Chapter 6 - Arizcon Technologies

"A-Ano?"

Kita ko sa mga mata ni mama na hindi siya makapaniwala matapos kong sabihing buntis ako. Nanatili akong tahimik.

"Hindi naman sa ayaw kong magkaanak ka, pero..." Halatang nagdadalawang-isip siya kung sasabihin ba on hindi na lang.

"Pero ano po, mama?" tanong ko sa tonong kinukumbinsi siyang magpatuloy sa pagsasalita.

"Paano ka nabuntis?"

Hindi ko alam kung matatawa ba o kung maiinis sa tanong na iyon ni mama.

"Mama naman..." Napakamot pa sa batok si Harvey na katabi lang ni mama sa may sofa. Si Ate Gwen naman ay nasa kabilang sofa. Silang tatlo muna ang kinausap ko.

"Baka ang ibig sabihin ni mama ay paano kang mabubuntis kung wala ka namang pinakilala sa amin na boyfriend mo," pagpapaliwanag ni Ate Gwen.

"O-Oo, iyon ang i-ibig kong sabihin," pagdedepensa ni mama sa kanyang sarili at saka nahampas naman sa balikat si Harvey. "Ikaw na bata ka! Ano-anong naiisip mo."

"Eh, mama, ayusin mo kasi ang pagtatanong," reklamo naman ni Harvey habang hinihimas ang balikat na nahampas ni mama. "Kahit sinong makaririnig ay iba talaga ang iisipin."

"O baka naman may boyfriend kang hindi pinapakilala sa amin?" tanong pa ni Ate Gwen na may malisyosong mga ngiti.

Nalipat naman ang atensyon namin sa kanya dahil sa tanong niyang iyon.

Kaagad na nag-init ang mukha ko. Ito na nga ba ang sinasabi ko. Madali lang sabihing buntis ako pero hindi madaling sabihin kung sinong ama.

Naalala ko ang sinabi ni Uncle Troy na sabihing may relasyon na kami bago pa ako mabuntis. Sabihin ko raw na siya ang nag-comfort sa akin habang nagmu-move on ako kay Gio. Iyon dapat ang irason ko para magkatugma kami ng kwento.

Nanlalaki ang mga mata ni mama nang magsalita. "H-Huwag mong sabihing..."

Mas doble pa yata ang inilaki ng mga mata ko sa sinabing iyon ni mama. May alam ba siya? Ang bilis ng tibok ng puso ko.

"Si Gio ba?"

Muntik na akong malaglag sa kinauupuan ko. Akala ko pa naman ay may alam siya.

"Kung siya man lang, Ate Emie, magkalimutan na tayo," nakasimangot na sabi ni Harvey. "Hindi ko pa nakakalimutan kung paano natin sila nahuli noon."

Magkasama kami ni Harvey na dumating noon sa office ko, sa EPH. Nasa parking lot kami at napansin ko ang kotse ni Gio.

Dati kasi ay close talaga si Harvey at Gio. Parang sila ang magkapatid. Kaya nang makita nito ang kotse ni Gio ay kaagad itong kumaripas ng takbo.

Hindi ko alam kung tadhana na ba ang gumawa ng paraan para mahuli ko na sila dahil kaagad nabuksan ni Gio ang pinto ng kotse. Hindi nila kami napansin na papalapit na dahil abala sila sa isa't isa.

At si Gio mismo ang unang nakakita. Kaya marahil ay ganoon na lang ang galit nito.

"H-Hindi siya..." kaagad kong sagot at nakita kong kumalma si Harvey.

"Si Troy ba?"

Lahat kami ay napatigil sa tanong ni Ate Gwen.

"Talaga ba? " mahinang saad ni mama.

"Cool..." sabi naman ni Harvey.

Hindi ko alam kung masaya ba sila sa naging reaksyon nila. Kinakabahan ako na para bang maiihi na.

"Kaya pala noong nawalan ka ng malay ay siya kaagad ang bumuhat sa iyo," sabi pa ni mama na ikinagulat ko naman.

"N-Nandito siya noong forty days ni papa?" gulat kong tanong.

"Yes," sagot ni Ate Gwen. "Siya rin ang nagbalita sa amin na maayos na ang kalagayan mo."

"At ang pinaka-cool pa ay siya ang umayos ng kaso mo, ate," sabi naman ni Harvey. "Nabalik lahat ng shares at nalinis pa ang pangalan mo."

Hindi ko alam iyon.

He was there all the time.

"Pero, malayo ang agwat ninyo sa isa't isa..." dagdag na saad ni mama.

"Ten years, I guessed?" hindi siguradong saad ni Ate Gwen.

"Oo, ten years," sagot ko naman.

"Hindi naman halatang may edad na si Uncle Troy," sabi pa ni Harvey. "Isa pa mas gwapo naman siya kaysa roon sa ex mong hayop, ate."

Hindi naman iyon problema sa akin. Gaya nga ng sabi ni Harvey ay hindi halatang ten years ang agwat ng mga edad namin ni Uncle Troy.

Ni hindi pumasok sa isipan ko na aabot ang lahat sa ganito. Pero mas hindi ko inaasahan na ganoon ang pagtrato sa akin ni Uncle Troy, na parang nasa isang relasyon talaga kami.

"Wala namang kaso sa akin, anak, kung siya ang ama ng magiging apo ko, " biglang saad ni mama sa mahinahong tono. "P-Pero ipapanganak mo bang illegitimate ang apo ko?"

"May plano po kaming magpakasal at pupunta sila rito bukas para pormal na hingiin ang permiso mo, mama," dire-diretso kong sabi.

"What?"

"Ano?"

Sabay pang nagulat sina mama at Ate Gwen.

"Holy son of cool!" bulalas naman ni Harvey. Parang siya lang itong tuwang-tuwa na si Troy ang ama ng magiging pamangkin niya.

"Kailangan nating magpalinis ng bahay!" sabi ni Ate Gwen.

"Ako mismo magluluto para bukas!" natataranta namang saad ni mama.

"Kumalma nga kayo—"

"Paano kami kakalma, Maria Emerald?" Halata nga sa mukha ni mama ang pagkataranta dahil buong pangalan ko na ang binanggit niya. "Anak si Troy at hindi si Gio na apo lang."

Kumunot ang noo ko sa sinabi ni mama. "Hindi ko maintindihan kung anong pinupunto mo, mama."

"Ang CEO ng Arizcon Technologies ang pupunta rito sa bahay!"

Doon ko lang napagtanto na anak nga pala si Troy ni Apollo Arizcon— ang nangungunang negosyante sa bansa, sikat at nirerespeto ng lahat.

Bakit hindi ko iyon naisip?

Kaya ngayon ay nilukuban na ako ng kaba!

Naniningkit ang mga mata kong napalingon kay Harvey. Kaya pala ang saya niya. May plano ba siyang humingi niyong bagong release ng kumpanya nila Uncle Troy?

"Pero, ate..." biglang sambit ni Harvey sa seryoso nitong tinig. "A-Alam na ba ni Ku— ni Gio?"

Natigilan ako. Kahit sina mama at Ate Gwen ay ganoon din ang reaksyon.

"Ano na lang ang sasabihin ng iba kapag nalamang magpapakasal kayo ni Troy?" nag-aalalang tanong ni mama. "Panigurado ay mapupuno ka ng mga negative comments, anak."

Hindi ko rin alam.

Bahala na.

May pakiramdam akong hindi naman ako pababayaan ni Uncle Troy.