Huminto ito sa paglalakad ngunit hindi pa rin lumilinga. Maingat namang nakikinig ang mga tao sa kanila.

"Y-yes."

Nilinis muna ni Leigh ang lalamunan bago binasa ang ibabang bahagi ng labi. Sunod-sunod na napakurap ang dalaga, hindi niya alam kung sigurado ba siya sa sinasabi niya.

"Y-yes, Hunter."

Pinikit niya nang mariin ang mga mata, at pilit na ibinulalas ang tugon niya sa alok nitong kasal.

"I-i will marry you."

Isang iglap lang ay nasa harap na niya si Hunter. Hindi matatawaran ang saya sa anyo nito. Hinawakan nito ang magkabilang kamay niya nang napakahigpit, at tinitigan ng diretso sa mga mata.

"Really, Leigh?!"

"It's a yes?!" sunod-sunod na usisa nito habang hindi makapaniwala ang anyo.

Maliit na pagtango ang ginawa ni Leigh, dahil hindi rin naman niya kayang ulitin ang sinabi.

Napataas ang balikat niya dahil sa gulat nang maghiyawan ang mga tao sa paligid.

"Thank you and I love you, Leigh!" Niyakap siya ni Hunter nang napakahigpit.

"Congratulations, Dr. Guanez and Director!"

"Bagay na bagay kayo!"

"Imbitado kami sa kasal ninyo, ha!" panunukso ng mga nasa paligid habang tuwang-tuwang silang pinagmamasdan.

Muling humarap si Hunter kay Leigh. Sinusundan niya nang tingin ang bawat galaw ng mga nagniningning na mga mata ng binata.

"I will marry you as soon as possible."

"I can't wait to be your husband, Leigh."

"I love you."

Isang maliit, at hilaw na ngiti ang sumungaw sa labi niya. Hindi niya magawang sagutin ang huling sinabi nito dahil hindi naman pag-ibig ang nararamdaman niya para sa binata.

Niyakap muli siya ni Hunter, at sa pagkakataon na ito ay pumikit ang dalaga. Kailangan na niyang ihanda ang sarili sa mga mangyayari sa pagpayag na magpakasal dito.