الفصل الثاني

الفصل الثاني

ضيفة في بيتي

رجعت القصر بعد منتصف الليل.

كنت متوقعة ألاقي البيت هادي بعد الحفلة، أدخل أوضتي من غير ما أشوف حد، ألم هدومي وأنام كام ساعة قبل ما أقرر هعمل إيه الصبح.

لكن أول ما فتحت الباب...

سمعت ضحكتها.

نادين.

وقفت مكاني.

ضحكتها جاية من الصالون، وبعدها مباشرة سمعت صوت سليم.

ـ إنتِ لسه زي ما إنتِ... مابتبطليش كلام.

ضحكت تاني.

ـ وأنت لسه بتدعي إن كلامي بيضايقك.

إيدي شدت على شنطتي.

غريبة.

أربع سنين متجوزاه، وعمري ما سمعته بيكلمني بالنبرة دي.

نبرة فيها راحة.

دفء.

حاجة كنت بطلبها منه بنظرة، بكلمة، بقرب...

وماخدتهاش.

مشيت ناحية الصالون.

كان سليم قاعد على الكنبة، رابط الكرافتة مفكوك، وجاكت بدلته مرمي جنبه.

نادين كانت قصاده، ماسكة فنجان قهوة.

ووالدته قاعدة معاهم.

أول ما شافتني، ابتسامتها اختفت.

ـ رجعتي؟

بصيت لها.

بيتي.

وجوزي.

ومع ذلك سؤالها خلاني أحس إني الضيفة.

رديت بهدوء:

ـ أيوه.

سليم رفع عينه ناحيتي.

بصلي ثواني، وبعدين نظر لساعته.

ـ كنتِ فين؟

كان نفسي أقوله عند المحامي.

كان نفسي أحط ورق الطلاق قدامه دلوقتي وأشوف وشه.

لكن المحامي طلب مني ما أقولش حاجة قبل ما يجهز الإجراءات.

فقلت:

ـ بره.

عقد حاجبيه.

ـ بره فين؟

ـ مكان كان لازم أروحه من زمان.

نادين حطت الفنجان بسرعة.

ـ أنا ممكن أمشي لو وجودي عامل مشكلة.

حماتي مدت إيدها ومسكت إيدها.

ـ تمشي فين في الوقت ده؟ إنتِ هتباتي هنا طبعًا.

بصيت لها.

ثم لنادين.

ـ هتبات هنا؟

سليم رد بدلها:

ـ أيوه.

الكلمة خرجت طبيعية جدًا.

كأنه بيقولي إن الجو برد.

مش إن حبيبته القديمة هتنام تحت نفس السقف مع مراته.

ضحكت بخفة.

ـ تمام.

نادين رمشت باستغراب.

واضح إنها كانت مستنية اعتراض.

يمكن دموع.

يمكن خناقة.

حماتي نفسها بصتلي باستغراب.

سليم كان الوحيد اللي ماعجبوش ردي.

ـ تمام؟

ـ أيوه. فيها حاجة؟

ـ لأ... بس كنت متوقع...

سكت.

سألته:

ـ متوقع إيه؟

ـ ولا حاجة.

اتجهت ناحية السلم.

لكن صوت والدته وقفني:

ـ على فكرة يا تاليا، خليت الخدم يجهزوا لنادين الأوضة اللي جنب جناحكم.

رجلي وقفت على أول درجة.

الأوضة اللي جنب جناحنا؟

القصر فيه أكتر من عشر غرف ضيوف.

لكنها اختارت تحديدًا الغرفة الملاصقة لغرفتي أنا وسليم.

لفيت ناحيتها.

ـ ليه الأوضة دي؟

ابتسمت.

ـ فيها بلكونة جميلة، ونادين بتحب الجنينة.

نادين قالت بسرعة:

ـ طنط، والله أي أوضة تنفعني.

ـ لأ يا حبيبتي. إنتِ مش غريبة.

نظرتها اتحولت ليا وهي بتكمل:

ـ ده كان بيتك قبل ما يكون بيت ناس كتير.

وصلت الرسالة.

واضحة جدًا.

أنا "ناس".

ونادين صاحبة البيت.

سليم قال بنفاد صبر:

ـ ماما، كفاية.

لثانية، قلبي الغبي اتحرك.

افتكرت إنه أخيرًا هيدافع عني.

لكن أمه قالت:

ـ أنا قلت إيه؟

سليم ما ردش.

ولا بصلي حتى.

وطلعت أنا السلم.

دخلت أوضتي وقفلت الباب.

سندت ضهري عليه.

ممنوع أعيط.

قلت الجملة لنفسي أكتر من مرة.

ممنوع.

لكن عيني راحت تلقائيًا للسرير.

سرير كبير جدًا لشخصين...

نمت عليه لوحدي ليالي أكتر مما أقدر أعد.

سليم عنده أوضته الخاصة داخل الجناح.

وكان دايمًا عنده سبب.

شغل.

اجتماع بدري.

مكالمة.

سفر.

تعب.

وأنا كنت بصدّق.

أو يمكن كنت بختار أصدق.

فتحت الدولاب.

بدأت أطلع بعض هدومي.

مش علشان أمشي الليلة.

لسه في حاجات لازم أخلصها.

لكن للمرة الأولى، كنت بجهز نفسي فعلًا للخروج من حياة سليم.

سمعت خبط على الباب.

ـ ادخل.

دخل سليم.

وقف عند الباب وبص للهدوم فوق السرير.

ـ بتعملي إيه؟

ـ برتب حاجتي.

ـ الساعة واحدة ونص بالليل؟

ـ جالي مزاج أرتب.

قفل الباب وراه.

ـ إنتِ مالك؟

ضحكت وأنا بطوي بلوزة.

ـ أنا؟ ولا حاجة.

ـ من ساعة الحفلة وإنتِ بتتصرفي بطريقة غريبة.

رفعت عيني له.

ـ يمكن بطلت أتصرف بالطريقة اللي متعود عليها.

ـ وإيه الطريقة اللي أنا متعود عليها؟

ـ أسكت.

سكت فعلًا.

رجعت لهدومي.

قال بعد لحظات:

ـ موضوع الخاتم ماكانش يستاهل كل ده.

إيدي توقفت.

ـ كل ده إيه يا سليم؟

ـ تمشي من عيد ميلاد أمي، تختفي بالساعات، وترجعي بالمنظر ده.

ـ المنظر ده؟

ـ إنتِ فاهمة قصدي.

حطيت البلوزة على السرير.

ـ لأ. فهمني.

زفر بضيق.

ـ تاليا، أنا تعبان ومش ناقص جدال.

ابتسمت.

ـ عارف إيه أغرب حاجة في جوازنا؟

بصلي.

ـ إنك عمرك ما كنت ناقص جدال، ولا ناقص مشاكل، ولا ناقص شغل... إنت بس كنت دايمًا ناقصني أنا.

ملامحه اتغيرت للحظة.

لكنها رجعت جامدة بسرعة.

ـ هنرجع للكلام ده تاني؟

هزيت راسي.

ـ لأ. اطمن. مش هنرجعله تاني.

ـ كويس.

اتجه ناحية الحمام، قبل ما أقول:

ـ ونادين؟

وقف.

ـ مالها؟

ـ هتفضل هنا قد إيه؟

لف ناحيتي.

ـ لحد ما ترتب أمورها.

ـ أسبوع؟ شهر؟ سنة؟

ـ معرفش.

ضحكت.

ـ طبعًا.

ـ عندك مشكلة في وجودها؟

بصيت له طويلًا.

من كام ساعة بس، كنت ممكن أصرخ.

أقوله أيوه.

عندي ألف مشكلة.

دي الست اللي حبيتها قبلي.

الست اللي أخدت خاتمي علشانها.

الست اللي أمك بتتمنى كل يوم إنها تكون مكاني.

لكن تاليا اللي كانت بتخاف تخسر سليم...

ماتت الليلة.

فقلت:

ـ لأ.

عقد حاجبيه.

ـ لأ؟

ـ بالعكس. خليها براحتها.

فضل باصصلي كأنه بيحاول يفهم.

ـ إنتِ متأكدة إنك كويسة؟

ابتسمت.

ـ لأول مرة من أربع سنين.

وسبته ودخلت غرفة الملابس.

بعد دقائق، خرجت علشان أجيب مية.

وأنا معدية في الممر، سمعت صوت نادين من الأوضة المجاورة.

الباب كان موارب.

كنت هكمل طريقي...

لحد ما سمعت اسمي.

ـ تاليا بدأت تتغير.

صوت حماتي رد:

ـ ما يهمنيش. المهم ماتضيعيش الفرصة دي تاني.

سكتت نادين لحظة.

ثم قالت:

ـ وسليم؟

ـ سليم عمره ما حبها.

اتجمدت مكاني.

كنت أعرف.

لكن سماعها بصوت شخص آخر كان مختلف.

نادين سألت:

ـ ولو رفض يسيبها؟

ضحكت حماتي.

ـ سليم اتجوز تاليا لسبب، والسبب ده انتهى من زمان.

قلبي دق بعنف.

سبب؟

أي سبب؟

اقتربت خطوة من الباب.

ثم سمعت نادين تقول بثقة:

ـ متقلقيش يا طنط.

صمتت لحظة، قبل ما تكمل:

ـ اديني لحد آخر الشهر.

ضحكت حماتي.

ـ واثقة أوي.

جاء رد نادين هادئًا...

لكنه كان كفيلًا إنه يثبتني مكاني.

ـ لأن قبل نهاية الشهر...

تاليا مش هتكون مرات سليم.