Kabanata 5

Andy's Point Of View.

"Paano pag nalaman ng Lolo mo na hindi naman talaga ako isang former secret service agent?" tanong ko sa kaniya, nandito ako sa passenger seat at siya ang nagmamaneho ng sasakyan.

Hindi ako makapaniwalang kailangan ko pang makilala ang Lolo niya, ang sabi niya ay kanina niya lang din malaman iyon. Hindi ko alam, pero hindi ko maiwasang kabahan.

"Naisip ko na rin 'yan, matalino si Lolo kaya hindi na ako magtataka kung imbestigahan ka niya," narinig kong sagot niya, sandali ko siyang nilingon bago tumingin sa bintana.

"Oh? Anong gagawin mo pag nalaman niyang delivery rider pala talaga ako?"

"Nagbayad ako para ipeke ang documents mo, kaya lalabas sa system na dati kang secret agent. Nagpagawa rin ako ng pekeng ID mo," wika niya. "Kaya kung sakali mang mag-imbestiga si Lolo, malalaman niyang nakapagtapos ka ng pag-aaral, at nakapagtrabaho sa mga kompanya."

Hindi na ako nagulat noong marinig iyon, tunog malabong mangyari iyong sinasabi niya pero sa yaman niya, impossibleng hindi niya magawang pekein ang mga documents ko.

"Nagsasayang ka lang ng pera," komento ko na hindi naman niya pinansin.

"Just like what I've said, I'm under witness protection. Ang sabi ni Lolo, bukas daw ang alis natin papuntang Batangas, sa private villa tayo titira."

Doon ako napamura. "Bakit kasama ako?!"

"That's part of our deal," seryosong sagot niya. "I won't need a guard because Lolo knows you can watch over me because he thinks that you're a former secret service agent, and if anyone tries to harm me, you'll protect me."

"Hanggang kailan naman tayo sa Batangas?"

"Hanggang matapos ang witness protection, wala pa akong idea kung kailan pero hangga't hindi pa nahuhuli ang suspect, paniguradong magtatagal tayo."

"Hindi pwede," inis kong sabi. "May kapatid ako, hindi ko siya pwedeng iwan mag-isa sa bahay. Nag-aaral pa siya, paniguradong kaya naman niya mag-isa pero hindi pa rin ako kampante."

"Maiintindihan naman niya siguro kung ipapaliwanag mo... Kung nag-aalala ka para sa kaniya, pwede akong mag-hire ng magbabantay sa kaniya."

Natigilan ako. "Gagawin mo 'yon?"

"Yeah, baka hindi ka sumama sa akin sa Batangas kapag hindi ko ginawa."

Napairap naman ako sa narinig, talagang hindi ako sasama sa kaniya dahil hindi talaga ako sanay na hindi kasama si Aemie sa bahay. Pero malaki-laki ang makukuha ko kada buwan at makakatulong iyon sa pag-aaral niya, kaya kahit ayoko man, gagawin ko 'to para sa magandang kinabukasan ng kapatid ko.

Kalahating oras ang lumipas bago kami nakarating sa pupuntahan, kung maganda na ang mansyon ng kumag na 'to. Mas maganda at mas malaki naman itong sa Lolo niya, kulay puti ito at para talagang isang palasyo, may fountain pa sa gitna at maraming puno sa paligid.

"Tandaan mo iyong mga sinabi ko kanina," saad niya pagkababa namin ng sasakyan.

Napairap na lamang ako dahil kailangan kong magpanggap na mabuting asawa niya. Nakita ko naman ang paglahad ng kamay niya bago kami pumasok, ilang segundo ko iyon tinignan bago tinanggap at magkahawak kamay kaming naglakad papasok sa loob.

Tahimik lang ang paligid, maayos, malinis, at halatang mahal ang mga gamit na nandito sa loob. Wala rin akong nakitang mga maids na pakalat-kalat. Pagdating namin sa tingin ko ay dining hall, naamoy ko kaagad ang tobacco na hinihithit ng isang matandang lalaking nakatalikod sa amin.

"Lolo, good evening."

Napalingon sa amin ang matanda at hindi ko maiwasang kabahan dahil mukhang masungit siya at nakakatakot. Pero kung alukin niya ako ng pera para iwan ang apo niya, gagawin ko ng nakangiti. Nakita kong nilagay niya ang tobacco sa lamesa bago lumapit, mabilis siyang naglahad ng kamay sa akin.

"I'm Armando Cavellana, nice to meet you," saad niya at tumango naman ako bago tanggapin ang kamay niya.

"Nice to meet you, Sir. Ako po si Andy."

Tumango siya. "Just call me Lolo too, Andy. Sakto ang dating niyo dahil kakain na tayo."

Napalingon naman ako sa mahabang lamesa na puno ng pagkain, hindi ko alam kung may fiesta ba dahil iba't ibang putahe ang nakikita ko. Hindi ko alam ang iba at sigurado akong iyon ang pagkain ng mga mayayaman. Magkatabi kami ng kumag habang nasa harapan naman namin Sir Armando, akala ko may iba pang mga dadating pero nag-umpisa na kaming kumain, hindi ako makapaniwalang pang tatlong tao lang ang kaganito kadaming pagkain.

"Mukhang hindi ko na kailangan pang tignan ang ID mo para malaman kung nagsasabi ba ng totoo si Andres," saad ng matanda, bahagya pang natatawa. "Base sa pangangatawan mo ay halatang kaya mong lumaban ng pisikal. I believe you're really a former secret service agent."

"Nakahiligan ko po kasi gym noong kabataan ko," pag-amin ko, totoo iyon dahil madalas ay doon ako tumatambay.

"I guess marunong ka ng taekwondo?"

Tumango ako. "Pati po Krav Maga."

Narinig ko naman ang pagtawa niya bago tumingin sa apo niya. "Take care, Andres. If you don't want to get punched," wika nito. "Alam mo kasi, Andy. May pagkababaero 'yan kaya nga ang sabi ko sa kaniya, kung mag-gigirlfriend man siya, ipakilala niya na lang sa akin kapag kasal na sila dahil ang daming babaeng dumaan sa buhay niyan."

"Lolo, I've changed," sagot noong kumag.

"Dapat lang! May asawa ka na at paniguradong hindi ka niyan sasantuhin kapag nahuli ka niyang may babae... Nga pala, matagal na ba kayong dalawa?"

"Dalawang taon pa lang po," sagot ko.

Tumango ang matanda. "Bago pa lang pala, pasensya na dahil kailangan mong pakasalan ang apo ko. Ayaw niya kasi ng bodyguards. Nasabi niya na bang bukas na ang alis niyo papuntang Batangas?"

"Opo, naiintindihan ko naman po ang sitwasyon ni Andres kaya ayos lang sa akin."

"Baka naman mamaya ay pag-uwi niyo may apo na ako?"

"Lolo!" suway ni kumag, pansin kong nagulat din siya sa sinabi ng matanda. "Hindi pa namin iniisip 'yan."

Nagkibit-balikat si Sir Armando. "Sinasabi ko lang naman, mukhang may lahi kasi itong si Andy, maganda ang magiging anak niyo niyan."

"Paano niyo po nalaman?" gulat kong tanong dahil bihira lang ang nakakapansin noon.

"Yes, you looked like a pilipino pero halata sa features mo na half ka. Lalo na't maputi ka."

Napangiti naman ako sa narinig, nagpatuloy ang pag-uusap namin at tinanong niya lahat ng tungkol sa amin ni kumag, kung saan kami nagkakilala, unang date namin at kung anu-ano pa. Nasagot naman namin lahat dahil nirehearsal na namin ang mga pwede niyang itanong sa amin.

"Susunduin kita bukas sa bahay niyo," wika sa akin ni kumag, nandito na kami ulit sa mansyon niya at nakasakay na ako sa aking motor ngunit hindi ko pa ito pinapaandar.

"Paano mo naman nalaman kung saan ako nakatira, kumag?" tanong ko.

"Kumag? I have a name."

"Ano naman?"

"Tsk. You're really weird."

Nginisihan ko lang siya. "Weird pero niyaya mong magpakasal," sagot ko at pinaandar na ang motor paalis sa kaniyang mansyon.